തിരുവനന്തപുരം: കേരളം നിയമസഭാ തിരഞ്ഞെടുപ്പിന്റെ ആവേശകരമായ ക്ലൈമാക്സിലേക്ക് കടക്കുമ്പോള്, വോട്ടര്മാരെ കയ്യിലെടുക്കാന് ദേശീയ രാഷ്ട്രീയത്തിലെ പ്രമുഖര് ഇന്ന് കേരളത്തില് പ്രചരണത്തിന് എത്തുന്നു. പ്രധാനമന്ത്രി നരേന്ദ്ര മോദിയും പ്രതിപക്ഷ നേതാവ് രാഹുല് ഗാന്ധിയും ഇന്ന് വിവിധ ജില്ലകളിലെ സ്ഥാനാര്ത്ഥികള്ക്ക് വേണ്ടി പ്രചാരണത്തിനായി എത്തും. പ്രധാനമന്ത്രി തിരുവനന്തപുരത്തും തിരുവല്ലയിലും എത്തുമ്പോള് രാഹുല്ഗാന്ധി ആലപ്പുഴയിലാണ് എത്തുന്നത്. മുഖ്യമന്ത്രി ധര്മ്മടത്തും എത്തിച്ചേരും.
മുഖ്യമന്ത്രി സ്വന്തം മണ്ഡലമായ ധര്മ്മടത്ത് വോട്ടുചോദിക്കാനായി എത്തും. ആദ്യമെത്തി റോഡ്ഷോ നടത്തിയ ശേഷം സംസ്ഥാനത്തിന്റെ വിവിധ മണ്ഡലങ്ങളില് പ്രചരണത്തിനെത്തിയ മുഖ്യമന്ത്രി ഇന്നലെ കണ്ണൂരിലേക്ക് മടങ്ങിയെത്തിയിരുന്നു. പയ്യന്നൂരും തളിപ്പറമ്പിലുമെല്ലാം പ്രചരണം നടത്തിയ ശേഷം ഇന്ന് ധര്മ്മടത്തെ 12 ഇടങ്ങളിലാണ് പ്രചണയോഗത്തിന് എത്തുന്നത്. ഇത്തവണ കോണ്ഗ്രസിന്റെ അബ്ദുള് റഷീദാണ് മുഖ്യമന്ത്രിക്ക് എതിരേ ധര്മ്മടത്ത് മത്സരിക്കുന്നത്. കൊട്ടിക്കലാശം വരെ മുഖ്യമന്ത്രി ധര്മ്മടത്ത് തുടരുമെന്നാണ് വിവരം.
പ്രധാനമന്ത്രി നരേന്ദ്ര മോദി ഇന്ന് ഉച്ചയ്ക്ക് 2:30-ന് തലസ്ഥാനത്ത് എത്തും. ബിജെപിയുടെയും എന്ഡിഎയുടെയും പ്രചാരണത്തിന് പുത്തനുണര്വ് നല്കാനാണ് മോദിയുടെ സന്ദര്ശനം. വൈകിട്ട് 4 മണിക്ക് തിരുവല്ല പബ്ലിക് സ്റ്റേഡിയത്തില് നടക്കുന്ന കൂറ്റന് പൊതുസമ്മേളനത്തെ അദ്ദേഹം അഭിസംബോധന ചെയ്യും. പത്തനംതിട്ടയിലെ പരിപാടിക്ക് ശേഷം തിരികെ തിരുവനന്തപുരത്തെത്തുന്ന പ്രധാനമന്ത്രി നഗരത്തെ ആവേശത്തിലാഴ്ത്തി വമ്പന് റോഡ് ഷോയില് പങ്കെടുക്കും. കിള്ളിപ്പാലത്ത് നിന്നും കരമന വരെയാണ് റോഡ്ഷോ. വലിയ ജനപങ്കാളിത്തം പ്രതീക്ഷിച്ച് കനത്ത സുരക്ഷയാണ് ഇവിടെ ഒരുക്കുന്നത്.
യൂഡിഎഫ് നിരയില് ആത്മവിശ്വാസം നിറയ്ക്കാന് രാഹുല് ഗാന്ധി ഇന്ന് വീണ്ടും കേരളത്തിലെത്തും. കേന്ദ്ര-സംസ്ഥാന സര്ക്കാരുകളെ ഒരുപോലെ പ്രതിക്കൂട്ടിലാക്കിയുള്ള പ്രചാരണമാണ് അദ്ദേഹം ലക്ഷ്യമിടുന്നത്. ആലപ്പുഴയില് തുടക്കം കുറിക്കുന്ന പര്യടനം കട്ടപ്പന വഴി കൊച്ചിയിലാണ് സമാപിക്കുന്നത്. ശബരിമല സ്വര്ണ്ണക്കൊള്ളയുമായി ബന്ധപ്പെട്ട് എല്ഡിഎഫിനെതിരെയും, ഇന്ധനവില വര്ധനവും സാമ്പത്തിക പ്രതിസന്ധിയും ഉയര്ത്തി കേന്ദ്രത്തിനെതിരെയും രാഹുല് ആഞ്ഞടിക്കുമെന്നാണ് സൂചന.
