തിരുവനന്തപുരം: രാജ്യവിരുദ്ധപ്രവര്ത്തനവുമായി ബന്ധപ്പെട്ടതോ തീവ്രവാദ പ്രവര്ത്തനങ്ങളുമായി ബന്ധപ്പെട്ടതോ ആയ കേസുകള് ക്രൈസ്തവ സമൂഹത്തിനെതിരേ ഇന്ത്യയില് ഒരിടത്തും ഇല്ലെന്ന് മുന് കേന്ദ്രമന്ത്രിയും കഴക്കൂട്ടത്തെ എന്ഡിഎ സ്ഥാനാര്ത്ഥിയുമായ വി മുരളീധരന്. അതുകൊണ്ടുതന്നെ എഫ്സിആര്എ നിയമം അവരെ ഒരു തരത്തിലും ബാധിക്കുകയില്ലെന്നും പ്രതികരിച്ചു.
ക്രിസ്ത്യന് സമൂഹം എഫ്സിആര്എ യുടെ ഒരു റഡാറിലും വരുന്നതല്ലെന്നും അതുകൊണ്ടുതന്നെ അവര്ക്ക് നിയമം കൊണ്ട് പ്രശ്നമൊന്നും ഉണ്ടാകില്ല. ക്രിസ്ത്യന് സമൂഹവുമായി ബന്ധപ്പെട്ട് രാജ്യവിരുദ്ധമോ ഭീകരപ്രവര്ത്തനവുമായി ബന്ധപ്പെട്ടതോ ആയ ഒരു കേസ് പോലും ഇന്ത്യയില് ഒരിടത്തും റിപ്പോര്ട്ട് ചെയ്യപ്പെട്ടിട്ടില്ല. തീവ്രവാദപ്രവര്ത്തനത്തില് ഏര്പ്പെടുന്ന ചിലയാളുകള് എഫ്സിആര്എ യുടെ പരിധിയില് പെട്ട നിയമം ദുരുപയോഗം ചെയ്യുന്നുണ്ട്. അത്തരക്കാരെ പൂട്ടണമെങ്കില് ഈ നിയമത്തിന്റെ ഭേദഗതി ആവശ്യമാണ്.
എന്നാല് കോണ്ഗ്രസും പ്രതിപക്ഷ പാര്ട്ടികളും ഈ നിയമഭേദഗതി വിവാദമാക്കുന്നത് തെരഞ്ഞെടുപ്പിലെ മുതലെടുപ്പിനാണ്. കേരളത്തിലെയും തമിഴ്നാട്ടിലെയും ആസാമിലെയുമൊക്കെ തെരഞ്ഞെടുപ്പ് മുന്നില് കണ്ടുകൊണ്ട് കോണ്ഗ്രസും പ്രതിപക്ഷവും അനാവശ്യമായ വിവാദം ഉണ്ടാക്കാന് നോക്കുന്നത്. കോണ്ഗ്രസിന്റെയൊക്കെ പ്രതികരണങ്ങള് പരിശോധിച്ചാല് കേരളത്തിലെ ക്രൈസ്ത സഭകള് മുഴുവന് വിദേശപണം സ്വീകരിച്ചുകൊണ്ടിരിക്കുന്നവരാണ് എന്നാണ് പറഞ്ഞുവെച്ചുകൊണ്ടിരിക്കുന്നതെന്നും വി. മുരളീധരന് പറഞ്ഞു.
