തിരുവനന്തപുരം: കേരളത്തില് എന്ഡിഎ സര്ക്കാര് അധികാരത്തില് എത്തിയാല് എയിംസ് രണ്ടു വര്ഷത്തിനുള്ളില് നല്കുമെന്ന് ആഭ്യന്തരമന്ത്രി അമിത്ഷാ. പ്രധാനമന്ത്രി ആവാസ്് യോജനപ്രകാരം നല്കിയ വീടിന്റെ ക്രെഡിറ്റ് 'ലൈഫ് മിഷന്' എന്ന് പറഞ്ഞ് പിണറായി അടിച്ചുമാറ്റിയെന്നും അധികാരത്തിലെത്തിയാല് സംസ്ഥാനത്തിന്റെ മുഖച്ഛായ മാറുമെന്നും അമിത് ഷാ പ്രഖ്യാപിച്ചു.
കേരളത്തില് ഭരണമാറ്റം അനിവാര്യമാണെന്നും എന്ഡിഎ സര്ക്കാര് അധികാരത്തില് വരുമെന്നും വരാനിരിക്കുന്നത് എന്ഡിഎയുടെ കാലമാണെന്നും അമിത് ഷാ ആത്മവിശ്വാസം പ്രകടിപ്പിച്ചു. നരേന്ദ്ര മോദിയുടെ നേതൃത്വത്തില് സുരക്ഷിതവും ആധുനികവുമായ ഒരു 'പുതിയ കേരളം' കെട്ടിപ്പടുക്കും. വിഴിഞ്ഞം തുറമുഖത്തെ കേന്ദ്രീകരിച്ച് വലിയൊരു വ്യവസായ ഇടനാഴി സ്ഥാപിക്കും.
തിരുവനന്തപുരത്തെ ആഗോള തലത്തിലുള്ള ഐടി, ആര്ട്ടിഫിഷ്യല് ഇന്റലിജന്സ് ഹബ്ബായി ഉയര്ത്തും. കേന്ദ്ര പദ്ധതികള് സ്വന്തം പേരില് അവതരിപ്പിക്കാനാണ് പിണറായി സര്ക്കാര് ശ്രമിക്കുന്നത്. 'പ്രധാനമന്ത്രി ആവാസ് യോജന' പദ്ധതിയെ 'ലൈഫ് മിഷന്' എന്ന് പുനര്നാമകരണം ചെയ്തത് ഇതിന് ഉദാഹരണമാണ്. എല്ഡിഎഫ്-യുഡിഎഫ് മുന്നണികള് അഴിമതി മാത്രമാണ് കേരളത്തിന് നല്കിയത്.
വയനാട്ടില് നിന്ന് വിജയിച്ച 'സഹോദരനും സഹോദരിയും' (രാഹുല് ഗാന്ധിയും പ്രിയങ്ക ഗാന്ധിയും) കേരളത്തിന് വേണ്ടി എന്ത് വികസനമാണ് കൊണ്ടുവന്നതെന്ന് അദ്ദേഹം ചോദിച്ചു. ക്ഷേത്രങ്ങളിലെ സ്വര്ണം മോഷ്ടിക്കുന്നവര്ക്കെതിരെ കടുത്ത നടപടിയുണ്ടാകും. എന്ഡിഎ അധികാരത്തിലെത്തി രണ്ടു മാസത്തിനുള്ളില് അവരെ ജയിലിലടയ്ക്കും. പോപ്പുലര് ഫ്രണ്ടിനെ നിരോധിച്ചപ്പോള് ഇരുമുന്നണികളും അതിനെ എതിര്ത്തുവെന്ന് അദ്ദേഹം ആരോപിച്ചു. മുനമ്പത്തെ ഭൂമി പ്രശ്നത്തില് എല്ഡിഎഫും യുഡിഎഫും ജനങ്ങളെ വഞ്ചിക്കുകയാണ് ചെയ്തത്.
