ബീജിംഗിലെ ഒരു ബഹുനില കെട്ടിടത്തില് നടന്ന അവിശ്വസനീയമായ രക്ഷപ്പെടല് വാര്ത്തയാണ് ഇപ്പോള് ലോകത്തെ അമ്പരപ്പിക്കുന്നത്. സ്വന്തം മുറിക്കുള്ളില് അബദ്ധത്തില് കുടുങ്ങിപ്പോയ 89 വയസ്സുകാരി, സഹായത്തിനായി ആരെയും കാത്തുനില്ക്കാതെ കെട്ടിടത്തിന് പുറത്തെ കൈവരികളിലൂടെ താഴേക്ക് ഇറങ്ങാന് തീരുമാനിക്കുകയായിരുന്നു. ഏകദേശം 50 മീറ്ററോളം ഉയരത്തില് നിന്ന് യാതൊരു സുരക്ഷാ സജ്ജീകരണങ്ങളുമില്ലാതെയാണ് അവര് ഈ സാഹസിക യാത്ര നടത്തിയത്.
27-ാം നിലയില് നിന്നാണ് മുത്തശ്ശി തന്റെ വായുവിലൂടെയുള്ള നടത്തം ആരംഭിച്ചത്. കെട്ടിടത്തിന് പുറത്തുള്ള എയര് കണ്ടീഷണറുകളുടെ മെറ്റല് കൈവരികളില് പിടിച്ച് അവര് ഓരോ നിലകളായി താഴേക്ക് ഇറങ്ങി. 26ാം നിലയില് എത്തിയപ്പോഴാണ് ഒരു ശുചീകരണ തൊഴിലാളിയും സെക്യൂരിറ്റി ഗാര്ഡും ഈ കാഴ്ച കണ്ട് ഞെട്ടിയത്. ഉടന് തന്നെ അവര് പോലീസിനെ വിവരമറിയിക്കുകയും മുത്തശ്ശിയോട് അവിടെത്തന്നെ നില്ക്കാന് ആവശ്യപ്പെടുകയും ചെയ്തു.
അഗ്നിശമന സേനാംഗങ്ങള് എത്തുമ്പോഴേക്കും മുത്തശ്ശി 21-ാം നില വരെ എത്തിക്കഴിഞ്ഞിരുന്നു. ഇത്രയും ഉയരത്തില് നിന്ന് താഴേക്ക് വീഴാനുള്ള സാധ്യത കണക്കിലെടുത്ത് രക്ഷാപ്രവര്ത്തകര് അതീവ ജാഗ്രതയോടെയാണ് നീങ്ങിയത്. പുറംഭാഗത്തുകൂടി അവരെ സമീപിക്കുന്നത് അപകടമാണെന്ന് കണ്ട സേനാംഗങ്ങള്, കെട്ടിടത്തിനുള്ളില് നിന്ന് എയര് കണ്ടീഷണര് പ്ലാറ്റ്ഫോമിന് സമീപത്തെ കൈവരികള് മുറിച്ചുമാറ്റി അവരെ സുരക്ഷിതമായി അകത്തേക്ക് എത്തിക്കുകയായിരുന്നു.
89-ാം വയസ്സിലും കാണിച്ച ഈ അസാമാന്യ മനോധൈര്യത്തെയും ശാരീരികക്ഷമതയെയും അമ്പരപ്പോടെയാണ് സോഷ്യല് മീഡിയ നോക്കിക്കാണുന്നത്. 27ാം നിലയില് നിന്ന് 21ാം നില വരെ ആറ് നിലകളാണ് അവര് പുറം ഭിത്തിയിലൂടെ മാത്രം സഞ്ചരിച്ചത്. ഇത്രയും അപകടകരമായ സാഹസികതയ്ക്കിടയിലും നിസാര പരിക്കുകള് പോലും ഏല്ക്കാതെ മുത്തശ്ശി രക്ഷപ്പെട്ടത് ഒരു അത്ഭുതമായാണ് അധികൃതര് വിശേഷിപ്പിക്കുന്നത്.
