അഭിനയത്തിനപ്പുറം കരുണയുടെയും സ്നേഹത്തിന്റെയും പര്യായമാണ് സീമ ജി നായര്. സിനിമ സീരിയല് രംഗത്ത് സജീവമായ സീമ താരജാഡകളില്ലാത്ത ഒരു താരം കൂടിയാണ്. നാടകത്തില് നിന്ന് സിനിമയിലേക്കെത്തിയ താരം പിന്നീട് കൂടുതല് സജീവമായത് സീരിയല് രംഗത്താണ്. കുടുംബപ്രേക്ഷകര്ക്ക് ചിരപരിചിതയാണ് താരം.
ജീവകാരുണ്യ പ്രവർത്തനങ്ങൾക്ക് മുന്നിൽ നിൽക്കുന്ന താരം നിരവധി പേര്ക്ക് സഹായഹസ്തമായി മാറിയിട്ടുണ്ട്. ക്യാൻസർ രോഗികൾക്ക് വേണ്ടി സീമ നടത്തുന്ന പ്രവർത്തനങ്ങൾ മാത്രമല്ല നിരവധി രോഗികൾക്ക് താങ്ങായും തണലായും സീമ സജീവമാണ്.
സോഷ്യല് മീഡിയയിലും സജീവമാണ് താരം. സാമൂഹിക പ്രസക്തിയുള്ള വിഷയങ്ങളില് പ്രതികരിക്കുന്നതിന്റെ പേരില് ചിലപ്പോഴൊക്കെ സൈബര് മീഡിയ അറ്റാക്കും താരം നേരിടാറുണ്ട്. ഫെയ്സ്ബുക്കില് വരുന്ന നെഗറ്റീവ് കമന്റുകള്ക്ക് കുറിക്കു കൊള്ളുന്ന മറുപടി നല്കിയും താരം പ്രതികരിക്കാറുണ്ട്.
ഇപ്പോഴിതാ താൻ ഏറെക്കാലമായി കരുതി കൊണ്ടുവരുന്ന ഇഷ്ടപ്പെട്ട ഒരു വ്യക്തിയുടെ അവസ്ഥ തുറന്നു പറയുകയാണ് സീമ ജി നായർ. കഴിഞ്ഞ കുറേ ദിവസങ്ങളായി തനിക്ക് അത്ര ശുഭകരമായ ദിവസമല്ലെന്നും ശരണ്യയെ പോലെ നന്ദുവിനെ പോലെ സുരേഷിനെ പോലെ തന്റെ നെഞ്ചോട് ചേർത്ത് നിർത്തി ഒരാളുടെ ജീവനുവേണ്ടി പോരാടുകയായിരുന്നെന്നും സീമ കുറിക്കുന്നു. ആ പ്രതീക്ഷകൾ അസ്തമിക്കുന്നത് പോലെയുള്ള അറിയിപ്പോളാണ് വരുന്നത് എല്ലാം ഉൾക്കൊള്ളണം എന്നാണ് ഡോക്ടർമാരും പറയുന്നതെന്നും താരം കുറിക്കുന്നു.
‘‘ശുഭദിനം...
കഴിഞ്ഞകുറെ ദിവസങ്ങൾ ആയി എനിക്കത്ര ശുഭദിനം അല്ല ...ശരണ്യയെ പോലെ ,നന്ദുനെ പോലെ, സുരേഷിനെപോലെ, അഥീനയെപോലെ, എന്റെ നെഞ്ചോടു ചേർത്ത് നിർത്തി ഒരാളുടെ ജീവന് വേണ്ടി പോരാടിക്കൊണ്ടിരുന്നു, കഴിഞ്ഞ രണ്ടു വർഷമായി ആരെയും അറിയിക്കാതെ ആയിരുന്നു ആ പോരാട്ടം, പക്ഷേ പ്രതീക്ഷകൾ അസ്തമിക്കുന്ന പോലെ അറിയിപ്പുകൾ വരുന്നു... അതുൾകൊണ്ട് തുടങ്ങണം എന്ന് ഡോക്ടർമാർ പറയുമ്പോളും ഉൾകൊള്ളാൻ ആവാതെ, ഞാനും, അവന്റെ അമ്മയും, സഹോദരനും നിൽക്കുന്നു...വിധി എങ്ങനെ വരും എന്നറിയാതെ...’’ എന്നാണ് സീമ ജി നായര് കുറിക്കുന്നത്. എന്നാൽ ആരാണ് ഗുരുതരാവസ്ഥയിലെന്ന് സീമ വ്യക്തമാക്കിയിട്ടില്ല. രോഗികൾക്ക് പണം സ്വരൂപീച്ച് നൽകുന്നതിനപ്പുറം ഇവരുമായി മാനസികമായി അടുക്കുന്ന വ്യക്തിയാണ് സീമ. അത് താരത്തിന്റെ പോസ്റ്റുകളിലൂടെ ആരാധകര് പലപ്പോഴും മനസ്സിലാക്കിയിട്ടുണ്ട്. പോസ്റ്റിനു താഴെ നിരവധി പേരാണ് ആശ്വാസവാക്കുകളും പ്രാര്ത്ഥനകളും കമന്റുകളിലൂടെ കുറിക്കുന്നത്.
