മലപ്പുറം: ഒന്പതുപേരുടെ മരണത്തിനിടയാക്കിയ വാല്പ്പാറയിലെ അപകടത്തില് വാഹനമോടിച്ചതാരെന്ന് സ്ഥിരീകരിക്കാന് ഗതാഗത വകുപ്പും പോലീസും. അപകടം നടക്കുന്ന സമയം വാഹനം ഓടിച്ചിരുന്നത് ടെമ്പോ ട്രാവലര് ഡ്രൈവറല്ലെന്ന സ്ഥിരീകരിക്കാത്ത വിവരത്തിന്റെ അടിസ്ഥാനത്തിലാണ് അന്വേഷണം.
യാത്രാസംഘത്തിലുണ്ടായിരുന്ന സ്കൂള് വാന് ഡ്രൈവര് നൗഷാദാ(39)ണ്അപകടസമയം വാഹനമോടിച്ചതെന്നാണ് അന്വേഷണ സംഘത്തിനു ലഭിച്ച പ്രാഥമികവിവരം. 16-ാം വളവില് സെല്ഫിയെടുക്കാന് വാഹനം നിര്ത്തിയശേഷം ടെമ്പോ ട്രാവലര് ഡ്രൈവര് മുഹമ്മദ് ഫാഹിസി(21) നു പകരമാണ് നൗഷാദ് വളയം പിടിച്ചത്. ദൃക്സാക്ഷികളില്നിന്നും രക്ഷാപ്രവര്ത്തനം നടത്തിയവരില് നിന്നും ലഭിച്ച വിവരത്തിന്റെ അടിസ്ഥാനത്തിലാണ് ഈ നിഗമനം. കോയമ്പത്തൂര് മെഡിക്കല് കോളജ് ആശുപത്രിയില് തീവ്രപരിചരണ വിഭാഗത്തില് ഗുരുതരാവസ്ഥയില് ചികിത്സയിലുള്ള നൗഷാദിന്റെ മൊഴിയെടുത്ത ശേഷമായിരിക്കും ഇതുസംബന്ധിച്ച് ഔദ്യോഗിക സ്ഥിരീകരണം. മുഹമ്മദ് ഫാഹിസും കോയമ്പത്തൂരിലെ ആശുപത്രിയില് ചികിത്സയിലാണ്.
ഇന്നലെ തമിഴ്നാട്, കേരള മോട്ടോര് വാഹനവകുപ്പുകള് അപകടസ്ഥലത്ത് സംയുക്തമായി പരിശോധന നടത്തി. 13-ാം വളവില് വാന് വലതുവശം ചേര്ന്നാണ് പോയതെന്നും നിയന്ത്രണം വിട്ട് സംരക്ഷണ ഭിത്തിയിലിടിച്ചതായും കോയമ്പത്തൂര് ആര്.ടി.ഒയുടെ റിപ്പോര്ട്ടിലുണ്ട്. താഴേക്കു പതിക്കുന്നതിനിടെ പാറക്കെട്ടില് വാഹനമിടിച്ചു. ഈ സമയം വാഹനത്തില്നിന്നു തെറിച്ചുവീണവരാണ് രക്ഷപ്പെട്ടത്. വാനിന്റെ ബ്രേക്കിന് തകരാര് സംഭവിച്ചിട്ടുണ്ടാകാനുള്ള സാധ്യതയും ഉദ്യോഗസ്ഥര് പരിശോധിക്കുന്നുണ്ട്.
