വ്യത്യസ്തതയ്ക്ക് വേണ്ടി എന്തും ചെയ്യാന് മടിക്കാത്ത പ്രീവെഡ്ഡിങ് ഷൂട്ടുകളുടെ കാലമാണിത്. എന്നാല് അത്തരമൊരു പരീക്ഷണം പാളിപ്പോയതിന്റെ ദൃശ്യങ്ങളാണ് ഇപ്പോള് സമൂഹമാധ്യമങ്ങളെ പൊട്ടിച്ചിരിപ്പിക്കുന്നത്. ആഴം കുറഞ്ഞ ഒരു ചെളിക്കുളത്തില് കിടന്ന് പ്രണയരംഗങ്ങള് ചിത്രീകരിക്കുന്ന വധൂവരന്മാരുടെ വീഡിയോയാണിത്. ഒരു വൈല്ഡ് ലൈഫ് ഫോട്ടോഗ്രാഫര് വെഡ്ഡിങ് ഷൂട്ട് ചെയ്താല് ഇങ്ങനെയിരിക്കും എന്നാണ് വീഡിയോ കണ്ടവരില് പലരും പരിഹസിക്കുന്നത്.
വൈറലാകുന്ന വീഡിയോയില് സിനിമാറ്റിക് സ്റ്റൈലില് വളരെ ഗൗരവത്തോടെ ചെളിയില് കിടന്ന് പോസ് ചെയ്യുന്ന ദമ്പതികളെയാണ് കാണുന്നത്. ഡ്രോണ് ഷോട്ടുകള് ഉള്പ്പെടെ ഉപയോഗിച്ച് വലിയൊരു ദൃശ്യവിരുന്നാണ് ഫോട്ടോഗ്രാഫര്മാര് ലക്ഷ്യമിട്ടതെങ്കിലും സംഭവം പാളിപ്പോയി. പശ്ചാത്തലത്തിലെ വൃത്തിഹീനമായ ചെളിക്കുളം വീഡിയോയുടെ ഭംഗി പൂര്ണ്ണമായും കളഞ്ഞുവെന്നാണ് ഭൂരിഭാഗം പേരുടെയും അഭിപ്രായം. പലരും ഇതിനെ െ്രെകം പട്രോള് എപ്പിസോഡിന്റെ ഷൂട്ടിംഗിനോടാണ് ഉപമിച്ചത്.
വീഡിയോ വൈറലായതോടെ സോഷ്യല് മീഡിയയില് ട്രോളുകളുടെ പെരുമഴയാണ്. 'ടൈറ്റാനിക് ഗംഗ്നം സ്റ്റൈലിനെ കണ്ടുമുട്ടിയപ്പോള്' എന്നും 'റൊമാന്റിക് രംഗം ഉദ്ദേശിച്ചു, പക്ഷേ എടുത്തുവെച്ചത് നാടകം' എന്നുമൊക്കെയാണ് ആളുകളുടെ കമന്റുകള്. എന്തിനാണ് പണം പാഴാക്കി ഇത്തരം റിസ്കുകള് എടുക്കുന്നതെന്നും, എഐ ഉപയോഗിച്ച് ഇതിലും മികച്ച രീതിയില് എഡിറ്റ് ചെയ്തുകൂടെയെന്നും ചോദിക്കുന്നവരും കുറവല്ല.
മുന്കാലങ്ങളില് കടല്ത്തീരങ്ങളും പാര്ക്കുകളുമായിരുന്നു ഷൂട്ടിംഗിനായി തിരഞ്ഞെടുത്തിരുന്നത്. എന്നാല് ഇന്ന് ഏതുവിധേനയും ശ്രദ്ധ പിടിച്ചുപറ്റാനുള്ള ശ്രമങ്ങളാണ് ഇത്തരം വിചിത്രമായ പരീക്ഷണങ്ങളിലേക്ക് നയിക്കുന്നത്.
Pre Wedding Shoots are getting too weird 😂😂 pic.twitter.com/xhVKjoZrVy
— Rosy (@rose_k01) March 18, 2026
