മേഘാലയ ഒരു 'തട്ടിപ്പ് സംസ്ഥാനമാണെന്ന' വിദേശ വിനോദ സഞ്ചാരിയുടെ പരാമര്ശം വൈറലാകുന്നു. ലൂയിസ് പുള്മാന് എന്ന വിദേശ യുവാവിന്റെ ഈ പരാമര്ശം കേട്ട് ആദ്യം ഞെട്ടിയത് അവിടുത്തെ നാട്ടുകാരാണ്. എന്നാല് വീഡിയോ കണ്ടു കഴിഞ്ഞപ്പോള് സോഷ്യല് മീഡിയയില് ചിരി പടരുകയാണ്. മേഘാലയയിലെ കാഴ്ചകള് അത്രമേല് മനോഹരമാണെന്നും അവിടുത്തെ സ്നേഹക്കൂടുതല് കൊണ്ട് തനിക്ക് കഷ്ടപ്പെടാന് പോലും പറ്റിയില്ലെന്നും പുകഴ്ത്താനാണ് താരം ഇത്തരമൊരു തലക്കെട്ട് വീഡിയോയ്ക്ക് നല്കിയത്.
റോഡരികില് അല്പനേരം മാറി നിന്നാല് പോലും അവിടുത്തെ ആളുകള് സഹായവുമായി എത്തുമെന്നാണ് ലൂയിസ് പറയുന്നത്. 'പോകുന്ന വണ്ടികളെല്ലാം നിര്ത്തി ലിഫ്റ്റ് വേണോ എന്ന് ചോദിക്കും, ആരും ഒറ്റയ്ക്ക് നില്ക്കാന് സമ്മതിക്കില്ല' എന്ന് അദ്ദേഹം തമാശയായി പരിഭവപ്പെടുന്നു. ഈ അത്ഭുതകരമായ ആതിഥ്യമര്യാദ കാരണം താന് പ്രതീക്ഷിച്ച 'ബുദ്ധിമുട്ടുകള്' ഒന്നും അനുഭവിക്കാന് സാധിച്ചില്ലെന്നാണ് ലൂയിസിന്റെ പക്ഷം.
താന് ഇതുവരെ കണ്ടതില് വെച്ച് ഏറ്റവും സുന്ദരമായ നാടാണ് മേഘാലയ എന്ന് പറഞ്ഞാണ് ലൂയിസ് വീഡിയോ അവസാനിപ്പിക്കുന്നത്. ഇത്രയും വലിയൊരു സ്വര്ഗ്ഗത്തെക്കുറിച്ച് ലോകം അധികം സംസാരിക്കാത്തതാണ് ഏറ്റവും വലിയ 'തട്ടിപ്പ്' എന്ന് ലൂയിസ് പറയാതെ പറഞ്ഞു വയ്ക്കുന്നു. ഈ വീഡിയോ വൈറലായതോടെ മേഘാലയയിലെ മനുഷ്യരുടെ സ്നേഹത്തെയും ലാളിത്യത്തെയും പ്രശംസിച്ച് നിരവധി പേരാണ് കമന്റുകളുമായി എത്തുന്നത്.
