പ്രശസ്ത പിന്നണി ഗായിക എസ് ജാനകിക്ക് പിറന്നാള് ആശംസകള് നേര്ന്ന് സുജാത മോഹന്. സംഗീതത്തിന്റെ ദേവത എന്നാണ് ഗായിക ജാനകിയമ്മയെ വിശേഷിപ്പിച്ചത്. സമൂഹമാധ്യത്തില് പങ്കുവെച്ച കുറിപ്പിലൂടെയായിരുന്നു സുജാതയുടെ ആശംസ.
‘സംഗീതത്തിന്റെ ദേവതയായ ജാനകിയമ്മയ്ക്ക് ജന്മദിനാശംസകള്. ദൈവം സന്തോഷവും സമാധാനവും നല്കി അനുഗ്രഹിക്കട്ടെ, എപ്പോഴും ആരോഗ്യത്തോടെയിരിക്കട്ടെ’ എന്നായിരുന്നു ജാനകിയമ്മയ്ക്കൊപ്പമുളള ചിത്രം പങ്കിട്ടുകൊണ്ട് സുജാത കുറിച്ചത്.
1957 ല് വിധിയിന് വിളയാട്ട് എന്ന തമിഴ് ചിത്രത്തിലൂടെയാണ് ജാനകിയമ്മ പിന്നണി ഗാനരംഗത്തേക്ക് എത്തിയത്. മലയാളം, തമിഴ്, തെലുങ്ക്, കന്നട, ഹിന്ദി തുടങ്ങി പതിനേഴോളം ഭാഷകളില് നിരവധി ഗാനങ്ങള് ആലപിച്ചിട്ടുണ്ട്. മിന്നുന്നതെല്ലാം പൊന്നല്ല എന്ന ചിത്രത്തിലൂടെയാണ് അവര് മലയാളത്തില് അരങ്ങേറ്റം കുറിച്ചത്.
നിരവധി പുരസ്കാരങ്ങള് ജാനകിയമ്മയെ തേടിയെത്തിയിരുന്നു. 2013-ല് രാജ്യം പത്മഭൂഷണ് പ്രഖ്യാപിച്ചെങ്കിലും, ദക്ഷിണേന്ത്യന് കലാകാരന്മാരോടുള്ള അവഗണനയില് പ്രതിഷേധിച്ച് അത് നിരസിച്ചത് വലിയ വാര്ത്തയായിരുന്നു. ഭാരതത്തിലെ ഒരുവിധം എല്ലാ ഭാഷകളിലും പാടിയ ജാനകിയമ്മ 2017ല് തന്റെ സംഗീത ജീവിതം ഔദ്യോഗികമായി അവസാനിപ്പിക്കുകയാണെന്ന് പ്രഖ്യാപിച്ചിരുന്നു.
