ഹൈദരാബാദ്: മുൻകൂട്ടി ലഭിച്ച വിവരത്തിന്റെ അടിസ്ഥാനത്തിൽ ഹൈദരാബാദിലെ വിവിധ ഇടങ്ങളിൽ നടത്തിയ പരിശോധനയിൽ മായം ചേർത്ത 3,000 കിലോ തേയില പിടിച്ചെടുത്തു. ഹൈദരാബാദ് ഫുഡ് അഡൽറ്ററേഷൻ സർവൈലൻസ് ടീമാണ് പരിശോധന നടത്തിയത്.
അസം ഉൾപ്പെടെയുള്ള സംസ്ഥാനങ്ങളിലെ തേയിൽ തോട്ടങ്ങളിൽ നിന്നും ഫാക്ടറികളിൽ നിന്നും ശേഖരിക്കുന്ന കാലാവധി കഴിഞ്ഞ തേയില മായം ചേർത്ത് നിറം വർദ്ധിപ്പിച്ച് പുതിയ ബ്രാൻഡ് ആയി പായ്ക്ക് ചെയ്ത് വിൽപ്പന നടത്തുന്ന 15 സംഘങ്ങളെയാണ് പിടികൂടിയത്. സൺസെറ്റ് യെല്ലോ എഫ്സിഎഫ്, ടാർട്രാസിൻ തുടങ്ങിയ കൃത്രിമ നിറങ്ങളും ശർക്കരപ്പാനിയും പഴയ തേയിലയും കൂട്ടിക്കലർത്തിയായിരുന്നു അനധികൃത വ്യാപാരം നടത്തിയിരുന്നതെന്ന് അധികൃതർ വ്യക്തമാക്കി.
ഇത്തരം തേയിലയുടെ ഉപയോഗത്തിലൂടെ ഉദരസംബന്ധമായ പ്രശ്നങ്ങൾ, അലർജി, ദീർഘകാലം നിലനിൽക്കുന്ന മറ്റ് ആരോഗ്യപ്രശ്നങ്ങൾ എന്നിവ ഉണ്ടായേക്കാം.
ഏകദേശം 3,000 കിലോഗ്രാം മായം ചേർത്ത തേയില, 1,500 കിലോഗ്രാം പഴകിയ തേയില, 100 കിലോഗ്രാം ശർക്കര എന്നിവ അധികൃതർ പിടിച്ചെടുത്തിട്ടുണ്ട്. കുറ്റക്കാർക്കെതിരെ ഭക്ഷ്യസുരക്ഷാ നിയമം അനുസരിച്ച് നടപടി സ്വീകരിക്കുമെന്ന് പൊലീസ് അധികൃതർ അറിയിച്ചു.
