കൊച്ചി : എല്നിനോ, ഇന്ത്യന് ഓഷ്യന് ഡൈപോള്(ഐ.ഒ.ഡി.) എന്നീ കാലാവസ്ഥാ പ്രതിഭാസങ്ങള് വരാനിരിക്കുന്ന മണ്സൂണിനെ ബാധിക്കും. പസഫിക് സമുദ്രവും അതിന്റെ ഉപരിതല അന്തരീക്ഷവും ചൂടുപിടിക്കുന്ന എല്നിനോ പ്രതിഭാസംമൂലം ഇക്കുറി മണ്സൂണ് മഴ കുറയുമെന്നാണ് പ്രാഥമിക അനുമാനം. അതേസമയം, അറബിക്കടലില് ഇന്ത്യന് ഓഷ്യന് ഡൈപോള് എന്ന മഴ അനുകൂല കാലാവസ്ഥാ സാഹചര്യം ഈ മഴക്കുറവ് പരിഹരിക്കുമെന്നും ഗവേഷകര് സൂചന നല്കുന്നു.
ഇക്കുറി രാജ്യമൊട്ടാകെ മണ്സൂണ് ദീര്ഘകാല ശരാശരിയുടെ 92 ശതമാനം മഴ പെയ്യുമെന്നാണ് നിഗമനം. ഇതു പൊതുവേ ദുര്ബലമായ മണ്സൂണ് സീസണിലേക്കാണ് വിരല്ചൂണ്ടുന്നത്. എന്നാല്, വിവിധ കാരണങ്ങളാല് കേരളത്തില് മണ്സൂണ് ഭേദപ്പെടാന് സാധ്യതയുണ്ടെന്നും കാലാവസ്ഥാ നിരീക്ഷകര് പറയുന്നു. എല്നിനോ നിലവില് നിര്വീര്യമായ അവസ്ഥയിലാണെങ്കിലും മേയ് മാസത്തോടെ സജീവമാകാനുള്ള സാധ്യതയുണ്ട്. ഇതിന്റെ ഫലമായി മണ്സൂണിനു മുന്നോടിയായി ഈ മാസം അവസാനവും മേയ് ആദ്യവും പ്രീ മണ്സൂണ് വേനല് മഴയുണ്ടാകും.
ഇത് അത്യുഷ്ണത്തിന് താല്ക്കാലിക ശമനമേകും. മേയില് എല്നിനോയുടെ സ്വാധീനത്തില് വടക്കേന്ത്യയില് കടുത്ത ചൂട് ഉണ്ടാകും. അതേസമയം, കേരളത്തില് ശക്തമായ ഒറ്റപ്പെട്ട മഴയും മിന്നലുമുണ്ടാകും. പെട്ടെന്നു രൂപപ്പെടുന്ന കൂമ്പാരമേഘങ്ങള് ഇടിമിന്നലിനും കനത്തകാറ്റിനും ഇടയാക്കും. വേനല്മഴയില് കനത്ത നാശനഷ്ടങ്ങള്ക്കും സാധ്യതയുണ്ട്. നിലവിലെ സാഹചര്യങ്ങള് പ്രകാരം, ജൂലൈ മാസത്തില് എല്നിനോ പൂര്ണതോതില് രൂപമെടുക്കും.
ഇതിന്റെ ഫലമായി ഓഗസ്റ്റ്, സെപ്റ്റംബര് മാസങ്ങളില് മണ്സൂണ് മഴകുറയും. കേരളത്തിലെ മണ്സൂണിനെ അറബിക്കടല്, ബംഗാള് ഉള്ക്കടല് എന്നിവിടങ്ങളില്നിന്നുള്ള സമുദ്ര വായുപ്രവാഹം സ്വാധീനിക്കുന്നതുമൂലം ഇക്കാലത്ത് കാലവര്ഷത്തില് വലിയ കുറവുണ്ടാകില്ല. മണ്സൂണ് അവസാനിക്കുന്ന സെപ്റ്റംബര് മാസത്തില് ഇന്ത്യന് ഓഷ്യന് ഡൈപോള്(ഐ.ഒ.ഡി.) രൂപപ്പെട്ടാല് മഴ കൂടും.
