ഇന്ത്യൻ സിനിമയിൽ തന്നെ വലിയ രീതിയിൽ നിരൂപക പ്രശംസ നേടിയ ചിത്രമായിരുന്നു മോഹന്ലാല്- ജീത്തു ജോസഫ് കൂട്ടുകെട്ടിലിറങ്ങിയ ദൃശ്യം. മലയാളത്തിലെ ത്രില്ലര് സിനിമകള്ക്ക് ഒരു ബെഞ്ച് മാര്ക്ക് നല്കിയ ഈ സിനിമയുടെ ആദ്യഭാഗം ഗംഭീര വിജയമായിരുന്നു. കോവിഡ് കാലത്ത് ഒടിടിയിലൂടെ എത്തിയ രണ്ടാം ഭാഗവും പ്രതീക്ഷകള് തെറ്റിക്കാതെ ബ്ലോക്ക്ബസ്റ്റര് ഹിറ്റായി മാറി. അന്നുമുതല് ദൃശ്യം 3 നായി ആകാംക്ഷയോടെയാണ് ആരാധകര് കാത്തിരിക്കുന്നത്. ഇതിന്റെ ഓരോ അപ്ഡേറ്റുകളും പ്രേക്ഷകരുടെ ആവേശവും ആകാംക്ഷയും കൂട്ടുന്നുണ്ട്.
മോഹന്ലാലിനൊപ്പം മീന, അൻസിബ ഹസൻ, ആശാ ശരത്, സിദ്ദിഖ്, എസ്തർ അനിൽ തുടങ്ങിയവരായിരുന്നു ചിത്രത്തിലെ പ്രധാന അഭിനേതാക്കൾ. മോഹൻലാലിന്റെ ജന്മദിനത്തോടനുബന്ധിച്ച് മേയ് 21 നാണ് ദൃശ്യം 3 യുടെ റിലീസ്. ചിത്രത്തിന്റെ പ്രൊമോഷന് തിരക്കിലാണ് താരങ്ങളെല്ലാം.
ഇപ്പോഴിതാ സിനിമയില് മോഹന്ലാലിന്റെ മകളായി ഫ്രാഞ്ചെയ്സിയില് എത്തുന്ന എസ്തര് അനില്, മോഹന്ലാലിന്റെ അഭിനയമികവ് കണ്ട് അത്ഭുതപ്പെട്ടു പോയി എന്നു പറയുകയാണ്. തമിഴ്, തെലുങ്ക്, ഹിന്ദി, കന്നഡ തുടങ്ങിയ ഭാഷകളിലേക്ക് ചിത്രം റീമേക്ക് ചെയ്തപ്പോഴും മകളായി എത്തിയത് എസ്തര് തന്നെയായിരുന്നു. ആദ്യഭാഗത്തുള്ള ഒരു സീനില് മോഹന്ലാല് അഭിനയിച്ചതിനെക്കുറിച്ചാണ് എസ്തര് പറഞ്ഞത്.
‘‘ഇന്ററോഗേഷന്റെ സമയത്ത് അതായത് സഹദേവൻ വന്ന് ചവിട്ടുന്ന ഒരു സീനുണ്ട്. ചവിട്ടുന്ന സമയത്ത് ഇതു കണ്ട് മക്കളപ്പുറത്ത് വിഷമത്തിലാണ്, റാണി ടെന്ഷനിലാണ്. ചവിട്ട് കൊണ്ട് താഴെ വീണ ശേഷം എഴുന്നേറ്റിട്ട് ലാലങ്കിള് തിരിഞ്ഞു അവരെ നോക്കി ഒരു ചിരി ചിരിക്കും, ‘കുഴപ്പമില്ല’ എന്നുള്ള പോലെ. ദാറ്റ് ഈസ് ഹാർട്ട് ബ്രേക്കിംഗ്. അത് വളരെ വിഷമമുള്ള ഒരു ഷോട്ടാണ്. ഒരൊറ്റ ഷോട്ടേയുള്ളൂ അതിനകത്ത് ഒരുപാടൊന്നും ചെയ്യുന്നില്ല. സഹദേവൻ വന്ന് ഇടിക്കുന്നു, ഇതു ചെയ്യുന്നു, അപ്പോ പുള്ളി ഇങ്ങനെ നോക്കിയിട്ട് ഇങ്ങനെ ‘ആ കുഴപ്പമില്ല’ എന്നുള്ള ഒരു രീതിയില്... ഇറ്റ്സ് വെരി വെരി ഇന്റെൻസ് സീന്.
ഞാൻ എന്തുകൊണ്ടാ അത് ഓർത്തിരിക്കുന്നത് എന്ന് വെച്ചിട്ടുണ്ടെങ്കിൽ ഇതുതന്നെ നമ്മൾ തെലുങ്കിലും റീമേക്ക് ചെയ്തു. അപ്പോ ശ്രീപ്രിയ ഗാരുവായിരുന്നു അത് ഡയറക്ട് ചെയ്തിരുന്നത്. അപ്പോ പറഞ്ഞു വെങ്കി ഇങ്ങനെയാണ് ഷോട്ട്, ഇവർ വന്ന് ഇടിക്കും, അപ്പോ ഇങ്ങനെ തിരിഞ്ഞിട്ട് ചിരിക്കുക. അപ്പോ വെങ്കി അങ്കിൾ പറഞ്ഞു, ‘അമ്മാ അത് പണ്ണ മുടിയാത് (അത് ചെയ്യാൻ കഴിയില്ല), ഒൺലി മോഹൻലാൽ കാൻ ഡൂ ഇറ്റ്’ എന്ന് പറഞ്ഞു. വെങ്കിടേഷ് ഒരു സൂപ്പർസ്റ്റാറായതിനാൽ മറ്റൊരു നടനെ അംഗീകരിക്കുന്നതും മികച്ചതാണെന്ന് പറയുന്നതിനും ഒരു മടിയുമില്ലായിരുന്നു. ‘മോഹൻലാലിന് മാത്രമേ അത് ചെയ്യാൻ കഴിയൂ’ എന്ന് അദ്ദേഹം പറഞ്ഞു, ‘അത് എന്നെക്കൊണ്ട് പറ്റില്ല, അത് വേറെ ആരെക്കൊണ്ട് പറ്റുമെന്ന് അറിയില്ല. ബിിക്കോസ് അത്രയും സിമ്പിളായിട്ടുള്ള ഒരു ജെസ്റ്ററാണ്. പക്ഷേ അത് പുള്ളിക്ക് മാത്രമേ ചെയ്യാന് കഴിയൂ... യൂ ഹാവ് ടു ഗിവ് ഇറ്റ് ടു മോഹൻലാൽ’ എന്ന്. അത്രയ്ക്കും ഓര്ത്തിരിക്കുന്ന സീനാണത്...’’ എന്നാണ് എസ്തര് പറഞ്ഞത്.
എസ്തറിന്റെ വാക്കുകള് ഏറ്റെടുക്കുകയാണ് ആരാധകര്. നിരവധി കമന്റുകളാണ് വീഡിയോയ്ക്ക് താഴെ നിറയുന്നത്. ലാലേട്ടന് മാത്രമേ ഇങ്ങനെയൊരു വേഷം ചെയ്യാൻ കഴിയൂ, എന്നും ഒരേയൊരു മോഹൻലാൽ, എൽ എന്നാൽ അഭിനയത്തിന്റെ ദൈവം- ആർക്കും തകർക്കാൻ കഴിയില്ല എന്നാണ് അർത്ഥമാക്കുന്നത്, ലാലേട്ടന്റെ എക്സ്പ്രഷൻ ഒരിക്കലും ആര്ക്കും അനുകരിക്കാനാവില്ല, ലോകത്തിലെ മറ്റ് നടന്മാരിൽ നിന്ന് വ്യത്യസ്തനാണ് മോഹൻലാൽ... കംപ്ലീറ്റ് ആക്ടർ...’ എന്നതടക്കമാണ് കമന്റുകള്.
ഇക്കഴിഞ്ഞ ദിവസം റിലീസിന് ആഴ്ചകൾ മാത്രം ബാക്കി നിൽക്കെ ദൃശ്യത്തിന്റെ പുതിയ പോസ്റ്റർ ആരാധകരുമായി മോഹന്ലാലും അണിയറപ്രവര്ത്തകരും പങ്കിട്ടിരുന്നു. മുൻപ് പുറത്തുവിട്ട പോസ്റ്ററുകളിൽ നിന്ന് വ്യത്യസ്തമായി ഗൗരവത്തിലാണ് കഥാപാത്രങ്ങളെല്ലാം പോസ്റ്ററിൽ പ്രത്യക്ഷപ്പെടുന്നത്. മോഹൻലാൽ സോഷ്യൽ മീഡിയയിലൂടെയും പോസ്റ്റർ പങ്കുവച്ചിട്ടുണ്ട്. 2013-ലാണ് ദൃശ്യത്തിന്റെ ആദ്യഭാഗം പുറത്തിറങ്ങിയത്. തിയേറ്ററുകളിൽ സൂപ്പർഹിറ്റായി മാറിയ ചിത്രത്തിന്റെ രണ്ടാം ഭാഗം ദൃശ്യം - ദി റിസംഷന് എന്ന പേരിൽ 2021 ലാണ് എത്തിയത്. മൂന്നാം ഭാഗം പ്രഖ്യാപിച്ചതു മുതൽ വലിയ പ്രതീക്ഷയിലാണ് മോഹൻലാൽ ആരാധകരും ഒപ്പം സിനിമ പ്രേമികളും.
