പ്രവാസലോകത്തേക്ക് ചേക്കേറുന്നവര്‍ പലപ്പോഴും നേരിടുന്ന ഏറ്റവും വലിയ നഷ്ടം കുടുംബത്തോടൊപ്പമുള്ള മനോഹരമായ നിമിഷങ്ങളാണ്. ഇതുമായി ബന്ധപ്പെട്ട് ഒരു പോസ്റ്റ് പങ്കുവച്ചിരിക്കുകയാണ് അയര്‍ലന്‍ഡിലെ ഡബ്ലിനില്‍ താമസിക്കുന്ന പ്രാചി ദുസാദ് എന്ന യുവതി. ഇന്‍സ്റ്റഗ്രാമില്‍ പങ്കുവെച്ച വീഡിയോ ഇപ്പോള്‍ പ്രവാസികള്‍ക്കിടയില്‍ വലിയ ചര്‍ച്ചയാകുകയാണ്. വിദേശത്തെ ജീവിതച്ചെലവ് എന്നത് വെറും വാടകയോ ബില്ലുകളോ മാത്രമല്ലെന്ന് പ്രാചി തന്റെ വീഡിയോയിലൂടെ ഓര്‍മ്മിപ്പിക്കുന്നു.
നാട്ടില്‍ നടന്ന തന്റെ കസിന്റെ വിവാഹാഘോഷത്തില്‍ പങ്കെടുക്കാന്‍ കഴിയാത്തതിന്റെ സങ്കടമാണ് പ്രാചി പങ്കുവെച്ചത്. കുടുംബം മുഴുവന്‍ ഒത്തുചേര്‍ന്ന് പാട്ടുപാടിയും നൃത്തം ചെയ്തും ആഘോഷിക്കുമ്പോള്‍, താന്‍ മാത്രം അയര്‍ലന്‍ഡിലെ ഫ്‌ലാറ്റില്‍ ഒറ്റപ്പെട്ടുപോയതിന്റെ നിരാശ അവര്‍ വീഡിയോയില്‍ പ്രകടിപ്പിക്കുന്നു. ഫാമിലി ഗ്രൂപ്പുകളില്‍ വരുന്ന ആഘോഷചിത്രങ്ങള്‍ കാണുമ്പോള്‍ അവിടെ ഇല്ലാത്തതിന്റെ വേദന തന്നെ അലട്ടുന്നുണ്ടെന്നും അവര്‍ പറയുന്നു.
കൈയില്‍ പണമുണ്ടായിട്ടും ചിലപ്പോഴൊക്കെ ജീവിതത്തിലെ പ്രധാന സന്തോഷങ്ങള്‍ ആസ്വദിക്കാനാകാത്ത അവസ്ഥ പ്രവാസികള്‍ക്കുണ്ടെന്ന് പ്രാചി ചൂണ്ടിക്കാട്ടുന്നു. ജോലിയും തിരക്കും മറ്റ് ഉത്തരവാദിത്തങ്ങളും കാരണം പലപ്പോഴും ഇത്തരം സവിശേഷ അവസരങ്ങളില്‍ നാട്ടിലെത്താന്‍ കഴിയാറില്ല. ജീവിതം പടുത്തുയര്‍ത്താനുള്ള ഓട്ടത്തിനിടയില്‍ പ്രിയപ്പെട്ടവര്‍ക്കൊപ്പമുള്ള നിമിഷങ്ങള്‍ ബലികഴിക്കേണ്ടി വരുന്നത് വലിയൊരു നഷ്ടം തന്നെയാണ്.
പ്രാചിയുടെ വീഡിയോയ്ക്ക് താഴെ സമാനമായ അനുഭവങ്ങള്‍ പങ്കുവെച്ച് നിരവധി പ്രവാസികളാണ് കമന്റുകളുമായി എത്തിയത്. വിദേശത്ത് താമസിക്കുമ്പോള്‍ ഇത്തരം കുടുംബ സംഗമങ്ങള്‍ നഷ്ടപ്പെടുന്നത് ഒരു വലിയ വേദനയാണെന്നും പ്രാചിയുടെ അവസ്ഥ തന്നെയാണ് തങ്ങള്‍ക്കുമുള്ളതെന്നും പലരും കുറിച്ചു. പ്രവാസജീവിതത്തിന്റെ തിളക്കത്തിനു പിന്നിലെ ഇത്തരം വിങ്ങലുകള്‍ ഈ വീഡിയോയിലൂടെ വീണ്ടും ചര്‍ച്ചയാകുകയാണ്.
Comments