പത്താം വിവാഹവാര്‍ഷികദിനത്തില്‍ ഭര്‍ത്താവ് കരണ്‍ സിംഗ് ഗ്രോവറിന് ഹൃദ്യമായ ആശംസകള്‍ നേര്‍ന്ന് കുറിപ്പ് പങ്കുവെച്ച് നടി ബിപാഷ ബസു. ലോകത്തിലെ ഏറ്റവും സ്‌നേഹനിധിയായ മനുഷ്യനോടൊപ്പമുളള പത്ത് വര്‍ഷത്തെ ആനന്ദകരമായ ജീവിതം എന്നാണ് ബിപാഷ കരണിനൊപ്പമുളള യാത്രയെ വിശേഷിപ്പിച്ചത്.
തങ്ങളുടെ ജീവിതത്തിലെ സുപ്രധാന നിമിഷങ്ങള്‍ കോര്‍ത്തിണക്കിയ ചിത്രങ്ങളും താരം സോഷ്യല്‍ മീഡിയയില്‍ പങ്കുവെച്ചിട്ടുണ്ട്. ‘ഏറ്റവും സ്‌നേഹനിധിയായ ഈ മനുഷ്യനോടൊപ്പമുളള പത്ത് വര്‍ഷത്തെ ആനന്ദം. എനിക്ക് ഏറ്റവും ആവശ്യമുളളത് എന്താണെന്ന് ദൈവത്തിന് അറിയാമായിരുന്നു. എന്റെ ജീവിതം പ്രണയത്തെയും ലാളിതയത്തെയും ചുറ്റിപ്പറ്റിയുളളതാണ്. ആ നിമിഷങ്ങള്‍, ജീവിതത്തിലെ കൊച്ചു കൊച്ചു സന്തോഷങ്ങള്‍, നീ ഞങ്ങളുടെ ജീവിതം എന്നും സന്തോഷം കൊണ്ട് നിറയ്ക്കുന്നു.
ഞങ്ങളുടേതായതിന് നന്ദി. ഞാനും ദേവിയുമാണ് ഏറ്റവും ഭാഗ്യവതികളായ പെണ്‍കുട്ടികള്‍. പത്താം മങ്കിവാര്‍ഷിക (Monkeyversary) ആശംസകള്‍’ ബിപാഷ കുറിച്ചു. മാതൃകപരമായ ദാമ്പത്യം പത്ത് വര്‍ഷം പിന്നിടുമ്പോള്‍ ആരാധകരും സഹപ്രവര്‍ത്തകരും ഉള്‍പ്പെടെ നിരവധി പേരാണ് ഈ താരദമ്പതികള്‍ക്ക് ആശംസകളുമായി എത്തുന്നത്.
2014-ല്‍ പുറത്തിറങ്ങിയ 'എലോണ്‍' എന്ന സിനിമയുടെ സെറ്റില്‍ വെച്ചാണ് ബിപാഷയും കരണും ആദ്യമായി കണ്ടുമുട്ടുന്നത്. സെറ്റില്‍ തുടങ്ങിയ സൗഹൃദം പെട്ടെന്നുതന്നെ പ്രണയമായി മാറി. രണ്ട് വര്‍ഷത്തെ പ്രണയത്തിന് ശേഷം 2016 ഏപ്രില്‍ 30-നാണ് ഇരുവരും വിവാഹിതരായത്. 2022-ല്‍ ഇവര്‍ക്ക് മകള്‍ ദേവി ജനിച്ചു.
Comments