സഹോദരന് ഓജസിന്റെ ജന്മദിനത്തില് വൈകാരിക കുറിപ്പ് പങ്കുവെച്ച് നടി യാമി ഗൗതം. നീ എപ്പോഴും എന്റെ കുഞ്ഞനിയനായിരിക്കും എന്നാണ് സഹോദരനോട് യാമി പറഞ്ഞത്.യാമിയുടെ ഭര്ത്താവും ധുരന്ധര് എന്ന ഹിറ്റ് ചിത്രത്തിന്റെ സംവിധായകനുമായ ആദിത്യ ധറും ഓജസിന് ആശംസകള് നേര്ന്ന് എത്തിയിരുന്നു. നീ ശരിക്കും സവിശേഷമായ ഒരാളാണ് എന്നാണ് ഓജസിനെക്കുറിച്ച് ആദിത്യ കുറിച്ചത്.
‘ഗൗതം കുടുംബത്തിലെ ഏറ്റവും തിളക്കമുളള വ്യക്തിക്ക് ജന്മദിനാശംസകള്. നിനക്ക് എപ്പോഴും വിവേകവും കഴിവും ദയയും ഉണ്ടാകട്ടെ എന്ന് ഞാന് പ്രാര്ഥിക്കുന്നു. നീ എന്നും എന്റെ പ്രിയപ്പെട്ട കുഞ്ഞനിയനായിരിക്കും’ എന്നാണ് യാമിയുടെ വാക്കുകള്. ഈ മനോഹരമായ കുറിപ്പിനൊപ്പം ഒരു കുടുംബചിത്രവും താരം പങ്കുവെച്ചിട്ടുണ്ട്. രണ്വീര് സിംഗ് ഉള്പ്പെടെയുളള പ്രമുഖതാരങ്ങള് ഈ പോസ്റ്റിന് താഴെ ഓജസിന് ആശംസകളുമായി എത്തിയിട്ടുണ്ട്.
ധുരന്ധറിന്റെ സെറ്റിൽ നിന്നുള്ള ചിത്രങ്ങൾക്കൊപ്പമായിരുന്നു ആദിത്യ ഹൃദയസ്പർശിയായ കുറിപ്പ് പങ്കുവെച്ചത്. ‘ഭാവിയില് ഒരു ഇതിഹാസമായി മാറാന് വിധിക്കപ്പെട്ട ആണ്കുട്ടിക്ക്, ഓജസ് ജന്മദിനാശംസകള്. നിനക്ക് എന്നും സ്നേഹവും ഭാഗ്യവും സന്തോഷവും ഉണ്ടാകട്ടെ എന്ന് ആശംസിക്കുന്നു. എപ്പോഴും തിളങ്ങിനില്ക്കൂ, നീ ശരിക്കും സവിശേഷമായ ഒരാളാണ്’ - ആദിത്യയുടെ വാക്കുകള്. .
22 കാരനായ ഓജസ് ധുരന്ധര് സിനിമയുടെ നിര്മ്മാണത്തില് നിര്ണ്ണായക പങ്ക് വഹിച്ചിട്ടുണ്ട്. ചിത്രത്തിന്റെ ആവേശകരമായ ട്രെയിലര് എഡിറ്റ് ചെയ്തത് ഓജസായിരുന്നു. ഉറക്കമില്ലാതെ 76 മണിക്കൂറോളം തുടര്ച്ചയായി ജോലി ചെയ്താണ് അവന് ട്രെയിലര് പൂര്ത്തിയാക്കിയതെന്ന് മുന്പ് ആദിത്യ ധര് വെളിപ്പെടുത്തിയിരുന്നു. 2020 മുതല് തന്റെ സിനിമാ യാത്രയില് താങ്ങായി കൂടെയുള്ള ഓജസിന്റെ കഠിനാധ്വാനമാണ് സിനിമയുടെ വിജയത്തിന് പിന്നിലെ ഒരു പ്രധാന ഘടകമെന്നും അദ്ദേഹം തുറന്നു പറഞ്ഞിരുന്നു.
