സമാന്തരസിനിമകളിലും കൊമേഴ്സ്യൽ സിനിമകളിലും ഒരുപോലെ തിളങ്ങുന്ന താരമാണ് ശബാന ആസ്മി. ചലച്ചിത്ര, ടെലിവിഷൻ, നാടക മേഖലകളില് തിളങ്ങി നില്ക്കുന്ന താരം മികച്ച നടിക്കുള്ള അഞ്ച് ദേശീയപുരസ്കാരങ്ങളും പത്മശ്രീ, പദ്മഭൂഷൺ എന്നീ നേട്ടങ്ങളും സ്വന്തമാക്കിയിട്ടുണ്ട്. സോഷ്യല് മീഡിയയിലും തിളങ്ങി നില്ക്കുന്ന താരമാണ് ശബാന.
ഇപ്പോഴിതാ വിക്കി കൗശലിനൊപ്പമുള്ള ഒരു ചിത്രത്തിനൊപ്പം ശബാന ആസ്മി പങ്കിട്ട പോസ്റ്റാണ് സോഷ്യല് മീഡിയ ആരാധകരെ പുഞ്ചിരിപ്പിക്കുന്നത്. രണ്ട് അഭിനേതാക്കളും ഒപ്പമുള്ള രസകരമായ ഫ്രെയിമിൽ, ശബാനയുടെ അരികിലിരിക്കുന്ന വിക്കിയുടെ മുഖം ബ്ലഷാകുന്നത് കാണാം. ശബാന എന്തോ പറയുന്നത് കേട്ടാണ് വിക്കി നാണിച്ചു ചിരിക്കുന്നത്.
വിക്കിക്കൊപ്പമുള്ള ഈ സന്തോഷകരമായ നിമിഷം പങ്കുവെച്ച ശബാന, വിക്കിയെ ടാഗ് ചെയ്തുകൊണ്ട് ചിത്രത്തിന് ‘‘ഞാൻ എന്താണ് പറഞ്ഞത്, നിങ്ങളെ എന്താണിത്ര നാണിപ്പിച്ചത്?...’’ എന്ന ക്യാപ്ഷനും കുറിച്ചു.
ഇതിനു മറുപടിയായി വിക്കിയുടെ നര്മ്മം നിറഞ്ഞ മറുപടിയും നിമിഷങ്ങള്ക്കുള്ളില് കമന്റ് ബോക്സിലെത്തി. ‘‘ഞാൻ താങ്കളോട് പറയുമായിരുന്നു, പക്ഷേ എനിക്ക് ഇപ്പോഴും നാണം തോന്നുന്നു....’’ എന്നാണ് വിക്കി കുറിച്ചത്. ചിത്രത്തില് ശബാന മനോഹരമായി പിങ്ക് നിറത്തിലുള്ള സാരി ധരിച്ച് മുടിയിൽ പൂവ് വച്ച് സുന്ദരിയായി ഇരിക്കുന്നത് കാണാം. വിക്കി ഒരു സ്മാർട്ട് ടക്സീഡോയാണ് ധരിച്ചിരിക്കുന്നത്.
ഇവരുടെ മനോഹരമായ ആശയവിനിമയം ആരാധകര്ക്ക് ഏറെയിഷ്ടമായി. ബോളിവുഡിന്റെ ഇതിഹാസ അഭിനേത്രിയും യുവതാരവും തമ്മിലുള്ള രസകരമായ തമാശ ആ ദിവസത്തെ ഏറ്റവും മികച്ച ഒരു നര്മ്മസംഭാഷണമായി ആരാധകര് ഏറ്റെടുത്തു. രസകരമായ ഒരുപാട് കമന്റുകളും ഈ ചിത്രങ്ങള്ക്ക് താഴെ നിറയുന്നുണ്ട്.
പ്രൊഫഷണൽ രംഗത്ത് വിക്കി, നീരജ് ഗയ്വാൻ സംവിധാനം ചെയ്ത 2015-ൽ പുറത്തിറങ്ങിയ മാസാൻ എന്ന ചിത്രത്തിലൂടെ ബോളിവുഡിൽ നായകനായി അരങ്ങേറ്റം കുറിച്ചു. കാൻസ് ഫിലിം ഫെസ്റ്റിവലിൽ പ്രദർശിപ്പിച്ച ചിത്രം വ്യാപകമായ നിരൂപക പ്രശംസ നേടി. റാസി, സഞ്ജു, ഉറി: ദി സർജിക്കൽ സ്ട്രൈക്ക്, സർദാർ ഉദം സിംഗ്, സാം ബഹാദൂർ, ഏറ്റവും ഒടുവിൽ ചാവ തുടങ്ങിയ സിനിമകളിലൂടെ നിരവധി അംഗീകാരങ്ങളും പ്രേക്ഷകപ്രീതിയും വിക്കി നേടിയെടുത്തു.
കരിയറില് മാത്രമല്ല വ്യക്തി ജീവിതത്തിലും തിളങ്ങി നില്ക്കുന്ന വിക്കി, കത്രീന കൈഫിനെ വിവാഹം ചെയ്യുകയും 2025 നവംബറിൽ ഈ ദമ്പതികൾക്ക് ഒരു ആൺകുട്ടി ജനിക്കുകയും ചെയ്തു.
ഹിന്ദി സിനിമയിൽ 5 പതിറ്റാണ്ടിലേറെ നീണ്ട കരിയറുള്ള നടി ശബാന ആസ്മി, ഇന്ത്യൻ സിനിമയിലെ ഏറ്റവും ആദരണീയയായ പെർഫോമർമാരിൽ ഒരാളായി ഇന്നും തുടരുന്നു.
