സിനിമാപ്രേമികൾ ആവേശത്തോടെ കാത്തിരിക്കുന്ന മോഹൻലാൽ-ജീത്തു ജോസഫ് ചിത്രമാണ് ‘ദൃശ്യം 3’. മലയാള സിനിമയിലെ ക്രൈം ത്രില്ലറുകള്ക്ക് ഒരു ബെഞ്ച്മാര്ക്ക് നല്കിയ ദൃശ്യം ഫ്രാഞ്ചൈസിയുടെ മൂന്നാം ഭാഗമെത്തുന്നു എന്നറിഞ്ഞ നാള് മുതല് പ്രേക്ഷകരെല്ലാം വലിയ ആവേശത്തിലാണ്. സിനിമയുടെ ഓരോ അപ്ഡേറ്റുകളും വലിയ ആവേശത്തോടെയാണ് ആരാധകര് ഏറ്റെടുക്കുന്നത്. മോഹന്ലാലിന്റെ ജന്മദിനത്തല് തന്നെ ദൃശ്യം 3 എത്തുന്നു എന്നത് ആരാധകരെ ഏറെ സന്തോഷിപ്പിക്കുന്നുണ്ട്.
ഇപ്പോഴിതാ ദൃശ്യം 3ന്റെ ഏറ്റവും പുതിയ പോസ്റ്ററിനൊപ്പം ഫസ്റ്റ് ഷോയുടെ സമയവും പങ്കിടുകയാണ് മോഹന്ലാല്. പത്രം വായിച്ചു കൊണ്ട് ചാരുകസേരയില് കൈലിയും ഷര്ട്ടും ധരിച്ച് തികച്ചും സാധാരണക്കാരനായ കുടുംബനാഥനായ ജോര്ജുകുട്ടിയെയാണ് പോസ്റ്ററില് കാണാനാകുന്നത്. ലോകവ്യാപകമായി അന്ന് രാവിലെ 8 മണിക്ക് ചിത്രത്തിന്റെ ആദ്യ പ്രദർശനം ആരംഭിക്കുമെന്ന ആവേശകരമായ വാർത്ത മോഹൻലാൽ തന്നെയാണ് ആരാധകരുമായി പങ്കുവെച്ചത്. ഗൗരവത്തോടെ പത്രത്തിലേക്ക് നോക്കിയിരിക്കുന്ന ജോര്ജുകുട്ടിയുടെ മനസ്സില് നിരവധി ചിന്തകളുണ്ടെന്ന് പോസ്റ്ററില് നിന്ന് വ്യക്തമാണ്. ‘‘ജോർജ്ജ്കുട്ടി തിരിച്ചെത്തുന്നു...ആദ്യ ഷോ വേൾഡ്വൈഡ് മെയ് 21, ഇന്ത്യന് സമയം രാവിലെ എട്ടു മണി...’’ എന്ന ക്യാപ്ഷന് നല്കിയാണ് മോഹന്ലാല് പോസ്റ്റ് പങ്കിട്ടിരിക്കുന്നത്. നിരവധി കമന്റുകളാണ് താരത്തിന്റെ പോസ്റ്റിനു താഴെ നിറയുന്നത്. ‘ആ ഇരിപ്പ് കണ്ടാല് അറിയാം ....എല്ലാം അടിച്ചു തൂക്കും എന്ന്, D3 ലാലേട്ടൻ തൂക്കും, വാർത്തയൊക്കെ വായിക്കുന്നുണ്ടല്ലോ, വെയിറ്റിംഗ് ലാലേട്ടാ...’ എന്നതടക്കമാണ് കമന്റുകള്.
ജോർജുകുട്ടിയും കുടുംബവും നേരിടുന്ന പുതിയ വെല്ലുവിളികളാണ് മൂന്നാം ഭാഗത്തിന്റെ ഇതിവൃത്തം. കുടുംബത്തെ രക്ഷിക്കാൻ ഏതറ്റം വരെയും പോകുന്ന ഒരു ഗൃഹനാഥന്റെ ആത്മസംഘർഷങ്ങൾക്കൊപ്പം, കാലമാറ്റത്തിന് അനുസരിച്ചുള്ള മാറ്റങ്ങളും ഉൾക്കൊണ്ടാണ് ജീത്തു ജോസഫ് ഈ ചിത്രം ഒരുക്കിയിരിക്കുന്നത്. വൻ വിപണിമൂല്യമുള്ള ഈ ചിത്രത്തിൽ ബോളിവുഡിലെ പ്രമുഖ സ്റ്റുഡിയോകളും പങ്കാളികളാകുന്നുണ്ട്. ആശിർവാദ് സിനിമാസിനൊപ്പം പനോരമ സ്റ്റുഡിയോസും പെൻ സ്റ്റുഡിയോസും നിർമ്മാണ രംഗത്ത് സഹകരിക്കുന്നു. പനോരമ സ്റ്റുഡിയോസ് ചിത്രത്തിന്റെ ആഗോള വിതരണാവകാശവും ഡിജിറ്റൽ അവകാശവും സ്വന്തമാക്കിയതായാണ് റിപ്പോർട്ടുകൾ. ഏകദേശം 100 കോടി രൂപയോളം ബോളിവുഡ് ബാനറുകൾ ഈ മലയാളം ഒറിജിനൽ പതിപ്പിൽ നിക്ഷേപിച്ചിട്ടുണ്ട്.
