ദാഹിക്കുമ്പോള് ഒരു ഗ്ലാസ് സാധാരണ വെള്ളം കുടിച്ച് തൃപ്തിപ്പെടുന്നവരാണ് സാധാരണക്കാര് എല്ലാം തന്നെ. എന്നാല് നമ്മുക്ക് ചിന്തിക്കാന് പോലും കഴിയാത്ത ആഡംബര പ്രകടനവുമായി രംഗത്തെത്തിയിരിക്കുകയാണ് മിയാമിയില് നിന്നുള്ള അന്ന ലിന്ഡെ. തനിക്ക് ദാഹം മാറണമെങ്കില് ഹിമാനിയിലെ ശുദ്ധമായ വെള്ളം തന്നെ വേണമെന്ന വാശിയോടെ സ്വകാര്യ ഹെലികോപ്റ്റര് വാടകയ്ക്കെടുത്ത് മലമുകളിലേക്ക് പറന്ന അന്നയുടെ വീഡിയോ ഇപ്പോള് സോഷ്യല് മീഡിയയില് വന് ചര്ച്ചയായിരിക്കുകയാണ്. പണം വാരിക്കോരി ചെലവഴിക്കുന്ന തന്റെ ജീവിതശൈലിയിലൂടെ ഇതിനോടകം തന്നെ അന്ന ലോകശ്രദ്ധ പിടിച്ചുപറ്റികഴിഞ്ഞു.
മഞ്ഞുപുതച്ച മലനിരകള്ക്കിടയില് ഹെലികോപ്റ്ററില് വന്നിറങ്ങുന്ന അന്ന, ഉരുകുന്ന ഹിമാനിയില് നിന്ന് നേരിട്ട് വെള്ളം കുടിക്കുന്നതാണ് വീഡിയോയിലുള്ളത്. സാധാരണ മിനറല് വാട്ടറോ പ്യൂരിഫൈഡ് വെള്ളമോ തനിക്ക് ഒട്ടും ഇഷ്ടമല്ലെന്നും ഏറ്റവും ശുദ്ധമായ വെള്ളം ലഭിക്കാനാണ് താന് ഹെലികോപ്റ്ററില് എത്തിയതെന്നും അവള് അവകാശപ്പെടുന്നു. 'സാധാരണ വെള്ളം കുടിച്ച് ആളുകള് എങ്ങനെയാണ് കഴിയുന്നതെന്ന് എനിക്ക് അത്ഭുതം തോന്നുന്നു' എന്ന അന്നയുടെ പരിഹാസം വീഡിയോയില് ഉടനീളമുണ്ട്.
സ്വകാര്യ ജെറ്റുകളില് യാത്ര ചെയ്യുക, അവധിക്കാലം ആഘോഷിക്കാന് 10 ലക്ഷം ഡോളര് (ഏകദേശം 8.3 കോടി രൂപ) ചോദിക്കുക, സോളില് പോയി വന്തോതില് ഷോപ്പിങ് നടത്തുക തുടങ്ങിയ ആഡംബരങ്ങള് നിറഞ്ഞ വിഡിയോ പങ്കുവച്ചുകൊണ്ടാണ് അന്ന ശ്രദ്ധിക്കപ്പെട്ടത്. 'ഡാഡീസ് ലിറ്റില് പ്രിന്സസ്' എന്ന് സ്വയം വിശേഷിപ്പിക്കുന്ന അന്ന, സത്യത്തില് സമ്പന്ന കുടുംബങ്ങളിലെ കുട്ടികളുടെ അതിശയോക്തി നിറഞ്ഞ ജീവിതശൈലിയെ പരിഹസിക്കാനാണ് ഇത്തരത്തിലുള്ള വീഡിയോകള് നിര്മ്മിക്കുന്നത്. തന്റെ പിതാവിനെക്കുറിച്ചും സഹായികളെക്കുറിച്ചും തമാശരൂപേണ സംസാരിക്കുന്ന ഒരു കഥാപാത്രമായാണ് അവള് വീഡിയോകളില് പ്രത്യക്ഷപ്പെടാറുള്ളത്. എന്നാല് വീഡിയോ കാണുന്ന പലരും ഇത് അന്നയുടെ യഥാര്ത്ഥ സ്വഭാവമാണെന്ന് തെറ്റിദ്ധരിക്കാറാണ് പതിവ്.
വീഡിയോ വൈറലായതോടെ സോഷ്യല് മീഡിയയില് രൂക്ഷമായ പരിഹാസങ്ങളാണ് ഉയരുന്നത്. സാധാരണക്കാരുടെ ജീവിതസാഹചര്യങ്ങളെ ഓര്മ്മിപ്പിച്ചുകൊണ്ട് പലരും കമന്റ് ബോക്സില് അന്നയെ വിമര്ശിക്കുന്നുണ്ട്. 'ഞങ്ങള് ഇവിടെ ആര്.ഒ ഫില്ട്ടര് മാറ്റാനുള്ള ബജറ്റ് നോക്കിയിരിക്കുമ്പോഴാണ് ദാഹം തീര്ക്കാന് ഒരാള് ഹെലികോപ്റ്റര് വിളിക്കുന്നത്' എന്നാണ് ഒരാളുടെ കമന്റ്. വെറും പ്രഹസനത്തിന് വേണ്ടി പ്രകൃതിയെയും പണത്തെയും ദുരുപയോഗം ചെയ്യുന്നു എന്ന തരത്തിലുള്ള വിമര്ശനങ്ങളാണ് ഭൂരിഭാഗം പേരും പങ്കുവെക്കുന്നത്.
