ന്യൂഡല്ഹി: രാജ്യം സാമ്പത്തിക അടിയന്തരാവസ്ഥയിലേക്കാണോ നീങ്ങുന്നതെന്നും പാവപ്പെട്ടവരുടെ മേല് ഭാരം അടിച്ചേല്പ്പിക്കാനാണോ കേന്ദ്രസര്ക്കാരിന്റെ പരിപാടിയെന്നും പ്രധാനമന്ത്രിയോട് പ്രതിപക്ഷം. മിഡില് ഈസ്റ്റ് പ്രതിസന്ധി രൂക്ഷമാകുന്ന സാഹചര്യത്തില് മിതവ്യയം പാലിക്കണമെന്ന പ്രധാനമന്ത്രി നരേന്ദ്ര മോദിയുടെ അഭ്യര്ത്ഥനയ്ക്കെതിരെ രൂക്ഷവിമര്ശനവുമായി പ്രതിപക്ഷ പാര്ട്ടികള് രംഗത്തെത്തി.
വിദേശയാത്രകള് ഒഴിവാക്കുക, ഇന്ധന ഉപയോഗം കുറയ്ക്കുക, സ്വര്ണ്ണ വാങ്ങലുകള് മാറ്റിവെക്കുക, വര്ക്ക് ഫ്രം ഹോം രീതികള് പുനരാരംഭിക്കുക എന്നിങ്ങനെയുള്ള പ്രധാനമന്ത്രിയുടെ നിര്ദ്ദേശങ്ങള്ക്കാണ് വിമര്ശനം. ഇത് ഗവണ്മെന്റിന്റെ നയപരമായ പരാജയമാണെന്നും സാമ്പത്തിക ആസൂത്രണമില്ലായ്മയാണെന്നും അവര് ആരോപിച്ചു. കോണ്ഗ്രസ്, ശിവസേന, തൃണമൂല് കോണ്ഗ്രസ് എന്നീ പാര്ട്ടികളുടെ നേതാക്കളാണ് വിമര്ശനവുമായി രംഗത്ത് വന്നിരിക്കുന്നത്. മിഡില് ഈസ്റ്റ് സാഹചര്യത്തില് കേന്ദ്ര സര്ക്കാര് അതീവ ജാഗ്രതയിലാണ്.
പ്രതിരോധ മന്ത്രി രാജ്നാഥ് സിംഗിന്റെ അധ്യക്ഷതയില് ഇന്ഫോര്മല് ഗ്രൂപ്പ് ഓഫ് മിനിസ്റ്റേഴ്സിന്റെ സുപ്രധാന യോഗം ഇന്ന് രാവിലെ 10.30-ന് നടക്കും. ഇന്ധന വിതരണം, കപ്പല് ഗതാഗതം, വിലക്കയറ്റം, അവശ്യസാധനങ്ങള് എന്നിവയില് ഈ പ്രതിസന്ധി ഉണ്ടാക്കുന്ന ആഘാതം യോഗം വിലയിരുത്തും. ആഗോളതലത്തില് മാസങ്ങളായി നിലനില്ക്കുന്ന അശാന്തിക്കിടയിലും ഇന്ത്യയുടെ ഊര്ജ്ജ താല്പ്പര്യങ്ങള് സംരക്ഷിക്കുന്നതില് സര്ക്കാര് പരാജയപ്പെട്ടുവെന്ന് കോണ്ഗ്രസ് ജനറല് സെക്രട്ടറി കെ സി വേണുഗോപാല് കുറ്റപ്പെടുത്തി.
ഇന്ത്യ ഒരു വിദേശനാണ്യ വിനിമയ പ്രതിസന്ധിയിലേക്കാണോ നീങ്ങുന്നതെന്ന് തൃണമൂല് കോണ്ഗ്രസ് എംപി സാകേത് ഗോഖലെ ചോദിച്ചു. 'മന്ത്രിമാര് വ്യോമസേനാ വിമാനങ്ങളിലും വലിയ വാഹന വ്യൂഹങ്ങളിലും യാത്ര ചെയ്യുമ്പോള് എന്തിനാണ് പൗരന്മാര് മാത്രം ത്യാഗം സഹിക്കുന്നത്?' അദ്ദേഹം ചോദിച്ചു. ഹൈദരാബാദില് സംസാരിക്കവെയാണ് പ്രധാനമന്ത്രി നിയന്ത്രണം പാലിക്കാന് രാജ്യത്തോട് അഭ്യര്ത്ഥിച്ചത്.
കോവിഡിന് സമാനമായ രീതിയികളിലേക്ക് തിരിച്ചുപോകാനാണ് അഭ്യര്ത്ഥന. വര്ക്ക് ഫ്രം ഹോം പിന്തുടരുക, പെട്രോള്, ഡീസല് ഉപയോഗം കുറയ്ക്കുക, പൊതുഗതാഗതമോ ഇലക്ട്രിക് വാഹനങ്ങളോ ഉപയോഗിക്കുകയും ചെയ്യുക. അനാവശ്യമായ വിദേശയാത്രകളും വിദേശത്തെ വിവാഹ മാമാങ്കങ്ങളും ഒരു വര്ഷത്തേക്ക് ഒഴിവാക്കുക. സ്വര്ണ്ണ വാങ്ങലുകള് ഒഴിവാക്കുക, ഇന്ത്യന് ഉല്പ്പന്നങ്ങള് വാങ്ങുക, പാചക എണ്ണയുടെ ഉപയോഗം, രാസവളങ്ങള് എന്നിവ ഒഴിവാക്കി പ്രകൃതിദത്ത കൃഷിയിലേക്ക് മാറുക തുടങ്ങിയവയാണ് ആവശ്യം.
