കുടുംബബന്ധങ്ങളിലെ തകര്ച്ചയുടെയും വിചിത്രമായ പ്രതികാര ബുദ്ധിയുടെയും ഞെട്ടിക്കുന്ന ദൃശ്യങ്ങളാണ് കഴിഞ്ഞദിവസം സമൂഹമാധ്യമങ്ങളില് വൈറലായത്. ജീവിച്ചിരിക്കുന്ന ഭാര്യയ്ക്ക് വേണ്ടി ഗംഗാ നദീതീരത്ത് 'പിണ്ഡദാനം' നടത്തുന്ന ഭര്ത്താവിന്റെ വീഡിയോയാണ് ചര്ച്ചകള്ക്ക് വഴിവെച്ചത്. മരിച്ചവരുടെ മോക്ഷപ്രാപ്തിക്കായി നടത്തുന്ന പവിത്രമായ ഈ ഹിന്ദു ആചാരത്തെ, ദാമ്പത്യ തര്ക്കങ്ങള് തീര്ക്കാനുള്ള ആയുധമാക്കി മാറ്റുകയായിരുന്നു ഇയാള്. വിവാഹബന്ധം വേര്പെടുത്താന് നിയമപരമായ വഴികള് തേടുന്നതിന് പകരം, ഭാര്യയുടെ ചിത്രം പുഴയിലൊഴുക്കി ശവസംസ്കാര ചടങ്ങുകള്ക്ക് സമാനമായ രീതിയിലുള്ള പ്രകടനമാണ് ഇയാള് നടത്തിയത്.
ഭാര്യയുടെ അമിതമായ സോഷ്യല് മീഡിയ ആസക്തിയും നിരന്തരമായ റീല്സ് ചിത്രീകരണവുമാണ് ഭര്ത്താവിനെ ഈ കടുംകൈക്ക് പ്രേരിപ്പിച്ചത്. പലതവണ ആവശ്യപ്പെട്ടിട്ടും ഭാര്യ തന്റെ ശീലങ്ങള് മാറ്റാന് തയ്യാറാകാത്തതിനെത്തുടര്ന്ന്, അവര് തനിക്ക് മരിച്ചതിന് തുല്യമാണെന്ന് പ്രഖ്യാപിച്ചായിരുന്നു ഇയാളുടെ പ്രതിഷേധം. അടിവസ്ത്രം മാത്രം ധരിച്ച്, മാല ചാര്ത്തിയ ഭാര്യയുടെ ചിത്രത്തില് തുപ്പുകയും തുടര്ന്ന് ആചാരപ്രകാരം ബലിപദാര്ത്ഥങ്ങള് പുഴയിലൊഴുക്കുകയും ചെയ്യുന്ന വീഡിയോ ഇയാള് തന്നെ ഷൂട്ട് ചെയ്ത് റീലുകളായി പങ്കുവെക്കുകയായിരുന്നു. 'ഘര് കെ കലേഷ്' എന്ന എക്സ് അക്കൗണ്ടിലൂടെയാണ് ഈ ദൃശ്യങ്ങള് പുറംലോകമറിഞ്ഞത്.
സമൂഹമാധ്യമങ്ങളില് വലിയ തോതിലുള്ള വിമര്ശനങ്ങളാണ് ഈ വീഡിയോയ്ക്കെതിരെ ഉയരുന്നത്. ഭാര്യയുടെ സോഷ്യല് മീഡിയാ ഭ്രമത്തോടുള്ള പ്രതിഷേധം അറിയിക്കാന് ഭര്ത്താവ് കണ്ടെത്തിയ വഴി അങ്ങേയറ്റം മ്ലേച്ഛവും ആചാരങ്ങളെ പരിഹസിക്കുന്നതുമാണെന്ന് പലരും കുറിച്ചു. ഭര്ത്താവിന്റേത് ഭ്രാന്തമായ അവസ്ഥയാണെന്നും, വിശുദ്ധമായ ചടങ്ങുകളെ അപമാനിച്ച ഇയാള് ഗുഹാവാസത്തിന് മാത്രമാണ് യോഗ്യനെന്നും വിമര്ശകര് അഭിപ്രായപ്പെടുന്നു. ആധുനിക കാലഘട്ടത്തിലും അസംബന്ധമായ രീതിയില് ഇത്തരം പ്രവര്ത്തികള് ചെയ്യുന്നത് അപരിഷ്കൃതമാണെന്ന പൊതുവികാരമാണ് വീഡിയോയ്ക്ക് താഴെയുള്ള കമന്റുകളില് ഭൂരിഭാഗവും.
