ഓഫീസ് മുറികളിലെ മടുപ്പിക്കുന്ന ജോലി ഉപേക്ഷിച്ച് പച്ചപ്പും പ്രകൃതിയും തേടിയിറങ്ങിയ രണ്ട് യുവാക്കളാണ് ഇപ്പോള് സോഷ്യല് മീഡിയയിലെ താരം. ജാക്ക് ഫ്ലീറ്റ്, ടോം പിയേഴ്സണ് എന്നീ സുഹൃത്തുക്കളാണ് ഇന്ന് കാര്ഷിക രംഗത്തെ വേറിട്ട മാതൃകകളായിമാറിയിരിക്കുന്നത്. രണ്ട് വര്ഷം മുന്പ് സുരക്ഷിതമായ കോര്പ്പറേറ്റ് കരിയര് വേണ്ടെന്നു വെച്ച് ഇംഗ്ലണ്ടിലെ ഷ്രൂസ്ബറിക്കടുത്തുള്ള 'ദി ഹാച്ച്' എന്ന കൃഷിയിടത്തിലേക്ക് ചേക്കേറിയ ഇവരുടെ ജീവിതം, മണ്ണിലിറങ്ങി വിജയം കൊയ്യാന് ആഗ്രഹിക്കുന്ന ഏതൊരു പുതുതലമുറക്കാരനും വലിയൊരു പ്രചോദനമാണ്.
കാര്ഷിക പശ്ചാത്തലമില്ലാതെ ഈ രംഗത്തേക്ക് വന്നത് ഇരുവര്ക്കും വലിയ വെല്ലുവിളിയായിരുന്നെങ്കിലും, പ്രാദേശിക കര്ഷകരുടെ സഹായത്തോടെ ഇവര് ഓരോ ദിവസവും പുതിയ കാര്യങ്ങള് പഠിച്ചെടുത്തു. നിലവില് പന്നിവളര്ത്തലിലാണ് ഇവര് ശ്രദ്ധ കേന്ദ്രീകരിക്കുന്നത്. കുറഞ്ഞ സ്ഥലത്ത് പരിപാലിക്കാന് എളുപ്പമുള്ള പന്നികള്ക്കായി പ്രത്യേക കൂടുകള് ഒരുക്കിയ ഇവര്, ജനിക്കുന്ന കുഞ്ഞുങ്ങളെ വളര്ത്തുമൃഗങ്ങളായി വില്ക്കാനാണ് ലക്ഷ്യമിടുന്നത്.
പന്നിവളര്ത്തലില് മാത്രം ഒതുങ്ങിനില്ക്കാതെ കൃഷിയിടം വിപുലീകരിക്കാനും ഇവര്ക്ക് പദ്ധതിയുണ്ട്. ആടുകളെ വളര്ത്തുന്നതിന് മുന്പ് അവയുടെ പരിപാലനത്തെക്കുറിച്ച് പ്രത്യേക കോഴ്സുകള് ചെയ്യാനാണ് തീരുമാനം. ആട്ടിന്പാലില് നിന്ന് സോപ്പ് നിര്മിച്ച് വിപണിയിലെത്തിക്കുന്നതിനൊപ്പം, കോഴികളെ വളര്ത്താനും ഒരു ഗ്രീന്ഹൗസ് സജ്ജമാക്കാനും ഇവര് ലക്ഷ്യമിടുന്നു.
മൃഗങ്ങളോടുള്ള സ്നേഹവും പഠിക്കാനുള്ള മനസ്സുമുണ്ടെങ്കില് ഏതൊരു കോര്പ്പറേറ്റ് ജീവനക്കാരനും മണ്ണില് വിജയിക്കാമെന്ന് ജാക്കും ടോമും തെളിയിക്കുന്നു. കൃത്യമായ വഴികാട്ടികളില്ലാതെ തുടങ്ങിയെങ്കിലും ഇന്നവര്ക്ക് ഒപ്പമുള്ളത് വലിയൊരു കര്ഷക സമൂഹമാണ്. ഇത്രയും നല്ലൊരു ജീവിതം കുറച്ചുകൂടി നേരത്തെ തുടങ്ങാമായിരുന്നു എന്നൊരു സങ്കടം മാത്രമാണ് ഈ സുഹൃത്തുക്കള്ക്ക് ബാക്കിയുള്ളത്.
