എഐ വീഡിയോകളിലൂടെ കണ്ണും മനസ്സും കാണാനാഗ്രഹിക്കുന്നതെന്നും ആളുകള്ക്ക് കാണാം ആസ്വദിക്കാം. ഒരിക്കലും സംഭവിക്കാന് സാധ്യതയില്ലാത്ത കാര്യങ്ങള് പോലും ആര്ട്ടിഫിഷ്യല് ഇന്റലിജന്സിന്റെ സഹായത്തോടെ ഡിജിറ്റല് വിദഗ്ധര് ചെയ്യുന്നത് സോഷ്യല് മീഡിയയിലൂടെ വൈറലായിട്ടുണ്ട്. അത്തരത്തില് മലയാള സിനിമാ താരങ്ങളും അന്തദേശീയ വേദികളില് തിളങ്ങുന്നത് ഇതിനു മുമ്പും സോഷ്യല് മീഡിയയില് തരംഗമായിട്ടുണ്ട്.
ഇപ്പോഴിതാ അന്ന വിന്റോറിന്റെ നേതൃത്വത്തിൽ ന്യൂയോർക്ക് സിറ്റിയിലെ മെട്രോപൊളിറ്റൻ മ്യൂസിയം ഓഫ് ആർട്ട് ആസ്ഥാനമാക്കി എല്ലാ വർഷവും മെയ് മാസത്തിലെ ആദ്യ തിങ്കളാഴ്ച നടക്കുന്ന മെറ്റ് ഗാല ചടങ്ങില് മലയാളത്തിന്റെ പ്രിയ താരങ്ങള് എത്തുന്ന ചിത്രങ്ങളാണ് സോഷ്യല് മീഡിയയില് നിറയുന്നത്. 2026 ലെ മെറ്റ് ഗാല റെഡ് കാർപെറ്റിൽ ഇന്ത്യൻ സാന്നിധ്യം ചരിത്രപരമായ ഒന്നായി മാറിയിരുന്നു. എന്നാല് അക്കൂട്ടത്തില് മലയാളികള് ഇല്ലായിരുന്നു. ആ അവസരമാണ് എഐ സൃഷ്ടിച്ചിരിക്കുന്നത്.
മലയാളത്തിന്റെ പ്രിയപ്പെട്ട ഹാസ്യ താരങ്ങളാണ് എഐയിലൂടെ മെറ്റ് ഗാലയിൽ എത്തിയത്. ജഗതി ശ്രീകുമാര്, സുരാജ് വെഞ്ഞാറമൂട്, സലിം കുമാര്, ബിജുകുട്ടന്, ധര്മ്മജന് ബോള്ഗാട്ടി, അജു വര്ഗീസ്, രമേഷ് പിഷാരടി, ഹരീഷ് കണാരന് എന്നിങ്ങനെ ഹാസ്യ-സ്വഭാവ താരങ്ങളെല്ലാം മെറ്റ് ഗാലയിൽ തിളങ്ങുകയാണ്. റോയല് അല്ലെങ്കില് സൂപ്പര്ഹീറോ ലുക്കിലാണ് എല്ലാവരും റെഡ് കാര്പറ്റില് എത്തിയിരിക്കുന്നത്. ഗംഭീര ഗെറ്റപ്പിലുള്ള മലയാള താരങ്ങളുടെ മെറ്റ് ഗാല ലുക്ക് സോഷ്യല് മീഡിയ ഏറ്റെടുക്കുകയാണ്. കാഴ്ചക്കാരില് കൗതുകമുണർത്തുന്ന ചിത്രങ്ങള് പങ്കിട്ടിരിക്കുന്നത് ഫിറോസ് എന് വി എന്ന ഇന്സ്റ്റഗ്രാം ഐഡിയില് നിന്നാണ്.
