തിരുവനന്തപുരം: പ്രതീക്ഷ നിര്ഭരമായ മറുപടിയാണ് നിയുക്ത മുഖ്യമന്ത്രി വി.ഡി. സതീശന് നല്കിയതെന്നും ഒരിക്കലും മറക്കില്ലെന്ന് പ്രതികരിച്ചതായും ആശാവര്ക്കര്മാരുടെ സമരസമിതി നേതാക്കള്. കന്റോണ്മെന്റ് ഹൗസില് എത്തിയാണ് ആശാവര്ക്കര്മാര് ഇന്ന് വി.ഡി. സതീശനെ കണ്ടത്. ആദ്യത്തെ മന്ത്രിസഭായോഗത്തില് തന്നെ പരിഗണിക്കാമെന്ന മറുപടിയാണ് ആശാ സമരക്കാര്ക്ക് കിട്ടിയ മറുപടി.
നേരത്തേ മുന് മുഖ്യമന്ത്രി പിണറായി വിജയനും വീണാജോര്ജ്ജും അവഗണിച്ച സമരത്തില് വി.ഡി. സതീശന് പിന്തുണയുമായി എത്തിയിരുന്നു. യുഡിഎഫ് ഭരണത്തില് എത്തിയാല് ആശാ പ്രവര്ത്തകരുടെ വേതനം വര്ദ്ധിപ്പിക്കുമെന്ന് വിഡി സതീശന് നേരത്തെ പ്രഖ്യാപിച്ചിരുന്നു. മിനി, ബിന്ദു, എന്നിവരുടെ നേതൃത്വത്തിലാണ് നിയുക്ത മുഖ്യമന്ത്രിയെ കാണാന് എത്തിയത്.
വലിയ പിന്തുണയാണ് വിഡി സതീശന് സമരസമയത്ത് നല്കിയത്. സമരത്തെ വൈകാരികമായാണ് കണ്ടത്. അന്ന് നടത്തിയ പ്രഖ്യാപനം തീരുമാനമായി വരുമെന്ന് പ്രതീക്ഷിക്കുന്നു. ആദ്യ ക്യാബിനറ്റില് തന്നെ പ്രഖ്യാപനം ഉണ്ടാകുമെന്നാണ് പ്രതീക്ഷയെന്നും എം എ ബിന്ദു വ്യക്തമാക്കി. സമരത്തിന് നല്കിയ പിന്തുണയ്ക്ക് നന്ദി അറിയിക്കാനാണ് ഇന്ന് എത്തിയതെന്നും അവര് കൂട്ടിച്ചേര്ത്തു.
