മെട്രോ നഗരങ്ങളിലെ അമിതമായ വീട്ടുവാടകയെക്കുറിച്ചുള്ള ചര്ച്ചകള് സോഷ്യല് മീഡിയയില് എപ്പോഴും സജീവമാണ്. ബെംഗളൂരു, മുംബൈ, ഡല്ഹി തുടങ്ങിയ ഇന്ത്യന് നഗരങ്ങളിലെ വാടകക്കഥകള് നമ്മള് സ്ഥിരം കേള്ക്കാറുണ്ടെങ്കിലും, ഇപ്പോള് ഇതാ ഫ്രാന്സിന്റെ തലസ്ഥാനമായ പാരീസില് നിന്നുള്ള ഒരു യുവാവിന്റെ വീഡിയോയാണ് ഇന്റര്നെറ്റില് വൈറലാകുന്നത്. ലിഫ്റ്റില്ലാത്ത ഒരു കെട്ടിടത്തിന്റെ ഏഴാം നിലയിലുള്ള തന്റെ ചെറിയ അപ്പാര്ട്ടുമെന്റിലെത്താന് ദിവസവും 134 പടികള് കയറിയിറങ്ങേണ്ടി വരുന്ന ഒരു യുവാവിന്റെ അനുഭവമാണ് ഈ വീഡിയോയിലുള്ളത്.
സെബാസ്റ്റ്യന് ഹെഡ്ബെര്ഗ് എന്ന യുവാവാണ് തന്റെ സുഹൃത്തിനോട് ഈ അപൂര്വ താമസസൗകര്യത്തെക്കുറിച്ച് വെളിപ്പെടുത്തുന്നത്. ഒരാള്ക്ക് മാത്രം കഷ്ടിച്ച് കിടക്കാന് കഴിയുന്ന ഈ കുഞ്ഞ് അപ്പാര്ട്ടുമെന്റിന്റെ പ്രതിമാസ വാടക 600 യൂറോയാണ് (ഏകദേശം 66,907 ഇന്ത്യന് രൂപ). ഒരു ചെറിയ ഷവറും ടോയ്ലറ്റും മാത്രമുള്ള മുറിയില്, ബെഡ്ഡിന് മുകളിലൂടെ ചവിട്ടിക്കടന്ന് വേണം ഇതിന്റെ ബാല്ക്കണിയിലേക്ക് പ്രവേശിക്കാന്. സ്ഥലപരിമിതികള് ഏറെയുണ്ടെങ്കിലും ഇത്രയും ഉയര്ന്ന വാടക നല്കാന് യുവാവിനെ പ്രേരിപ്പിക്കുന്ന മറ്റൊരു ഘടകമുണ്ട്.
ശാരീരികമായി ഏറെ ബുദ്ധിമുട്ടിക്കുന്നതാണെങ്കിലും, 600 യൂറോയേക്കാള് എത്രയോ വിലമതിക്കുന്ന മനോഹരമായ ഒരു കാഴ്ചയാണ് ഈ അപ്പാര്ട്ടുമെന്റിന്റെ ബാല്ക്കണിയില് നിന്ന് കാണാന് കഴിയുന്നതെന്ന് സെബാസ്റ്റ്യന് അവകാശപ്പെടുന്നു. പാരീസ് നഗരത്തിന്റെ അതിമനോഹരമായ ദൃശ്യമാണ് ഈ ഉയരത്തില് നിന്നും ആസ്വദിക്കാന് സാധിക്കുക. കനത്ത വാടകയും ലിഫ്റ്റില്ലാത്തതിന്റെ കഷ്ടപ്പാടുകളും ഉണ്ടെങ്കിലും, ഈ മനോഹരമായ കാഴ്ചയാണ് തന്നെ ഇവിടെത്തന്നെ തുടരാന് പ്രേരിപ്പിക്കുന്നതെന്നാണ് യുവാവ് വീഡിയോയില് വ്യക്തമാക്കുന്നത്.
