തനിക്കെതിരെ സോഷ്യൽ മീഡിയയിൽ ഉയർന്നുവന്ന ക്രൂരമായ ട്രോളുകൾക്കും പരിഹാസങ്ങൾക്കും ശക്തമായ മറുപടിയുമായി രംഗത്തെത്തിയിരിക്കുകയാണ് നടിയും അവതാരകയും ബിസിനസ് സംരംഭകയുമായ ആര്യ. അടുത്തിടെ നടന്ന ഒരു വിദേശ ഷോയിലെ നൃത്ത പ്രകടനത്തിന്റെ പേരിൽ ഒരു കൂട്ടം ആളുകൾ സോഷ്യൽ മീഡിയയിൽ കടുത്ത രീതിയിൽ പരിഹസിച്ചിരുന്നു. ഈ വിമർശനങ്ങൾക്കാണ് ആര്യ മറുപടിയുമായെത്തിയിരിക്കുന്നത്.
തന്റെ ഇൻസ്റ്റാഗ്രാം പേജിലൂടെയാണ് ആര്യ വിമർശകർക്ക് പിന്നിലെ യഥാർത്ഥ വസ്തുതകൾ വെളിപ്പെടുത്തിക്കൊണ്ട് വികാരാധീനയായി കുറിപ്പ് പങ്കുവെച്ചത്. മുറിവേറ്റ കാലും കടുത്ത നീരും വച്ചുകൊണ്ടാണ് താൻ ആ സ്റ്റേജ് ഷോകൾ പൂർത്തിയാക്കിയതെന്നും എന്നാൽ ഇതിന്റെ പിന്നിലെ കഷ്ടപ്പാടുകൾ അറിയാതെയാണ് ആളുകൾ സൈബർ ഇടങ്ങളിൽ വ്യക്തിഹത്യ നടത്തുന്നതെന്നും ആര്യ പറയുന്നു.
‘4 പെർഫോമൻസുകൾ, 6 സ്റ്റേജുകൾ, 3 മണിക്കൂർ നീണ്ട പ്രോഗ്രാം... ഇതിനെക്കുറിച്ചൊന്നും ഒരു റീൽ ചെയ്യാനോ പോസ്റ്റ് ചെയ്യാനോ ഞാൻ ഒട്ടും ആഗ്രഹിച്ചിരുന്നതല്ല. പക്ഷേ, സോഷ്യൽ മീഡിയയിലുടനീളം പ്രചരിക്കുന്ന എന്റെ ഒരു പെർഫോമൻസ് വീഡിയോയുമായി ബന്ധപ്പെട്ട് വളരെ മോശമായ ചില കാര്യങ്ങൾ എന്റെ ശ്രദ്ധയിൽ പെട്ടു, അത് എന്നെ ആകെ തളർത്തിക്കളഞ്ഞു. അതിനെക്കുറിച്ച് കൂടുതൽ സംസാരിക്കാൻ ഞാൻ ആഗ്രഹിക്കുന്നില്ല, പക്ഷേ അത് എനിക്കുണ്ടാക്കിയ വേദന വളരെ ആഴമേറിയതും കഠിനവുമായിരുന്നു.
അതുകൊണ്ട് തന്നെ എന്റെ മനസ്സിനെ ഒന്ന് ശാന്തമാക്കാൻ വേണ്ടിയാണ് ഞാൻ ഈ വീഡിയോ ചെയ്യാമെന്ന് കരുതിയത്, ഇപ്പോൾ എന്നെക്കുറിച്ച് എനിക്ക് അത്രമേൽ അഭിമാനം തോന്നുന്നുണ്ട്. ഒപ്പം എന്റെ കലാകാരന്മാരുടെ മുഴുവൻ ടീമിനും ഞാൻ നന്ദി പറയാൻ ആഗ്രഹിക്കുന്നു. അവർ എനിക്കൊപ്പം ഉറച്ചുനിന്നു, എന്നെ നോക്കിനടന്നു, ഇടയ്ക്കിടെ എന്റെ സുഖവിവരങ്ങൾ അന്വേഷിച്ചു, എനിക്ക് വേണ്ടി അപരിചിതരോട് വരെ വഴക്കിട്ടു... ദൈവമേ, അവർ എനിക്ക് വേണ്ടി ചെയ്യാത്തതായി ഒന്നുമില്ല !!!! എന്റെ ഹൃദയത്തിന്റെ അടിത്തട്ടിൽ നിന്ന് ഞാൻ നിങ്ങളെ സ്നേഹിക്കുന്നു, നിങ്ങളോട് കടപ്പെട്ടിരിക്കുന്നു,’ എന്നാണ് ആര്യ കുറിച്ചത്. പ്രോഗ്രാമിൽ നിന്നുള്ള ദൃശ്യങ്ങൾ കോർത്തിണക്കിയ ഒരു വീഡിയോയും ആര്യ പങ്കുവച്ചിട്ടുണ്ട്.
കഴിഞ്ഞ വർഷമായിരുന്നു കൊറിയോഗ്രാഫറും ഡി.ജെയുമായ സിബിൻ ബെഞ്ചമിനും തമ്മിലുള്ള വിവാഹം. ഒരു ബിസിനസ് സംരംഭക കൂടിയാണ് ആര്യ ഇന്ന്. സ്വന്തമായി ഒരു ബൊട്ടീക്കും ‘കാഞ്ചിവരം’ എന്ന പേരിൽ സാരികളുടെ ഒരു ബ്രാൻഡും ആര്യ നടത്തുന്നുണ്ട്.
