ആഗോളതലത്തിൽ ദശലക്ഷക്കണക്കിന് ആരാധകരുള്ള ബോളിവുഡിന്റെ സ്വന്തം 'ഭായ്ജാൻ' ആണ് സൽമാൻ ഖാൻ. താരത്തെക്കുറിച്ചുള്ള വാർത്തകളെല്ലാം എപ്പോഴും സോഷ്യൽ മീഡിയയിൽ വലിയ തരംഗമാകാറുണ്ട്. കഴിഞ്ഞ ദിവസം തനിച്ചിരിക്കുന്നതിനെക്കുറിച്ചും ഏകാന്തതയെക്കുറിച്ചും സൽമാൻ പങ്കുവെച്ച നിഗൂഢമായ ഒരു പോസ്റ്റ് ആരാധകരെ ഒന്നടങ്കം ആശങ്കയിലാഴ്ത്തിയിരുന്നു. എന്നാൽ, വലിയ ചർച്ചകൾക്ക് വഴിവെച്ച ആ കുറിപ്പ് തന്റെ വ്യക്തിജീവിതത്തെക്കുറിച്ചുള്ളതല്ലെന്ന് വ്യക്തമാക്കി ഒടുവിൽ താരം തന്നെ നേരിട്ട് രംഗത്തെത്തിയിരിക്കുകയാണ്.
ഈ വാർത്തകൾ കണ്ട് സ്വന്തം അമ്മ സൽമ ഖാൻ പോലും ആശങ്കാകുലയായെന്ന് സൽമാൻ വെളിപ്പെടുത്തി. ഇൻസ്റ്റാഗ്രാമിൽ പങ്കുവെച്ച രസകരമായ ഒരു കുറിപ്പിലൂടെയാണ് താരം എല്ലാ ഗോസിപ്പുകൾക്കും വിരാമമിട്ടത്.
"അയ്യോ സുഹൃത്തുക്കളേ, ഞാൻ എന്നെക്കുറിച്ചല്ല സംസാരിച്ചത്. എനിക്ക് ഇത്രയും വലിയൊരു കുടുംബവും സുഹൃത്തുക്കളും ഉള്ളപ്പോൾ ഞാൻ എങ്ങനെ തനിച്ചാകും? നിങ്ങളുടെയൊക്കെ പ്രാർത്ഥനകളും ആശംസകളും കൂടെയുള്ളപ്പോൾ എനിക്ക് എങ്ങനെ ഏകാന്തത തോന്നും? അങ്ങനെ തോന്നിയാൽ ഞാൻ ചെയ്യുന്ന ഏറ്റവും വലിയ നന്ദികേടായിരിക്കുമത്. ചിലപ്പോഴൊക്കെ എപ്പോഴും ആളുകളുടെ കൂടെയിരുന്ന് എനിക്ക് മടുപ്പ് തോന്നാറുണ്ട്, അതുകൊണ്ട് എനിക്ക് കുറച്ച് വ്യക്തിപരമായ സമയം വേണമെന്ന് തോന്നി, അത്രമാത്രം," സൽമാൻ കുറിച്ചു.
തന്റെ പോസ്റ്റിന് മാധ്യമങ്ങൾ നൽകിയ അമിത ശ്രദ്ധയെ തമാശരൂപേണ പരിഹസിച്ചുകൊണ്ടാണ് സൽമാൻ പോസ്റ്റ് തുടർന്നത്."ഇത്തവണ ഒരു ഫോട്ടോ പോലും ഇല്ലാതെയാണ് നിങ്ങൾ ഇതൊരു ബ്രേക്കിംഗ് ന്യൂസാക്കി മാറ്റിയത്. 'എന്തുപറ്റി മോനേ?' എന്ന് അമ്മ പോലും എന്നോട് ചോദിച്ചു കഴിഞ്ഞു. എല്ലാവരും ഒന്ന് റിലാക്സ് ചെയ്യൂ," സൽമാൻ കൂട്ടിച്ചേർത്തു.
മെയ് 17-ന് ഇൻസ്റ്റാഗ്രാമിൽ പങ്കുവെച്ച ഒരു ചിത്രത്തിനൊപ്പം സൽമാൻ നൽകിയ അടിക്കുറിപ്പാണ് ഈ വിവാദങ്ങൾക്ക് കാരണമായത്. "ഒറ്റയ്ക്ക് ഇരിക്കാൻ രണ്ട് വഴികളാണുള്ളത് – തനിച്ചായിരിക്കുക, ഏകാന്തത അനുഭവിക്കുക . തനിച്ചായിരിക്കുക എന്നത് നമ്മുടെ സ്വന്തം തീരുമാനമാണ്, എന്നാൽ ആരും കൂടെയില്ലാത്തപ്പോഴാണ് ഏകാന്തത അനുഭവപ്പെടുന്നത്.. ഇനി ഇതിനപ്പുറം നിങ്ങൾക്ക് എന്താണ് വേണ്ടതെന്ന് നിങ്ങൾ തന്നെ തീരുമാനിക്കുക," എന്നായിരുന്നു സൽമാന്റെ വാക്കുകൾ. ഇതിനെയാണ് ആരാധകരും മാധ്യമങ്ങളും താരത്തിന്റെ വ്യക്തിജീവിതവുമായി കൂട്ടി വായിച്ചത്.
