ന്യൂഡൽഹി: ഇറ്റാലിയൻ പ്രധാനമന്ത്രി ജോർജിയ മെലോണിക്ക് ഇന്ത്യൻ പ്രധാനമന്ത്രി നരേന്ദ്ര മോദി 'മെലഡി' മിഠായി സമ്മാനിച്ച സംഭവം കേവലം ഒരു സൗഹൃദ പ്രകടനത്തിനപ്പുറം ഓഹരി വിപണിയിൽ വലിയൊരു അട്ടിമറിക്ക് വഴിതെളിച്ചു. 'പാർലെ' എന്ന പേരിന്മേൽ ഉണ്ടായ ആശയക്കുഴപ്പം കാരണം പാർലെ ഇൻഡസ്ട്രീസ് എന്ന കമ്പനിയുടെ ഓഹരികൾക്ക് വൻ നേട്ടമാണ് ഉണ്ടായിരിക്കുന്നത്.
ബുധനാഴ്ച ബോംബെ സ്റ്റോക്ക് എക്സ്ചേഞ്ചിൽ പാർലെ ഇൻഡസ്ട്രീസിന്റെ ഓഹരി വില 5 ശതമാനം ഉയർന്ന് അപ്പർ സർക്യൂട്ടിലെത്തി, പ്രതിഓഹരി വില 5.25 രൂപയായി വർദ്ധിച്ചു. ഇന്ന് മാത്രം ഏകദേശം 8 ലക്ഷം ഇക്വിറ്റി ഓഹരികളാണ് വിപണിയിൽ കൈമാറ്റം ചെയ്യപ്പെട്ടത്.
എന്നാൽ, യഥാർത്ഥ വസ്തുത ഇതാണ്, ബി.എസ്.ഇ-യിൽ ലിസ്റ്റ് ചെയ്തിട്ടുള്ള പാർലെ ഇൻഡസ്ട്രീസ് യഥാർത്ഥത്തിൽ ഇൻഫ്രാസ്ട്രക്ചർ, റിയൽ എസ്റ്റേറ്റ് വികസന മേഖലകളിൽ പ്രവർത്തിക്കുന്ന ഒരു കമ്പനിയാണ്. പ്രശസ്തമായ മെലഡി മിഠായി നിർമ്മിക്കുന്ന 'പാർലെ' കമ്പനി ഓഹരി വിപണിയിൽ ലിസ്റ്റ് ചെയ്യപ്പെടാത്ത ഒരു സ്വകാര്യ എഫ്.എം.സി.ജി കമ്പനിയാണ്. പാർലെ-ജി, മൊണാക്കോ തുടങ്ങിയ ജനപ്രിയ ബ്രാൻഡുകളെല്ലാം ഈ സ്വകാര്യ കമ്പനിയുടേതാണ്. പേര് ഒന്നുതന്നെയായതിനാൽ നിക്ഷേപകർക്ക് സംഭവിച്ച തെറ്റാണ് ഈ ഓഹരി കുതിപ്പിന് കാരണമായത്.
Comments