മലയാളികളുടെ പ്രിയ താരമാണ് മീന. ബാലതാരമായെത്തി പിന്നീട് തെന്നിന്ത്യയിലെ തിരക്കേറിയ നായികയായി മാറുകയായിരുന്നു മീന. നായിക മാത്രമല്ല പെങ്ങൾ, കാമുകി, ഭാര്യ, അമ്മ വേഷങ്ങളിൽ പതിറ്റാണ്ടുകളായി സിനിമയിൽ നിറഞ്ഞുനിൽക്കുകയാണ് മീന. ഇന്നും നായികയായി സിനിമ ഇൻഡസ്ട്രിയിൽ സജീവമാണ് താരം.
മലയാളികൾ ഏറെ ആകാംക്ഷയോടെ കാത്തിരുന്ന മോഹൻലാൽ-ജീത്തു ജോസഫ് കൂട്ടുകെട്ടിലൊരുങ്ങിയ ‘ദൃശ്യം’ ഫ്രാഞ്ചൈസിയില് പ്രധാന കഥാപാത്രമായി മീനയുമുണ്ട്. മോഹന്ലാലിന്റെ ജന്മദിനമായ ഇന്നാണ് ദൃശ്യത്തിന്റെ മൂന്നാം ഭാഗം റിലീസ് ചെയ്തത്. ആദ്യ ഷോ കഴിഞ്ഞപ്പോള് മുതല് പ്രേക്ഷകരില് നിന്ന് മികച്ച പ്രതികരണമാണ് സിനിമയ്ക്ക് കിട്ടിക്കൊണ്ടിരിക്കുന്നത്.
ഇപ്പോഴിതാ സിനിമ കണ്ടവര്ക്കും കാണാത്തവര്ക്കായി സോഷ്യല് മീഡിയയിലൂടെ കുറിപ്പ് പങ്കിടുകയാണ് മീന. ദൃശ്യം 3 യുടെ സ്പോയിലറുകൾ പോസ്റ്റ് ചെയ്യുന്നത് ഒഴിവാക്കണമെന്നും ചിലത് തിയേറ്ററുകളിൽ നേരിട്ട് ആസ്വദിക്കുന്നതാണ് നല്ലതെന്നുമാണ് മീന പങ്കിട്ടത്.
‘‘പ്രിയപ്പെട്ട സിനിമാപ്രേമികളോടും ആരാധകരോടും ഒരു എളിയ അഭ്യർത്ഥന - ദൃശ്യം 3 യുടെ സ്പോയിലറുകൾ പോസ്റ്റ് ചെയ്യുന്നത് ഒഴിവാക്കുക....ഒരു ചെറിയ സൂചന പോലും മുഴുവൻ അനുഭവത്തെയും നശിപ്പിക്കും.
എല്ലാവരും അതേ ആവേശത്തോടെ ഇത് കാണട്ടെ...ചില അനുഭവങ്ങൾ തിയേറ്ററുകളിൽ നേരിട്ട് ആസ്വദിക്കുന്നതാണ് നല്ലത്....’’ എന്നാണ് മീന സോഷ്യല് മീഡിയയില് കുറിച്ചിരിക്കുന്നത്.
മീനയുടെ പോസ്റ്റിനെ പിന്തുണച്ച് നിരവധി പേര് കമന്റുകള് കുറിക്കുന്നുണ്ട്. ‘ശരിയാണ്...ഇക്കാലത്ത് ആളുകൾ എന്തിനാണ് രസകരമായ രംഗങ്ങൾ പോസ്റ്റ് ചെയ്യുന്നത് എല്ലാ സിനിമാനുഭവം തന്നെ നശിപ്പിക്കാറുണ്ട്, വളരെ നന്നായി പറഞ്ഞു, ഞങ്ങൾക്ക് വെറുപ്പ് സന്ദേശം വേണ്ട, ആദ്യ രണ്ട് ഭാഗങ്ങൾ ഞങ്ങൾക്ക് ഇഷ്ടപ്പെട്ടു, ഇതും മികച്ചതായിരിക്കും, സംശയമില്ല, അതിനാൽ ഞങ്ങൾക്ക് ആരിൽ നിന്നും അവലോകനങ്ങൾ ആവശ്യമില്ല...’ എന്നതടക്കമാണ് കമന്റുകള്.
ഇന്ന് റിലീസായ മോഹൻലാലിന്റെ ദൃശ്യം 3 കേരളത്തിലുടനീളം വമ്പൻ തരംഗമായി മാറിയിരിക്കുകയാണ്. ആദ്യ ഷോ മുതല് തന്നെ തിയേറ്ററുകള് ആരാധകരെക്കൊണ്ട് നിറഞ്ഞു കവിഞ്ഞു. അഡ്വാൻസ് ടിക്കറ്റ് ബുക്കിംഗില് പല റെക്കോർഡുകളും ഇതിനോടകം തകർന്നു കഴിഞ്ഞു. ഇന്ത്യൻ ബോക്സ് ഓഫീസില് ഒരു ചരിത്ര നേട്ടം തന്നെയാകും ചിത്രം കുറിക്കുക എന്നാണ് സൂചനകള്. ആദ്യ ഷോ കണ്ടിറങ്ങിയവരില് നിന്നെല്ലാം പോസിറ്റീവായ പ്രതികരണങ്ങള് മാത്രമാണ് വരുന്നത്.
മലയാള സിനിമയുടെ ഗതി തന്നെ മാറ്റിയ ഫ്രാഞ്ചൈസിയാണ് ദൃശ്യം. സാമ്പത്തികമായും അല്ലാതെയും ദൃശ്യം പരമ്പര മലയാള സിനിമയിലും മോഹന്ലാലിന്റെ കരിയറിലുമുണ്ടാക്കിയ ഇംപാക്ട് വളരെ വലുതാണ്. ജോര്ജുകുട്ടി എന്ന കഥാപാത്രം ഇന്ന് സിനിമയേക്കാളും ഉയരത്തില് വളര്ന്നു പന്തലിച്ചു നില്ക്കുകയാണ്.
മോഹൻലാലിനൊപ്പം മീന, എസ്തർ അനില്, അൻസിബ, സിദ്ദിഖ്, ആശ ശരത്, മുരളി ഗോപി എന്നിവർ ദൃശ്യം 3 യിലും പ്രധാന വേഷങ്ങളിലെത്തുന്നുണ്ട്. ആശീർവാദ് സിനിമാസിന്റെ ബാനറില് ആന്റണി പെരുമ്പാവൂരാണ് സിനിമ നിർമിച്ചിരിക്കുന്നത്.
