എണ്പതുകളും തൊണ്ണൂറുകളും കാലത്ത് ലോകമെമ്പാടുമുള്ള കുട്ടികളുടെ സൂപ്പർ ഹീറോ കഥാപാത്രമായിരുന്നു ഹീ-മാന്. ഒരു ഗ്രഹത്തെ തിന്മയിൽ നിന്ന് സംരക്ഷിക്കാന് തന്റെ അമാനുഷിക ശക്തി കൊണ്ട് ശ്രമിക്കുന്ന മാസ്റ്റേഴ്സ് ഓഫ് ദി യൂണിവേഴ്സിന്റെ നായകനാണ് ഹീ-മാന്. വര്ഷങ്ങള്ക്കിപ്പുറം ഈ കാര്ട്ടൂണ് ‘മാസ്റ്റേഴ്സ് ഓഫ് ദ് യൂണിവേഴ്സ്’ എന്ന പേരില് ഹോളിവുഡില് സിനിമയായി എത്തുകയാണ്. ജൂണ് 5ന് തിയേറ്ററുകളിലെത്തുന്ന ഈ സിനിമയ്ക്കായി കാത്തിരിക്കുകയാണ് ആരാധകര്.
ഇപ്പോഴിതാ ആക്ഷൻ ഫാന്റസി ചിത്രമായ മാസ്റ്റേഴ്സ് ഒഫ് ദി യൂണിവേഴ്സിന്റെ മലയാളം പതിപ്പില് ‘ഹീ-മാൻ’ എന്ന കഥാപാത്രത്തിന് ശബ്ദം നല്കുന്നത് താനാണെന്ന സന്തോഷം പങ്കിടുകയാണ് മലയാളത്തിന്റെ പ്രിയതാരം ഉണ്ണി മുകുന്ദന്. തന്റെയുള്ളില് നിന്ന് ജ്വലിച്ചതിന് നന്ദിയെന്നും ഇനി ഹീ മാന്റെ ശബ്ദം താനാണെന്നുമാണ് ഉണ്ണി മുകുന്ദന് സോഷ്യല് മീഡിയയില് കുറിച്ചത്.
‘‘അവർ നിന്നെ കേട്ടു, നിന്നെ അവഗണിച്ചു. എന്റെ ഉള്ളില് എരിയുന്നതിന് നന്ദി. നീയാണ് ഹീ-മാന്റെ ശബ്ദം...’ എന്ന കുറിപ്പിനൊപ്പമാണ് മല്ലു സിംഗ് എന്ന സിനിമയിലെ കഥാപാത്രത്തിന്റെ ചിത്രം പങ്കിട്ട് ഉണ്ണി മുകുന്ദൻ കുറിച്ചത്. സോണി പിക്ചേഴ്സും എംജിഎമ്മും ചേർന്ന് നിർമ്മിക്കുന്ന ചിത്രത്തില് ഹീ-മാന്റെ ഔദ്യോഗിക മലയാള ശബ്ദമാകാൻ കഴിഞ്ഞത് ജീവിതത്തിലെ വലിയ സ്വപ്നനിമിഷമാണെന്നും താരം കുറിച്ചിട്ടുണ്ട്.
കുട്ടിക്കാലം മുതല് ഹീ-മാൻ തന്റെ പ്രിയപ്പെട്ട കഥാപാത്രമായിരുന്നുവെന്നും, ഡബ്ബിങ് സമയത്ത് പഴയ ഓർമ്മകള് മനസിലേക്കെത്തി ഏറെ വികാരാധീനനായെന്നും ഉണ്ണി മുകുന്ദൻ സോഷ്യല് മീഡിയ കുറിപ്പില് പങ്കുവച്ചു.
‘‘90-കളിലെ ഒരു കുട്ടിയായിരുന്ന എനിക്ക് ഹീ-മാൻ ഒരിക്കലും ഒരു കഥാപാത്രമായിരുന്നില്ല... അവൻ ശക്തിയും ധൈര്യവും വീരത്വവുമായിരുന്നു...ഇന്ന്, ഇന്ന് ഞാൻ കുട്ടിക്കാലത്ത് ആരാധിച്ചിരുന്ന അതേ നായകന്റെ മലയാളം ശബ്ദമായി മാറുമ്പോള് ജീവിതം പൂർണമായ വൃത്തത്തിലേക്ക് എത്തിയിരിക്കുന്നു...
ഡബ്ബിംഗ് സ്റ്റുഡിയോയ്ക്കുള്ളിൽ നിന്ന് പറഞ്ഞു...‘എന്റെ ഉള്ളിലുള്ള ആ ശക്തി കൂടി വാ....’
‘ഗ്രേസ്കലിന്റെ ശക്തിയാൽ... എനിക്ക് ശക്തിയുണ്ട്...’അഗാധമായ വൈകാരികതയും അസാമാന്യതയും നിറഞ്ഞതായിരുന്നു അത്... ഒരു നിമിഷം, ഞാൻ ഒരു നടനായിരുന്നില്ല... ഹീ-മാന്റെ മാന്ത്രികതയിൽ മുഴുകിയ ആ കൊച്ചുകുട്ടിയായി ഞാൻ വീണ്ടും മാറി... സ്വപ്നങ്ങൾ യാഥാർത്ഥ്യമാകുന്നു...
ജൂൺ 5 ന് മാസ്റ്റേഴ്സ് ഓഫ് ദി യൂണിവേഴ്സ് തിയേറ്ററിൽ കാണുക... മലയാളം ട്രെയിലർ ആസ്വദിക്കൂ...’’ എന്നാണ് ഉണ്ണി മുകുന്ദന് കുറിച്ചത്. സോണി പിക്ചേഴ്സ്,, എംജിഎം ലൈവ് എന്നിവർ ചേർന്നാണ് ചിത്രം വിതരണം ചെയ്യുന്നത്. ഒപ്പം ഡബ്ബിംഗിന്റെ വീഡിയോയും താരം പങ്കുവച്ചിട്ടുണ്ട്.
