പലര്ക്കും കിടക്കുന്നതിന് മുന്പ് ചെറുചൂടുള്ള പാല് കുടിക്കുന്ന ശീലമുണ്ട്. കുട്ടിക്കാലം മുതല്ക്കേ പലരുടെയും ജീവിതത്തിന്റെ ഭാഗവുമാണിത്. തലമുറകളായി അമ്മമാര് രാത്രിയില് മക്കള്ക്ക് ഒരു ഗ്ലാസ് ചൂടുപാല് നല്കാറുണ്ട്. കാലക്രമേണ, പല വീടുകളിലും ഇതൊരു ഉറക്കകാല ദിനചര്യയായി മാറി. രാത്രിയിലെ പാല്കുടി സാധാരണയായി മനസ്സിന് അയവുണ്ടാക്കാനും നല്ല ഉറക്കത്തിനും സഹായിക്കുമെന്നാണ് കരുതപ്പെടുന്നത്. എന്നാല് വൈദ്യശാസ്ത്രപരമായി നോക്കിയാല്, രാത്രിയില് പാല് കുടിക്കുന്നത് കൊണ്ട് ശരിക്കും ഗുണങ്ങളുണ്ടോ? പാല് നല്ല ഉറക്കത്തിന് സഹായിക്കും എന്ന പൊതുവായ വിശ്വാസത്തില് എത്രത്തോളം സത്യമുണ്ട്? രാത്രിയില് പാല് കുടിക്കുന്നത് ശരിയാണോ?. ഡല്ഹിയിലെ ധര്ംശില നാരായണ സൂപ്പര്സ്പെഷ്യാലിറ്റി ഹോസ്പിറ്റലിലെ സീനിയര് കണ്സള്ട്ടന്റും ഗ്യാസ്ട്രോഎന്ട്രോളജി (ദഹനേന്ദ്രിയ രോഗവിഭാഗം) മേധാവിയുമായ ഡോ. അശോക് കുമാര് പ്രമുഖ ദേശീയ മാധ്യമത്തോട് ഇതേക്കുറിച്ച് വിശദീകരിച്ചിരുന്നു..
സമയത്തിനനുസരിച്ച് പാലിന്റെ പോഷകഗുണം മാറുമോ?
കിടക്കാന് നേരം പാല് കുടിക്കുമ്പോള് അത് ദഹിക്കാന് ബുദ്ധിമുട്ട് (heavy) ആകുമെന്നും ഗുണം കുറയുമെന്നും പലരും വിശ്വസിക്കുന്നു. എന്നാല് വൈദ്യശാസ്ത്രപരമായി ഇതില് സത്യമില്ലെന്ന് ഡോക്ടര് വ്യക്തമാക്കി. പാല് ഏത് സമയത്ത് കുടിച്ചാലും അതിലെ പോഷകങ്ങള് ഒരുപോലെയായിരിക്കും. 'പാല് രാവിലെ കുടിച്ചാലും രാത്രി കിടക്കാന് നേരം കുടിച്ചാലും അതിലെ പോഷകങ്ങള് മാറുന്നില്ല - എല്ലുകള്ക്ക് കാല്സ്യവും, പേശികള്ക്ക് പ്രോട്ടീനും, നാഡികള്ക്ക് മഗ്നീഷ്യവും, കൂടാതെ അവശ്യ വിറ്റാമിനുകളും ഇതിലുണ്ട്,' അദ്ദേഹം പറയുന്നു.
പാല് കുടിച്ചാല് കൂടുതല് ഉറക്കം വരുമോ?
പാല് കുടിക്കുന്നത് നല്ല ഉറക്കവുമായി പണ്ടുമുതലേ ബന്ധപ്പെട്ടിരിക്കുന്നു, ഇപ്പോള് ഇതിന് പിന്നില് കൃത്യമായ ശാസ്ത്രീയ കാരണമുണ്ടെന്ന് വ്യക്തമായിട്ടുണ്ട്. ശരീരത്തിന് വിശ്രമം നല്കാന് പാല് സഹായിക്കുമെന്ന് ഡോക്ടര് വിശദീകരിക്കുന്നു. 'പാലിലുള്ള 'ട്രിപ്റ്റോഫാന്' (Tryptophan) എന്ന അമിനോ ആസിഡ്, ഉറക്കത്തെ നിയന്ത്രിക്കാന് സഹായിക്കുന്ന 'മെലാടോണിന്' (Melatonin) എന്ന ഹോര്മോണ് ഉത്പാദിപ്പിക്കാന് സഹായിക്കുന്നു. പണ്ടുമുതലേ പാല് ഉറക്കത്തിന്റെ ഗുണനിലവാരവുമായി ബന്ധപ്പെട്ടു കിടക്കുന്നതിന്റെ പ്രധാന കാരണങ്ങളിലൊന്ന് ഇതാണ്,' - അദ്ദേഹം പറഞ്ഞു. ചെറുചൂടുള്ള പാല് മാനസിക സമ്മര്ദ്ദം കുറയ്ക്കാനും ശാന്തത നല്കാനും സഹായിക്കുമെന്നും ഡോ. കുമാര് ചൂണ്ടിക്കാണിച്ചു. എങ്കിലും, ഉറക്കം വരാനുള്ള മാര്ഗമായി ഇതിനെ കാണരുത്. മറിച്ച്, പാല് കുടിച്ചാല് ദഹനക്കേട് ഉണ്ടാകാത്തവര്ക്ക്, രാത്രിയില് ശരീരം തണുപ്പിക്കാനുള്ള ഒരു നല്ല ശീലമായി ഇതിനെ കൂടെക്കൂട്ടാം.
രാത്രി പാല് കുടിക്കുന്നത് കൊണ്ടുള്ള ദോഷങ്ങള് എന്തെല്ലാം?
പാല് മികച്ച പോഷകങ്ങള് നല്കുന്നുണ്ടെങ്കിലും, രാത്രിയില് പാല് കുടിക്കുന്നത് എല്ലാവര്ക്കും അനുയോജ്യമാകണമെന്നില്ല. പ്രത്യേകിച്ച് 'ലാക്ടോസ് ഇന്ടോളറന്സ്' (Lactose intolerance - പാലിലെ പഞ്ചസാര ദഹിപ്പിക്കാനുള്ള ബുദ്ധിമുട്ട്) ഉള്ളവരില് പാല് കുടിച്ച ശേഷം ദഹനക്കേട് ഉണ്ടാകുന്നത് സാധാരണമാണ്. ഇതുകൂടാതെ അസിഡിറ്റി, വയര് വീര്ക്കല്, ശരീരഭാരം കൂടുക എന്നിവയും രാത്രിയിലെ പാല്കുടി കൊണ്ടുണ്ടാകാം.
'പാലില് 'ലാക്ടോസ്' അടങ്ങിയിട്ടുണ്ട്. ഇത് പലര്ക്കും ദഹിപ്പിക്കാന് ബുദ്ധിമുട്ടുള്ള ഒരു തരം പഞ്ചസാരയാണ്. ഇത് വയര് വീര്ക്കല്, ഗ്യാസ്, വയറുവേദന അല്ലെങ്കില് വയറിളക്കം എന്നിവയ്ക്ക് കാരണമാകാം. മറ്റ് ചിലര്ക്ക്, പ്രത്യേകിച്ച് കൊഴുപ്പ് കൂടിയ പാല് (full fat milk) കുടിച്ച ഉടന് തന്നെ കിടന്നുറങ്ങുന്നവര്ക്ക് നെഞ്ചെരിച്ചിലോ അസിഡിറ്റിയോ ഉണ്ടായേക്കാം. കൂടാതെ ദിവസേന പാല് കുടിക്കുകയും മറ്റ് ഭക്ഷണങ്ങളില് നിന്നുള്ള കലോറി കുറയ്ക്കാതിരിക്കുകയും ചെയ്താല് കാലക്രമേണ ശരീരഭാരം കൂടാനും ഇത് കാരണമാകും.'- അദ്ദേഹം പറയുന്നു.
രാത്രി കിടക്കാന് നേരം ആരൈാക്കെ പാല് ഒഴിവാക്കണം?
ഭൂരിഭാഗം ആളുകള്ക്കും രാത്രി പാല് കുടിക്കുന്നത് സുരക്ഷിതമാണെങ്കിലും, ചില ആരോഗ്യപ്രശ്നങ്ങള് ഉള്ളവര് രാത്രിയില് ഇത് ഒഴിവാക്കുന്നതാണ് നല്ലത്. ഡോക്ടര് നിര്ദ്ദേശിക്കുന്ന വിഭാഗങ്ങള് ഇവരാണ്:
* ശരീരഭാരം കുറയ്ക്കാന് ശ്രമിക്കുന്നവര്
* വിട്ടുമാറാത്ത അസിഡിറ്റി അല്ലെങ്കില് നെഞ്ചെരിച്ചില് (Acid reflux) ഉള്ളവര്
* ലാക്ടോസ് ഇന്ടോളറന്സ് ഉള്ളവര്
