ഇന്ത്യയിലെ മെട്രോ നഗരങ്ങളിലെ മലിനീകരണത്തെയും ഗതാഗതക്കുരുക്കിനെയും പരിഹസിച്ച് ഗുജറാത്തിലെ അഹമ്മദാബാദ് നഗരത്തെ വേറിട്ട രീതിയില്‍ പുകഴ്ത്തിയുള്ള യുവാവിന്റെ എക്‌സ് കുറിപ്പാണ് ഇപ്പോള്‍ സോഷ്യല്‍ മീഡിയയില്‍ തരംഗമാകുന്നത്. പ്രേം സോണി എന്ന യുവാവാണ് അഹമ്മദാബാദ് ജീവിക്കാന്‍ കൊള്ളാത്ത നഗരമാണെന്ന തരത്തില്‍ തികച്ചും വൈരുദ്ധ്യാത്മകവും രസകരവുമായ കുറിപ്പ് പങ്കുവെച്ചത്. 'അഹമ്മദാബാദ് ഒരു പ്രതീക്ഷയ്ക്കും വക നല്‍കാത്ത ടിയര്‍ 2 നഗരമാണ്, ദയവായി ആരും ഇങ്ങോട്ടേക്ക് താമസം മാറി വരരുത്' എന്ന് പറഞ്ഞുകൊണ്ടാണ് കുറിപ്പ് ആരംഭിക്കുന്നത്.
തുടര്‍ന്ന് നഗരത്തിലെ സവിശേഷതകളെ ഓരോന്നായി പരിഹാസ രൂപേണ പ്രേം സോണി കുറിപ്പില്‍ അക്കമിട്ട് നിരത്തുന്നുണ്ട്. പുലര്‍ച്ചെ രണ്ട് മണിക്ക് സ്ത്രീകള്‍ ഭയമില്ലാതെ ഐസ്‌ക്രീം കഴിച്ച് കറങ്ങിനടക്കുന്നതിനാല്‍ ഇവിടെ അതിജീവനത്തിന്റെ ത്രില്ലില്ലെന്നാണ് യുവാവിന്റെ ആദ്യ പരിഹാസം. മറ്റ് ഭാഷകള്‍ സംസാരിക്കുന്നവരോട് നാട്ടുകാര്‍ മുറിഹിന്ദിയില്‍ സംസാരിച്ച് സഹായിക്കുമെന്നും, ഇവിടെ ഭാഷയുടെ പേരില്‍ ഭീഷണികളോ കടകളുടെ ബോര്‍ഡ് തകര്‍ക്കലോ ഇല്ലെന്നും യുവാവ് കുറിച്ചു.
നഗരത്തിലെ മികച്ച റോഡുകളെയും ഗതാഗത സൗകര്യങ്ങളെയും യുവാവ് കുറിപ്പിലൂടെ അഭിനന്ദിക്കുന്നുണ്ട്. ഇവിടെ എവിടെയും 20 മിനിറ്റ് കൊണ്ട് എത്താറുണ്ടെന്നും, മണിക്കൂറുകളോളം ഗതാഗതക്കുരുക്കില്‍ കിടക്കാത്തതിനാല്‍ ഓഡിയോ ബുക്കുകള്‍ കേട്ടുതീര്‍ക്കാനോ ജീവിതത്തിലെ പ്രധാന തീരുമാനങ്ങള്‍ ആലോചിക്കാനോ സമയം കിട്ടുന്നില്ലെന്നും പ്രേം പറയുന്നു. റോഡില്‍ വണ്ടികള്‍ മുട്ടിയാല്‍ പോലും ആളുകള്‍ ഹോക്കി സ്റ്റിക്കുമായി ഇറങ്ങാതെ ക്ഷമ പറയുന്ന ബോറിങ് നഗരമാണിതെന്നും യുവാവ് കൂട്ടിച്ചേര്‍ത്തു.
മയക്കുമരുന്ന് മാഫിയകളോ ഗുണ്ടാ സംഘങ്ങളോ ഇല്ലാത്ത സുരക്ഷിതമായ നഗരമാണിതെന്നും, അതിനാല്‍ ജീവിതത്തിന്റെ പകുതിയും ഗതാഗതക്കുരുക്കില്‍ ചെലവഴിച്ച് മോശം വായു ശ്വസിക്കാന്‍ താല്പര്യപ്പെടുന്നവര്‍ സ്വന്തം മെട്രോ നഗരങ്ങളില്‍ തന്നെ തുടരുന്നതാണ് നല്ലതെന്നും പറഞ്ഞാണ് പോസ്റ്റ് അവസാനിക്കുന്നത്. ചുരുങ്ങിയ സമയം കൊണ്ട് വലിയ ചര്‍ച്ചകള്‍ക്ക് വഴിവെച്ച ഈ 'സര്‍ക്കാസം പോസ്റ്റ്' സോഷ്യല്‍ മീഡിയയില്‍ ഇതിനകം വലിയ ശ്രദ്ധ നേടിക്കഴിഞ്ഞു.
എന്നാല്‍ പ്രേം സോണി പറയുന്ന കാര്യങ്ങള്‍ പലതും വാസ്തവ വിരുദ്ധമാണെന്ന് ചൂണ്ടിക്കാട്ടി ഒട്ടേറെപ്പേര്‍ കമന്റുകളുമായി രംഗത്തെത്തിയിട്ടുണ്ട്. ഈ പറയുന്ന കാര്യങ്ങളെല്ലാം അത്രത്തോളം സത്യമാണെങ്കില്‍ അഹമ്മദാബാദിലുള്ള നിരവധി ആളുകള്‍ എന്തിനാണ് മുംബൈ പോലുള്ള നഗരങ്ങളിലേക്ക് കുടിയേറുന്നത് എന്ന് ചിലര്‍ ചോദിക്കുന്നു. കുറിപ്പില്‍ പറയുന്ന 90 ശതമാനം കാര്യങ്ങളും അതിശയോക്തി കലര്‍ന്നതാണെന്നാണ് ഭൂരിഭാഗം ആളുകളുടെയും വിമര്‍ശനം.
Comments