വിവാഹശേഷം ഭര്ത്താവിനൊപ്പം വിദേശത്ത് പുതിയൊരു ജീവിതം സ്വപ്നം കാണുന്ന സ്ത്രീകള്ക്ക് ജാഗ്രതാ നിര്ദേശമായി മാറുകയാണ് ഒരു സോഷ്യല് മീഡിയാ പോസ്റ്റ്. ധനകാര്യ വിദഗ്ദ്ധയായ 'ഡീബേലീഫ്' എന്ന യുവതി തന്റെ എക്സ് ഹാന്ഡിലിലൂടെ പങ്കുവെച്ച ബന്ധുവിന്റെ ദുരനുഭവമാണ് ഇപ്പോള് പ്രവാസി മലയാളികള്ക്കിടയിലും വലിയ ചര്ച്ചയായിരിക്കുന്നത്.
വിദേശത്തെത്തിയ തന്റെ കസിനെ കാത്തിരുന്നത് കടുത്ത ഒറ്റപ്പെടലും കുടുംബ മഹിമയുടെ പേരില് അടിച്ചേല്പ്പിച്ച വീട്ടുജോലികളുമായിരുന്നെന്ന് യുവതി പറയുന്നു. ഒടുവില് മാനസിക പീഡനങ്ങളും ദാമ്പത്യത്തിലെ അസ്വാരസ്യങ്ങളും സഹിക്കാനാവാതെ ഭര്ത്താവിനെ ഉപേക്ഷിച്ച് അവര് ഇന്ത്യയിലേക്ക് മടങ്ങുകയായിരുന്നു.
ആദ്യമൊക്കെ വിദേശത്തെ മനോഹരമായ കാഴ്ചകളും റോഡുകളും ആകര്ഷിച്ചെങ്കിലും, വൈകാതെ താന് സാമൂഹിക ജീവിതമില്ലാത്ത, 24 മണിക്കൂറും ശമ്പളമില്ലാതെ പണിയെടുക്കുന്ന ഒരു അടിമ മാത്രമാണെന്ന് അവള് തിരിച്ചറിഞ്ഞു. സംസ്കാരവും കുടുംബ മഹിമയും നിലനിര്ത്താന് എന്ന വ്യാജേന ഭര്ത്താവിന്റെ വീട്ടുകാര് അവളെ ചൂഷണം ചെയ്യുകയായിരുന്നുവെന്നും പോസ്റ്റില് വ്യക്തമാക്കുന്നു.
പല യുവതികളും സമാനമായ സാഹചര്യങ്ങളില് വിദേശത്ത് അകപ്പെട്ടുപോയിട്ടുണ്ടെന്നും എന്നാല് കുടുംബത്തിന്റെയും സമൂഹത്തിന്റെയും സമ്മര്ദ്ദം കാരണം അവര്ക്ക് ഇത്തരം ബന്ധങ്ങളില് നിന്ന് ഇറങ്ങിപ്പോരാന് കഴിയുന്നില്ലെന്നും യുവതി കൂട്ടിച്ചേര്ക്കുന്നു. പ്രവാസി ജീവിതം പലപ്പോഴും പുറമെ കാണുന്നത്ര തിളക്കമുള്ളതല്ലെന്ന ഓര്മ്മപ്പെടുത്തലോടെയാണ് പോസ്റ്റ് അവസാനിക്കുന്നത്.
