നടി സാമന്തയും നാഗ ചൈതന്യയും വിവാഹമോചിതരായതിന് പിന്നാലെ സോഷ്യല് മീഡിയയില് നാഗചൈതന്യയ്ക്ക് നേരെയുളള സൈബര് അറ്റാക്ക് ഉയര്ന്നിരുന്നു. ഇപ്പോഴിതാ തന്റെ വ്യക്തിത്വ അവകാശങ്ങള് സംരക്ഷിക്കണമെന്ന് ആവശ്യപ്പെട്ട് ഹൈക്കോടതിയെ സമീപിച്ചിരിക്കുകയാണ് നടന്. മുന്ഭാര്യ സാമന്ത റൂത്ത് പ്രഭുവിനെ നാഗചൈതന്യ ചതിച്ചുവെന്നും അവരുടെ കരിയര് നശിപ്പിച്ചു എന്നും സൂചിപ്പിക്കുന്ന തരത്തിലുളള വീഡിയോകള് തന്റെ അന്തസ്സിനെ ബാധിക്കുന്നുവെന്ന് കാണിച്ചാണ് നാഗചൈതന്യ പരാതി നല്കിയിരിക്കുന്നത്.
പേരും ചിത്രവും അനുമതിയില്ലാതെ വാണിജ്യ ആവശ്യങ്ങൾക്കായി ഉപയോഗിക്കുന്നത് തടയണമെന്നും നടൻ ഹർജിയിൽ പറയുന്നു. അനധികൃത മെർച്ചൻഡൈസ് ലിസ്റ്റിംഗുകൾ, എഐ ഉപയോഗിച്ച് നിർമിച്ച ഉള്ളടക്കങ്ങൾ, അശ്ലീലമായ സെർച്ച് ടേമുകൾ എന്നിവയ്ക്കെതിരെയാണ് നടൻ കോടതിയെ സമീപിച്ചിരിക്കുന്നത്. പല വെബ്സൈറ്റുകളും ട്രാഫിക് വർദ്ധിപ്പിക്കാനായി ചൈതന്യയുടെ പേരിനൊപ്പം മോശമായ സെർച്ച് ടേമുകൾ ഉപയോഗിക്കുന്നതായും കോടതിയെ അറിയിച്ചു.
ഡീപ്പ് ഫേക്ക് സാങ്കേതികവിദ്യ, വോയ്സ് ക്ലോണിംഗ്, എഐ ടൂളുകൾ എന്നിവ ഉപയോഗിച്ച് വ്യാജമായ ദൃശ്യശ്രവ്യ ഉള്ളടക്കങ്ങൾ നിർമിച്ച് പ്രചരിപ്പിക്കുന്നത് സ്വകാര്യതയ്ക്ക് വലിയ ദോഷം വരുത്തുന്നുവെന്ന് ഹർജിയിൽ പറയുന്നു. പരാതിയിൽ പറയുന്ന ചില ലിങ്കുകൾ അതിർവരമ്പുകൾ ലംഘിക്കുന്നവയാണെന്നും കോടതി നിരീക്ഷിച്ചു. ഈ കേസിൽ കൂടുതൽ വാദം കേൾക്കുന്നതിനായി സെപ്റ്റംബർ 30-ലേക്ക് മാറ്റിയിരിക്കുകയാണ്.
നാഗചൈതന്യയും സാമന്തയും വര്ഷങ്ങള് നീണ്ട പ്രണയത്തിനുശേഷം ശേഷം 2017-ല് വിവാഹിതരാവുകയും 2021-ല് വിവാഹമോചനം നേടുകയും ചെയ്തു. എന്തുകൊണ്ടാണ് വിവാഹം ബന്ധം പിരിയുന്നതെന്ന് സാമന്തയും നാഗ ചൈതന്യയും വെളിപ്പെടുത്തിയിരുന്നില്ല. നാഗ ചൈതന്യ പിന്നീട് നടി ശോഭിത ധൂലിപാലയെ വിവാഹംചെയ്തു. സാമന്ത സംവിധായകന് രാജ് നിദിമോരുവിനേയും വിവാഹം കഴിച്ചു.
