ലണ്ടന് തെരുവില് പോളറോയ്ഡ് ക്യാമറയുമായി ഇറങ്ങി വെറും 10 മിനിറ്റ് കൊണ്ട് മികച്ച വരുമാനമുണ്ടാക്കി അമ്പരപ്പിച്ച ഒരു ഇന്ത്യന് വംശജന്റെ അനുഭവമാണ് ഇപ്പോള് സോഷ്യല് മീഡിയയില് തരംഗമാകുന്നത്. ലണ്ടനില് താമസിക്കുന്ന വിഷ്ണു വിജയധരന് എന്ന ഇന്ത്യന് വംശജനായ യുവാവാണ് തെരുവില് വെച്ച് വെറും 10 മിനിറ്റില് 1,200 രൂപയോളം സമ്പാദിച്ചത്. എന്നാല് ഈ സന്തോഷം അധികനേരത്തേക്കുണ്ടായില്ല. സംഭവം അറിഞ്ഞതും തൊട്ടുപിന്നാലെ അധികൃതര് ഇടപെട്ട് തടഞ്ഞു. ഇന്സ്റ്റാഗ്രാമില് പങ്കുവെച്ച ഒരു വീഡിയോയിലൂടെയാണ് വിഷ്ണു തന്റെ ഈ വ്യത്യസ്തമായ പരീക്ഷണം പങ്കുവെച്ചത്. ലണ്ടനിലെ തിരക്കേറിയ ടൂറിസ്റ്റ് കേന്ദ്രങ്ങളില് എത്തുന്ന സഞ്ചാരികളുടെ ചിത്രങ്ങള് പോളറോയ്ഡ് ക്യാമറയില് പകര്ത്തി, ഒരു ചിത്രത്തിന് 5 പൗണ്ട് (ഏകദേശം 644 രൂപ) നിരക്കില് വില്ക്കുകയായിരുന്നു ഇയാളുടെ പദ്ധതി. 'നിങ്ങളുടെ വിസ നാളെ അവസാനിക്കുകയാണെങ്കില് മാത്രം ഇത് പരീക്ഷിക്കുക' എന്ന് തമാശരൂപേണ കുറിച്ചുകൊണ്ടാണ് വിഷ്ണു വീഡിയോ പങ്കുവെച്ചിരിക്കുന്നത്.
തുടര്ച്ചയായി 38 ചിത്രങ്ങള് വരെ എടുക്കാന് കഴിയുന്ന ഒരു കോഡാക് ക്യാമറ ഇതിനായി താന് വാങ്ങിയതായി വിഷ്ണു വീഡിയോയില് പറയുന്നുണ്ട്. പല വിനോദസഞ്ചാരികളും താല്പര്യത്തോടെ ഫോട്ടോയെടുക്കാന് ഇയാളെ സമീപിക്കുകയും ചെയ്തു. ഇതിലൂടെ ലക്ഷങ്ങള് സമ്പാദിക്കാമെന്ന് താന് ആത്മാര്ത്ഥമായി ചിന്തിച്ചു തുടങ്ങിയ നിമിഷത്തിലാണ് അടുത്ത കസ്റ്റമറായി പൊലീസ് എത്തിയതെന്ന് വിഷ്ണു പറയുന്നു. ലണ്ടന് നിയമപ്രകാരം മുന്കൂട്ടി അനുമതിയില്ലാതെ പൊതുസ്ഥലങ്ങളില് തെരുവ് കച്ചവടം നടത്തുന്നത് നിരോധിച്ചിട്ടുള്ളതിനാല്, ഏകദേശം 11 പൗണ്ട് സമ്പാദിച്ചപ്പോഴേക്കും പൊലീസും സിറ്റി എന്ഫോഴ്സ്മെന്റ് ഉദ്യോഗസ്ഥരും എത്തി ഇയാളെ തടയുകയായിരുന്നു. കൗണ്സിലിന്റെ അനുമതിയുണ്ടെങ്കില് ഇവിടെ മണിക്കൂറില് 100 പൗണ്ട് വരെ എളുപ്പത്തില് ഉണ്ടാക്കാമെന്നും ഇയാള് കൂട്ടിച്ചേര്ത്തു.
സോഷ്യല് മീഡിയയില് പങ്കുവെച്ച് ചുരുങ്ങിയ ദിവസങ്ങള്ക്കകം ലക്ഷക്കണക്കിന് ആളുകളാണ് ഈ വീഡിയോ കണ്ടത്. വിഷ്ണുവിന്റെ ഈ ശ്രമത്തെ അനുകൂലിച്ചും പ്രശംസിച്ചും നിരവധിപ്പേര് കമന്റുകളുമായി രംഗത്തെത്തിയിട്ടുണ്ട്. ജനങ്ങളെ ഒരേസമയം രസിപ്പിക്കുകയും ആകര്ഷിക്കുകയും ചെയ്യുന്ന പുതിയ ആശയങ്ങളുമായി വരുന്ന ഒരു ക്രിയേറ്ററാണ് ഇയാളെന്നും, കൃത്യമായ അനുമതി വാങ്ങി ഇതൊരു സൈഡ് ബിസിനസ്സ് ആയി ചെയ്താല് സാധാരണ ജോലിയേക്കാള് കൂടുതല് പണം സമ്പാദിക്കാന് കഴിയുമെന്നും പലരും കമന്റ് ചെയ്തു. അതേസമയം, നിയമം ലംഘിച്ചതിന് ഇയാള്ക്ക് പിഴ ഒടുക്കേണ്ടി വന്നോ എന്ന് ചോദിച്ചവരും കുറവല്ല.
