ഇരുപത്തഞ്ചു വയസ്സില് തന്നെ മലയാള സിനിമയിലെ ഏറ്റവും പ്രതീക്ഷ നൽകുന്ന യുവതാരങ്ങളിൽ ഒരാളായി മാറിയ അഭിനേതാവാണ് നസ്ലെൻ കെ. ഗഫൂർ. ഈ പ്രായത്തിനിടയില് തന്നെ 100 കോടി ക്ലബ്ബില് കയറി തരംഗമായി മാറിയ രണ്ടു സിനിമകളില് പ്രധാന കഥാപാത്രമായത് നസ്ലെനായിരുന്നു. തണ്ണീർ മത്തൻ ദിനങ്ങൾ എന്ന കോമഡി കമിങ്-ഓഫ്-ഏജ് ഡ്രാമ ചിത്രത്തിലൂടെ തന്റെ അഭിനയ ജീവിതം തുടങ്ങിയ താരം പിന്നീട് ചുരുങ്ങിയ കാലം കൊണ്ട് മലയാളത്തിലെ മുന്നിര നായകനായി മാറി.
മലയാളസിനിമാപ്രേക്ഷകരുടെ ഹൃദയം കവര്ന്ന മുന്നിര നായകന്മാരിലൊരാളായ നസ്ലെനും യുവതാരങ്ങളായ അടത്തിടെ മലയാള സിനിമയില് തരംഗമായി മാറിയ ഹാഷിര്, സന്ദീപ് പ്രദീപ് എന്നിവരും തമ്മില് പ്രശ്നങ്ങളുണ്ടെന്ന തരത്തില് സോഷ്യല് മീഡിയയില് ചര്ച്ചകള് വന്നിരുന്നു. അടുത്തിടെ തിയേറ്ററിലെത്തിയ ചിത്രങ്ങളിലൂടെ ഹാഷിറിനും സന്ദീപിനും വലിയൊരു ആരാധകവൃന്ദത്തെ ലഭിച്ചതോടെ, ഇവരില് ആരാണ് പുതിയ തലമുറയിലെ യഥാര്ഥ ‘ന്യൂജെന് കിംഗ്’ എന്ന തരത്തില് സോഷ്യല് മീഡിയയില് വലിയ സംവാദങ്ങളും താരതമ്യങ്ങളും ഉയര്ന്നിരുന്നു.
ഇപ്പോഴിതാ തങ്ങള്ക്കിടയില് യാതൊരുവിധത്തിലുള്ള ശത്രുതയോ മത്സരമോ ഇല്ലെന്ന് പറയുകയാണ് നസ്ലെന്. തങ്ങളെല്ലാവരും തമ്മില് നല്ല കമ്പിനിയാണെന്നും എല്ലാവരും ഒരുമിച്ചൊരു സിനിമ വരാനും സാധ്യതയുണ്ടെന്നുമാണ് നസ്ലെന് പറയുന്നത്.
‘‘സന്ദീപിന്റെ ഏതെങ്കിലും സിനിമ ഇറങ്ങുമ്പോള് പിന്നീട് സോഷ്യല് മീഡിയയില് നസ്ലെനെ വഴി മാറി നിക്ക്, നസ്ലെനെ മോനെ നീയൊക്കെ തീർന്നെടാ, എന്നെല്ലാമാണ് കമന്റുകള് വരുന്നത്. പുതിയ താരങ്ങൾ വരുമ്പോൾ സോഷ്യൽ മീഡിയയിൽ പലരും എന്നോട് പറയാറുള്ളത് ഇതാണ്. ‘വാഴ 2’ വന്നപ്പോഴും ഇങ്ങനൊക്കെ തന്നെയാണ്, ഞാന് എന്ത് ചെയ്തിട്ടാണ് ഇങ്ങനൊക്കെ പറയുന്നതെന്ന് എനിക്കറിയില്ല. പക്ഷെ ഞങ്ങളെല്ലാവരും തമ്മില് നല്ല കമ്പിനിയാണെന്ന് ഇവര്ക്ക് അറിയില്ലലോ. ഞങ്ങളെല്ലാവവരും ഒരുമിച്ചൊരു സിനിമ വരാനും സാധ്യതയുണ്ട്.
ഹാഷിറിനെ സിനിമയില് എത്തുന്നതിന് മുന്പേ തന്നെ അറിയാം. ഇന്സ്റ്റാഗ്രാം റീലുകള് സ്ഥിരമായി കാണാറുണ്ടായിരുന്നു. അടുത്തിടെ തരംഗമായി മാറിയ ‘വാഴ’ സിനിമ കണ്ടതിന് ശേഷം ഞാന് അവരെ എല്ലാവരെയും വ്യക്തിപരമായി വിളിച്ച് അഭിനന്ദനം അറിയിച്ചിരുന്നു. സോഷ്യല് മീഡിയയിലെ ഇത്തരം താരതമ്യങ്ങള് ഒരു സൈക്കിള് പോലെയാണ് കറങ്ങിത്തിരിഞ്ഞ് വരുന്നത്. മുന്പ് സന്ദീപ് പ്രദീപിന്റെ ചിത്രങ്ങള് ഹിറ്റായപ്പോള് അന്ന് ആളുകള് പറഞ്ഞത് സന്ദീപ് തന്നെക്കാള് മുന്നിലാണെന്നായിരുന്നു. ഇപ്പോള് അത് ഹാഷിറിലേക്ക് എത്തിയിരിക്കുന്നു.
ഇതൊരു സൈക്കിൾ പോലെയാണ് നാളെ ഞാൻ ഈ മാല സന്ദീപിനോ ഹാഷിറിനോ ഇട്ടുകൊടുക്കും...’’ നസ്ലെന് പറഞ്ഞു. തന്റെ ഏറ്റവും പുതിയ ചിത്രമായ മോളിവുഡ് ടൈംസിന്റെ പ്രൊമോഷന്റെ ഭാഗമായി നല്കിയ അഭിമുഖത്തിലാണ് താരമിത് പറഞ്ഞത്.
മുകുന്ദനുണ്ണി അസോസിയേറ്റ്സിന് ശേഷം അഭിനവ് സുന്ദര് നായക് സംവിധാനം ചെയ്യുന്ന ചിത്രത്തിന്റെ റിലീസിനായി സിനിമാപ്രേമികള് കാത്തിരിക്കുകയാണ്. പുതിയ സ്റ്റൈലിലാണ് നസ്ലെന് ഈ ചിത്രത്തിലെത്തുന്നത്. നസ്ലെന് അവതരിപ്പിക്കുന്ന വിനീത് മാധവന് എന്ന കഥാപാത്രവും സംവിധായകന് ആകാനുള്ള അയാളുടെ യാത്രയുമാണ് സിനിമ പറയുന്നത്. ജൂണ് അഞ്ചിന് ചിത്രം തിയേറ്ററുകളില് എത്തും.
