ഇന്ത്യയുടെ അഭിമാനം വാനോളം ഉയര്ത്തി വിശ്വസുന്ദരി പട്ടം നേടിയ താരമാണ് സുസ്മിത സെന്. ഫാഷന് റാമ്പുകളില് നിന്ന് സുസ്മിത നടന്നു കയറിയത് വിശ്വസുന്ദരി കിരീടത്തിലേക്കാണ്. അവിടെ നിന്ന് ബോളിവുഡിന്റെ പ്രിയ അഭിനേത്രിയായി മാറാനും താരത്തിന് കഴിഞ്ഞു. ചുരുക്കം സിനിമകളിലൂടെ തന്നെ തന്റെ അഭിനയമികവ് പ്രകടമാക്കിയാണ് താരം ഹിന്ദി സിനിമാലോകത്തിന്റെ പ്രിയങ്കരിയായത്.
വ്യക്തിജീവിതത്തിലും പലര്ക്കും പ്രചോദനമായ താരം കൂടിയാണ് സുസ്മിത. ദത്തുപുത്രിമാരായ റെനെയുടെയും അലീഷ സെന്നിന്റെയും സിംഗിള് മദര് എന്ന നിലയില് മാത്രമല്ല, തന്നെ നേരിടാനെത്തിയ ഹൃദയാഘാതത്തെ പോലും സുസ്മിത ധീരമായി നേരിട്ടു. പ്രതിസന്ധികളെ പുഞ്ചിരിയോടെയും അചഞ്ചലമായ ധൈര്യത്തോടെയും കീഴടക്കിയ സുസ്മിത അതിനു ശേഷം വെബ് സീരിസുകളിലും അഭിനയിച്ച് കരിയറിലും തിളങ്ങി. പ്രണയത്തിന്റെ പേരിലും താരം ഇടയ്ക്ക് വാര്ത്തകളില് നിറഞ്ഞിരുന്നു. ബിസിനസുകാരനും ഐ.പി.എൽ ചെയർമാനുമായിരുന്ന ലളിത് മോദിയും സുസ്മിത സെന്നും തമ്മിലുള്ള പ്രണയം ഒരുകാലത്ത് ഏറെ ചർച്ച ചെയ്യപ്പെട്ടതാണ്. പിന്നീട് അധികകാലം കഴിയും മുമ്പ് തങ്ങള് ബ്രേക്കപ്പായെന്ന് താരം തന്നെ തുറന്നു പറഞ്ഞു, പക്ഷേ അന്നൊക്കെ ലളിത് മോദി മൗനം പാലിക്കുകയായിരുന്നു.
ഇപ്പോഴിതാ ഇതാദ്യമായി സുസ്മിതയെക്കുറിച്ച് വാചാലനായി സംസാരിക്കുകയാണ് ലളിത് മോദി. ലളിത് മോദിയുമായുള്ള ബന്ധം പുറത്തുവന്നതുമുതൽ സുസ്മിതയ്ക്ക് സമ്പത്ത് തേടിപ്പോകുന്നയാളാണെന്ന അർഥം വരുന്ന ‘ഗോൾഡ് ഡിഗർ’ എന്ന ടാഗും പലരും ചാർത്തിയിരുന്നു. അതിനാണ് ലളിത് മോദി വ്യക്തത വരുത്തിയിരിക്കുന്നത്. സുസ്മിതയെ പിന്തുണച്ച ലളിത് മോദി, നടി ഗോൾഡ് ഡിഗറല്ല മറിച്ച് താൻ ഡയമണ്ട് ഡിഗറാണെന്ന് പറഞ്ഞു. തങ്ങളുടെ ബന്ധം ഒരിക്കലും സമ്പത്തിനെ അധിഷ്ഠിതമായിരുന്നില്ലെന്നും സ്വയം ജീവിതം കെട്ടിപ്പടുത്ത സമ്പന്നയായ സ്ത്രീയാണെന്നും അവർ ഒരിക്കലും പണം തേടി പോയിട്ടില്ലെന്നും ലളിത് മോദി പറഞ്ഞു.
‘‘സുന്ദരി, സക്സസ്ഫുൾ ലേഡി, സെൽഫ് മെയ്ഡ് വുമൺ... അതൊക്കെയാണ് സുസ്മിത. എനിക്കറിയാവുന്ന മറ്റാരെക്കാളും കൂടുതൽ വജ്രങ്ങൾ അവൾക്കുണ്ട്. എല്ലാം സ്വയം സമ്പാദിച്ചതാണ്. ഡയമണ്ട് സ്റ്റോറുകൾ വരെ സുസ്മിതയ്ക്കുണ്ട്. വളരെയധികം ധനികയാണവർ. ഞങ്ങൾ പുറത്തുപോവുമ്പോഴെല്ലാം ബില്ലുകൾ അടച്ചിരുന്നതെല്ലാം അവൾ തന്നെയായിരുന്നു. ഒരിക്കൽ പോലും എനിക്ക് പണംനൽകേണ്ടി വന്നിട്ടില്ല. ഞാനവള്ക്ക് പണവും ചെലവുകളും തന്ന് കൂടെനിർത്തുന്ന ഒരു കാമുകനെപ്പോലെയായിരുന്നു. അവൾ ആരിൽനിന്നും ഒന്നും സ്വീകരിക്കില്ല. അങ്ങനെയുള്ള സുസ്മിതയെ ‘ഗോൾഡ് ഡിഗ്ഗർ’ എന്ന് വിളിക്കുന്നത് തികച്ചും തെറ്റാണ്. അവൾ ശരിക്കൊരു വജ്രമാണ്. അവൾ ഞാനുമായി പ്രണയത്തിലായത് എന്റെ പണം കണ്ടിട്ടോ അല്ലെങ്കിൽ മറ്റെന്തെങ്കിലും കാരണങ്ങൾ കൊണ്ടോ അല്ല.
എന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തികളിലൊരാളായാണ് സുസ്മിത. ഇന്നത്തെ വ്യക്തിയായി എന്നെ വളരാൻ സഹായിച്ചതിൽ സുസ്മിതയുടെ പങ്ക് വലുതാണ്. അക്കാലത്ത് എന്റെ ജീവിതത്തിലെ വളരെ പ്രധാനപ്പെട്ട ഒരു ഭാഗമായിരുന്നു അവൾ. അത് വളരെ പ്രത്യേകമായ ഒരു ബന്ധമായിരുന്നു. പക്ഷേ ഞങ്ങൾക്കിടയിലെ അകലം അതിനെ ബാധിച്ചു. സുസ്മിതയുടെ കരിയർ ഇന്ത്യയിലായിരുന്നു, എന്റെ ജീവിതം ലണ്ടനിലും. എനിക്ക് അവരെക്കുറിച്ചുള്ള ഏറ്റവും പ്രിയപ്പെട്ട ഓർമ്മകളുണ്ട്, അവർ ഇപ്പോഴും വളരെ പ്രിയപ്പെട്ട ഒരു സുഹൃത്താണ്.
ഞങ്ങൾ പ്രണയത്തിലാണെന്ന് പ്രഖ്യാപിച്ച ചിത്രം സുസ്മിതയ്ക്ക് മുമ്പിൽ വെച്ചാണ് ഞാന് പോസ്റ്റ് ചെയ്തത്. ഞാനത് പോസ്റ്റ് ചെയ്യുമെന്ന് അവൾ കരുതിയിരുന്നില്ല. വിമാനത്തിലെ എന്തോ കാര്യത്തെക്കുറിച്ച് ഞങ്ങൾ തർക്കിക്കുകയായിരുന്നു, ‘നീ ഇത് പോസ്റ്റ് ചെയ്യാൻ പോകുന്നില്ല’ എന്ന് അവൾ പറഞ്ഞു. ഞാൻ ചിരിച്ചുകൊണ്ട് ബട്ടൺ അമർത്തി. ഞങ്ങൾ ലാൻഡ് ചെയ്തപ്പോഴേക്കും എല്ലാം കൈവിട്ടുപോയിരുന്നു. പക്ഷേ അതിൽ തെറ്റൊന്നുമില്ല. അവൾ എന്നോടത് നീക്കം ചെയ്യാൻ ഒരിക്കലും ആവശ്യപ്പെട്ടില്ല, അങ്ങനെ ചെയ്യാൻ ഞാൻ ഒരിക്കലും ചിന്തിച്ചിട്ടുമില്ല. കുറച്ച് ദിവസത്തേക്ക്, എല്ലാവരും അതിനെക്കുറിച്ച് മാത്രമേ സംസാരിച്ചിരുന്നുള്ളൂ എന്ന് തോന്നി. അതിൽ ഒരു മിനിറ്റ് പോലും ഞാൻ ഖേദിക്കുന്നില്ല...’’ ലളിത് മോദി പറഞ്ഞു. ഹ്യൂമൻസ് ഓഫ് ബോംബെയുമായുള്ള അഭിമുഖത്തിലാണ് ലളിത് മോദിയുടെ ഈ തുറന്നുപറച്ചിൽ.
ലളിത് മോദി 2022-ൽ സുസ്മിതയ്ക്കൊപ്പമുള്ള ചിത്രങ്ങൾ സോഷ്യൽമീഡിയയിൽ പങ്കുവെച്ചപ്പോഴാണ് ഇക്കാര്യം എല്ലാവരുമറിഞ്ഞത്. തങ്ങൾ പ്രണയത്തിലാണെന്ന് സൂചിപ്പിക്കുന്ന പോസ്റ്റായിരുന്നു അത്. ലളിത് മോദി സുസ്മിതയ്ക്കൊപ്പമുള്ള ചിത്രങ്ങൾ പങ്കുവെച്ചപ്പോൾ, പലരും സുസ്മിതയെ ‘ഗോൾഡ് ഡിഗ്ഗർ’ എന്ന് വിളിച്ചു. സുഷ് ഇതിനെതിരെ ഇൻസ്റ്റഗ്രാമിൽ കുറിപ്പിട്ടത്, ‘സ്വർണത്തേക്കാൾ ആഴത്തിലുള്ളത് തിരയുന്നയാളാണ് താൻ. എപ്പോഴും വജ്രങ്ങളെയാണ് ഇഷ്ടപ്പെടുന്നത്. അവ താൻ സ്വയം വാങ്ങുകയാണ് ചെയ്യുന്നതെ’ന്നുമാണ് സുസ്മിത പറഞ്ഞത്. പക്ഷേ ട്രോളൻമാർ പിൻമാറിയില്ല.
എന്നാല് വര്ഷങ്ങള്ക്കിപ്പുറം ലളിത് മോദി സുസ്മിതയെക്കുറിച്ച് സംസാരിച്ചു, തന്റെ ജീവിതത്തിലെ ഏറ്റവും പ്രധാനപ്പെട്ട വ്യക്തികളിലൊരാളായാണ് സുസ്മിതയെ ലളിത് കാണുന്നതെന്നും പറഞ്ഞു. അതിനു ശേഷം സുസ്മിതയെന്നും ഇന്സ്റ്റഗ്രാമില് രസകരമായ ഒരു പോസ്റ്റ് പങ്കുവച്ചു. തന്റെ പുതിയ ജോഡി ‘സെക്സി’ റെഡ് സ്ലിപ്പറുകൾ കാണിച്ചാണ് താരത്തിന്റെ ഇന്സ്റ്റഗ്രാം പോസ്റ്റ്.
‘‘ഞാൻ അധികം ആളുകൾ സഞ്ചരിക്കാത്ത വഴിയിലൂടെയാണ് പോകുന്നത്... ഏറ്റവും സുഖകരവും സെക്സിയുമായ സ്ലിപ്പറുകളിൽ... ഒരു മനുഷ്യൻ തന്റെ വാക്ക് പാലിക്കുമ്പോൾ അത് ഇഷ്ടപ്പെടും...’’ എന്നാണ് സുസ്മിത കുറിച്ചത്.
