അനുരാഗ് കശ്യപ് സംവിധാനം ചെയ്ത 'ബന്ദർ' ഇന്ന് തിയേറ്ററുകളിലെത്തിയിരിക്കുകയാണ്. ചിത്രത്തിൽ നടൻ ഇന്ദ്രജിത്ത് സുകുമാരനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇപ്പോഴിതാ സിനിമയെക്കുറിച്ച് ഇന്ദ്രജിത്ത് സോഷ്യൽ മീഡിയയിൽ കുറിച്ച വാക്കുകളാണ് ശ്രദ്ധനേടുന്നത്.
അനുരാഗ് കശ്യപിനൊപ്പം പ്രവർത്തിക്കണമെന്ന് താൻ ഏറെ ആഗ്രഹിച്ചിരുന്നുവെന്നും ബന്ദറിലൂടെ അത് യാഥാർത്ഥ്യമായെന്നും നടൻ കുറിച്ചു. സഹതാരം ബോബി ഡിയോളിനെക്കുറിച്ചും താരം വാചാലനായി. താൻ ജോലി ചെയ്തിട്ടുള്ളതിൽ വെച്ച് ഏറ്റവും എളിമയുള്ളവനും സത്യസന്ധനുമായ സഹനടന്മാരിൽ ഒരാളാണ് ബോബി ഡിയോൾ എന്നാണ് ഇന്ദ്രജിത്ത് പറഞ്ഞത്.
ഇത്രയധികം മനോഹരമായ ആളുകളെയും അത്ഭുതകരമായ കലാകാരന്മാരെയും കണ്ടുമുട്ടാനും അവരോടൊപ്പം പ്രവർത്തിക്കാനും കഴിഞ്ഞതിൽ നന്ദിയുണ്ടെന്നും ഇന്ദ്രജിത്ത് കൂട്ടിച്ചേർത്തു. ബന്ദർ ലൊക്കേഷനിൽ നിന്നുള്ള ചിത്രങ്ങൾ പങ്കുവെച്ചുകൊണ്ടായിരുന്നു ഇന്ദ്രജിത്തിന്റെ കുറിപ്പ്.
'ഗാങ്സ് ഓഫ് വസ്സേപൂർ കണ്ടപ്പോൾ മുതൽ, അനുരാഗ് കശ്യപിനൊപ്പം ഒരു ദിവസം പ്രവർത്തിക്കണമെന്നത് എന്റെ ഉള്ളിലെ ആഴമേറിയ ആഗ്രഹമായിരുന്നു. നിങ്ങൾ എന്തെങ്കിലും നേടണമെന്ന് അതിയായി ആഗ്രഹിക്കുമ്പോൾ, അത് നേടാനായി ഈ പ്രപഞ്ചം മുഴുവൻ നിങ്ങളോടൊപ്പം ഒത്തുചേർന്ന് പ്രവർത്തിക്കുമെന്ന് പറയുന്നതുപോലെ. ഇപ്പോൾ ആഗ്രഹിച്ചതുപോലെ ബന്ദർ സാധ്യമായിരിക്കുന്നു. ഇങ്ങനെയൊരു പഠനാനുഭവത്തിന് അനുരാഗ് കശ്യപിന് നന്ദി. നിങ്ങളോടൊപ്പം ജോലി ചെയ്യുന്നതും സമയം ചെലവഴിക്കുന്നതും സിനിമ, ജീവിതം, അതിനിടയിലുള്ള എല്ലാറ്റിനെയും കുറിച്ചുള്ള ഒരു മാസ്റ്റർക്ലാസ് ആയിരുന്നു.
സ്നേഹം, ബഹുമാനം... ഞാൻ ജോലി ചെയ്തിട്ടുള്ളതിൽ വെച്ച് ഏറ്റവും എളിമയുള്ളവനും സത്യസന്ധനുമായ സഹനടന്മാരിൽ ഒരാളാണ് ബോബി ഡിയോൾ. ഇത് നിങ്ങളുടെ ഏറ്റവും മികച്ചതായിരിക്കും!. ഇത്രയധികം മനോഹരമായ ആളുകളെയും അത്ഭുതകരമായ കലാകാരന്മാരെയും കണ്ടുമുട്ടാനും അവരോടൊപ്പം പ്രവർത്തിക്കാനും കഴിഞ്ഞതിൽ നന്ദി..' - ഇന്ദ്രജിത്ത് കുറിച്ചു. 2010-ൽ പുറത്തിറങ്ങിയ 'ദി വെയ്റ്റിംഗ് റൂം' ആണ് ഇന്ദ്രജിത്തിന്റേതായി ഇതിന് മുൻപ് റിലീസിനെത്തിയ ഹിന്ദി ചിത്രം.
