മലയാളസിനിമാപ്രേക്ഷകര്ക്കും മിനിസ്ക്രീന് പ്രേക്ഷകര്ക്കും ഏറെ നൊമ്പരം നല്കിയൊരു വേര്പാടായിരുന്നു അഭിനേതാവായ കൊല്ലം സുധിയുടേത്. മലയാളി പ്രേക്ഷകരെ ഒന്നടങ്കം കണ്ണീരിലാഴ്ത്തിയ അപ്രതീക്ഷിതമായി ഉണ്ടായ ഒരു വാഹനാപകടമാണ് സുധിയുടെ ജീവന് കവര്ന്നെടുത്തത്. അന്ന് ആ യാത്രയില് സുധിയ്ക്കൊപ്പമുണ്ടായിരുന്നവരില് ഒരാളായിരുന്നു സുഹൃത്തും സഹതാരവുമൊക്കെയായ ബിനു അടിമാലി. അപകടത്തില് ഗുരുതരമായ പരിക്കേറ്റ് ബിനു അടിമാലിയും കുറച്ചു നാള് ആശുപത്രിയിലായിരുന്നു. സുധിയുടെ വിയോഗത്തിന് ശേഷം മാസങ്ങൾ നീണ്ട ചികിത്സയിലൂടെയും മാനസിക വിഷമങ്ങളിലൂടെയും കടന്നുപോയാണ് ബിനു അടിമാലി സാധാരണ ജീവിതത്തിലേക്ക് മടങ്ങിയെത്തിയത്.
ഇപ്പോഴിതാ സുധിയുടെ വേര്പാടിന് മൂന്നു വര്ഷം തികയുമ്പോള് നൊമ്പരത്തില് കുതിര്ന്ന ഒരു പോസ്റ്റ് പങ്കിടുകയാണ് ബിനു അടിമാലി.
‘‘എന്റെ സുധി പോയിട്ട് ഇന്നേക്ക് 3 വർഷം. എന്നും ഒന്നിച്ചായിരുന്നു. അതിനാൽ ഒരു ചിത്രം പോലും എടുക്കാൻ ഞങ്ങൾ മറന്നിരുന്നു...’’ എന്നാണ് ബിനു അടിമാലി കുറിച്ചിരിക്കുന്നത്. തങ്ങളുടെ ഒരുമിച്ചുള്ള വരച്ച ചിത്രം സമ്മാനിച്ച സുഹൃത്ത് അതുലിന് നന്ദിയും ബിനു അടിമാലി പോസ്റ്റില് കുറിച്ചിട്ടുണ്ട്.
സുധിയുടെ വേര്പാടില് ഒരുപാട് ആരാധകര് നൊമ്പരവും സങ്കടവും ബിനു അടിമാലിയുടെ പോസ്റ്റിനു താഴെ കുറിച്ചിട്ടുണ്ട്. സുധിയുടെ മരണത്തോടെ സ്റ്റാർ മാജിക്കും ആ കൂട്ടായ്മയുമെല്ലാം ഇല്ലാതായി, സുധിച്ചേട്ടൻ ദൂരെയേതോ ലൊക്കേഷനിലേക്ക് ഷൂട്ടിംഗിന് പോയതായി വിശ്വസിക്കാനാണ് ഞങ്ങൾക്ക് ഇഷ്ടം...’ എന്നതടക്കമാണ് കമന്റുകള്.
