മലയാളികള്ക്ക് മാത്രമല്ല തമിഴ് സിനിമാപ്രേക്ഷകര്ക്കും ഏറെയിഷ്ടമുള്ള താരമാണ് ജയറാം. മിമിക്രി വേദികളില് തുടക്കം കുറിച്ച് പിന്നീട് കുടുംബപ്രേക്ഷകരുടെ പ്രിയങ്കരനായി മാറിയ ജയറാം, ഇന്നും വെള്ളിത്തിരയില് തിളങ്ങി നില്ക്കുകയാണ്. പല കാര്യങ്ങളും രസകരമായ കഥകളിലൂടെ അവതരിപ്പിക്കാറുള്ള ജയറാം അടുത്തിടെ ഒന്ന് എയറില് കയറിയിരുന്നു. ട്വന്റി 20 സിനിമയിലെ ഒരു ഷോട്ടില് അഭിനയിക്കാന് സാധിക്കാതെപോയതിന് കാരണം ദീപാവലിക്ക് താന് ചെന്നൈയിലെ വീട്ടില് പോയതാണെന്ന് ഒരു തമിഴ് അഭിമുഖത്തില് അടുത്തിടെ പറഞ്ഞതും, മുന്പൊരു അഭിമുഖത്തില് ഇതിന് കാരണം ശബരിമലയ്ക്ക് പോയതാണെന്ന് ജയറാം പറഞ്ഞതും ചൂണ്ടിക്കാട്ടി ആയിരുന്നു പരിഹാസം.
ഈ ട്രോളുകള്ക്കൊപ്പം സംവിധായകന് രാജസേനന് ജയറാമിനെക്കുറിച്ച് പറഞ്ഞ കാര്യങ്ങളും സോഷ്യല് മീഡിയയില് നിറഞ്ഞു. ജയറാമിനെതിരെ എന്ത് വിമര്ശനം വരുമ്പോഴും രാജസേനന് മുന്പ് ജയറാമിനെ കുറ്റപ്പെടുത്തി സംസാരിച്ചിട്ടുള്ള കാര്യങ്ങള് സോഷ്യല് മീഡിയയില് നിറയാറുണ്ട്. അല്ലെങ്കിലും പണ്ടേ രാജസേനന് പറഞ്ഞതാണ് ജയറാം അവസരവാദിയാണെന്നുള്ളതായിരുന്നു ഇത്തവണത്തെ സോഷ്യല് മീഡിയ കമന്റുകള്.
ഇപ്പോഴിതാ ഇത്തരം വാര്ത്തകളെക്കുറിച്ച് പ്രതികരിക്കുകയാണ് രാജസേനന്. ജയറാം അവസരവാദിയാണെന്ന് താന് പറഞ്ഞിട്ടുണ്ടെന്നൊരു പോസ്റ്റ് കണ്ടുവെന്നും പക്ഷേ അങ്ങനെയൊരു സ്റ്റേറ്റ്മെന്റ് താന് എങ്ങും പറഞ്ഞിട്ടില്ലെന്നുമാണ് രാജസേനന് പറയുന്നത്.
“ജയറാമിന്റെ ഏത് കാര്യം പറഞ്ഞു വന്നാലും അതില് എന്റെ പേര് അറിയാതെ വരും. അത് എങ്ങനെയൊക്കെയോ കയറി വരുന്നുണ്ട്. ഞാന് ഒരു പോസ്റ്റ് കണ്ടു. അല്ലെങ്കിലും രാജസേനന് പണ്ടേ പറഞ്ഞിട്ടുണ്ട് ജയറാം അവസരവാദിയാണെന്ന് എന്നാണ് ആ പോസ്റ്റില് പറയുന്നത്. അങ്ങനെയൊരു സ്റ്റേറ്റ്മെന്റ് ഞാന് എങ്ങും പറഞ്ഞിട്ടില്ല. അങ്ങനെ ഒരു സ്റ്റേറ്റ്മെന്റ് പറയാനുള്ള പ്രശ്നങ്ങള് എനിക്കില്ല. ഞങ്ങള് തമ്മില് ഒരു വന് വഴക്കിട്ടോ അല്ലെങ്കില് അടിച്ച് പിരിയുകയോ ഒന്നും ചെയ്തതല്ല. ഞങ്ങള് അങ്ങനെയങ്ങ് പിണങ്ങിയിട്ടുമില്ല. ഇത് ഒരുതരം ഈഗോ പ്രശ്നത്തില് അങ്ങ് മാറിപ്പോയതാണ്. അപ്പോള് കൂടെനിന്ന ചിലര് അതിനെ പ്രൊമോട്ട് ചെയ്ത് വലുതാക്കി കൊണ്ടുപോയി. പിന്നെ അറിയാമല്ലോ മീഡിയാസ്.
ഞങ്ങള് തമ്മില് അകന്ന് പോകുന്ന സമയത്ത് സോഷ്യല് മീഡിയ ഇത്രയും പവര്ഫുള് അല്ല. അന്ന് സോഷ്യല് മീഡിയ ഇത്രയും പവര്ഫുള് ആയിരുന്നെങ്കില് ഒരുപക്ഷേ ജനങ്ങള്ക്ക് അറിയാന് സാധിച്ചേനെ. ഇത് എന്തൊക്കെയോ കഥകള് ഉണ്ടാക്കി ഇവിടെ കൊണ്ട് എത്തിച്ചു. ഇപ്പോള് പരസ്പരം തൊട്ടടുത്ത് കണ്ടാലും മുഖത്തോടുമുഖം നോക്കാന് പറ്റാത്ത രീതിയില് കൊണ്ടുവന്ന് എത്തിച്ചു.
സത്യം പറഞ്ഞാല് എന്തെങ്കിലും വഴക്കായിട്ടുള്ള ഒരു പ്രശ്നവും ഇല്ല. ഇതൊരു ചെറിയ ഈഗോയില് തുടങ്ങിയതാണ്. ആ ഈഗോ അവിടെത്തന്നെ നില്പ്പുണ്ട്. അതുകൊണ്ടാണല്ലോ സംസാരിക്കാത്തത്. ഇത്രയുമേയുള്ളൂ. അതിനകത്ത് വേറെ ഒന്നുമില്ല. ഈ വരുന്ന പല സ്റ്റേറ്റ്മെന്റുകളും എന്റേതല്ല. ഫേക്ക് ആണ്. പലതും ക്രിയേറ്റഡ് ആണ്...’’ രാജസേനന് പറഞ്ഞു. ഒരു യൂട്യൂബ് ചാനലിനോടാണ് രാജസേനന്റെ പ്രതികരണം.
