രാജ്യത്ത് ട്രെയിനുകള്ക്കുനേരെയുള്ള സാമൂഹിക വിരുദ്ധരുടെ ആക്രമണങ്ങളുമായി ബന്ധപ്പെട്ട് ഞെട്ടിക്കുന്ന നിരവധി വാര്ത്തകള് ഇതിനകം റിപ്പോര്ട്ട് ചെയ്യപ്പെട്ടിട്ടുണ്ട്. എന്നാല് കഴിഞ്ഞ ദിവസം ആന്ധ്രാപ്രദേശിലെ പ്രകാശം ജില്ലയില് വെച്ച് ഡല്ഹി ചെന്നൈ ഗ്രാന്ഡ് ട്രങ്ക് എക്സ്പ്രസിന് നേരെ അജ്ഞാതര് നടത്തിയ കല്ലേറ്, ക്രൂരതയുടെ എല്ലാ അതിരുകളും ലംഘിക്കുന്നതായിരുന്നു. ആക്രമണത്തില് സീനിയര് ലോക്കോ പൈലറ്റ് എം. ജയറാമിന് ഗുരുതരമായി പരിക്കേറ്റു. ഭാരമേറിയ വസ്തുക്കള് പതിച്ച് എഞ്ചിന്റെ വിന്ഡ്ഷീല്ഡ് തകരുകയും, കഷ്ണങ്ങള് തെറിച്ച് അദ്ദേഹത്തിന്റെ തലയ്ക്ക് ആഴത്തില് മുറിവേല്ക്കുകയുമായിരുന്നു. എഞ്ചിന് റൂം ആകെ രക്തക്കളമായി മാറിയ അത്യന്തം ഭീകരമായ ദൃശ്യങ്ങള് നിലവില് സമൂഹമാധ്യമങ്ങളില് വ്യാപകമായി പ്രചരിക്കുന്നുണ്ട്.
അസഹനീയമായ വേദനയിലും ചോര വാര്ന്നൊലിക്കുന്ന അവസ്ഥയിലും, യാത്രക്കാരുടെ സുരക്ഷ മുന്നിര്ത്തി ജീവനക്കാര് ട്രെയിന് മുന്നോട്ട് തന്നെ ഓടിച്ചു. തുടര്ന്ന് തൊട്ടടുത്തുള്ള ഉലവപാടു സ്റ്റേഷനില് ട്രെയിന് സുരക്ഷിതമായി എത്തിച്ച ശേഷമാണ് ജയറാമിന് പ്രാഥമിക ചികിത്സ നല്കിയത്. നിലവില് വിജയവാഡയിലെ ആശുപത്രിയില് ചികിത്സയിലുള്ള അദ്ദേഹത്തിന്റെ ആരോഗ്യനില തൃപ്തികരമാണെന്ന് റെയില്വേ അധികൃതര് അറിയിച്ചു.
സംഭവത്തെക്കുറിച്ച് പോലീസും റെയില്വേയും സംയുക്തമായി അന്വേഷണം ആരംഭിച്ചിട്ടുണ്ട്. അടുത്ത കാലത്തായി ഓടുന്ന ട്രെയിനുകള്ക്ക് നേരെ കല്ലെറിയുന്ന പ്രവണത വര്ദ്ധിച്ചുവരുന്നത് റെയില്വേ ജീവനക്കാരുടെയും യാത്രക്കാരുടെയും ജീവന് വലിയ ഭീഷണിയാണ് ഉയര്ത്തുന്നത്. ഇത്തരം സാമൂഹിക വിരുദ്ധ പ്രവര്ത്തനങ്ങള്ക്കെതിരെ കര്ശന നടപടി സ്വീകരിക്കണമെന്ന ആവശ്യം പൊതുസമൂഹത്തില് ശക്തമാകുകയാണ്.
A Senior Assistant Loco Pilot of the New Delhi–Chennai GT Express was injured after stone pelting on the train.
If throwing stones at a moving train can risk hundreds of lives, the punishment should be as serious as the crime.
Shame on the cowards who attacked a moving train.…— 🗿 (@cactushuyaarrrr) June 5, 2026
