മലയാളസിനിമാപ്രേക്ഷകര്ക്ക് ഏറെയിഷ്ടമുള്ള അഭിനേതാവും സംവിധായകനും ഗായകനുമൊക്കെയാണ് വിനീത് ശ്രീനിവാസന്. വിനീതിന്റെ സിനിമകളിലൂടെ പ്രേക്ഷകര് പരിചയപ്പെട്ട മറ്റൊരു താരമാണ് ബേസില് ജോസഫ്. നടനായും സംവിധായകനായും ബേസിലും തിളങ്ങിയിട്ടുണ്ട്. വിനീതിനും ബേസിലിനുമൊപ്പമില്ലെങ്കിലും അത്ര തന്നെ പ്രേക്ഷകര്ക്കിഷ്ടമുള്ള താരമാണ് നസ്ലെനും സംഗീത് പ്രതാപും. ഇവര് നാലാളും തമ്മില് പ്രത്യേകമായ ഒരു വൈബുണ്ട്, സൗഹൃദമുണ്ട്.
ഇവരുടെയൊക്കെ സിനിമകള്ക്ക് മാത്രമല്ല അഭിമുഖങ്ങള്ക്കും ഇന്സ്റ്റഗ്രാം കമന്റുകള്ക്കുമൊക്കെ ആരാധകര് ഏറെയാണ്. ബേസിലും വിനീതും എത്തുന്ന സദസ്സുകള് ചിരിയുടെ മാലപടക്കം സൃഷ്ടിച്ച് പ്രേക്ഷകഹൃദയം നേടാറുണ്ട്. ഇവര് നാലാളും ഒരുമിച്ചെത്തിയ സിനിമയാണ് അഭിനവ് സുന്ദര് നായക് സംവിധാനം ചെയ്ത ‘മോളിവുഡ് ടൈംസ്’. വലിയ സ്വീകാര്യത നേടി മുന്നേറുന്ന ഈ ചിത്രത്തെ തിയേറ്ററില് ഏറ്റെടുക്കുകയാണ് ആരാധകര്.
ഇപ്പോഴിതാ ‘മോളിവുഡ് ടൈംസ്’ സിനിമയുടെ ലൈവ് പ്രൊമോഷനിടെ ഈ താരങ്ങള് ഒരുമിച്ചെത്തിയതും ഇവരുടെ വൈബ് സംഭാഷണങ്ങളുമാണ് ആരാധകര് ഏറ്റെടുക്കുന്നത്. സിനിമയിലെ നായകനായ നസ്ലെനാണ് ഇന്സ്റ്റഗ്രാം ലൈവിലേക്ക് ആദ്യമെത്തിയത്. സിനിമ സ്വീകരിച്ചതിന് പ്രേക്ഷകരോടുള്ള നന്ദി അറിയിക്കാനും വിശേഷങ്ങള് പങ്കിടാനുമാണ് താന് എത്തിയതെന്നാണ് നസ്ലെന് പറഞ്ഞത്. പിന്നാലെ ലൈവിലേക്ക് സംഗീത് പ്രതാപും അഭിനവും ബേസിലുമെത്തി. നാലു പേര്ക്കു മാത്രമുള്ള ചാറ്റ് റൂമായതിനാല് അഭിനവ് കുറച്ചു നേരം സംസാരിച്ച ശേഷം വിനീതിനെ വിളിച്ചു. അപ്പോഴാണ് പ്രേക്ഷകര്ക്ക് ചിരിപടക്കുമായി ബേസിലിന്റെ കമന്റ് വന്നത്.
വിനീത് ശ്രീനിവാസന് പൊതുവേ ചെന്നൈ നഗരത്തോട് ഒരു പ്രത്യേക മാനസിക അടുപ്പമുണ്ട്. പഠിച്ചുവളര്ന്ന സ്ഥലത്തോടുള്ള തന്റെ മമതയെക്കുറിച്ച് പറയാറുള്ള വിനീത്, തന്റെ സിനിമകളിലും ഈ ചെന്നൈ പാസം പ്രാധാന്യത്തോടെ കാണിക്കാറുണ്ട്. ആരാധകരും ഇതൊരു ട്രോള് മെറ്റീരിയലായി ഉപയോഗിക്കാറുണ്ട്. അതു തന്നെയാണ് ബേസില് കമന്റായി പറഞ്ഞത്. ലൈവില് ഉണ്ടായിരുന്ന നസ്ലെനും സംഗീതും ചിരിയടക്കാന് പാടുപെട്ടപ്പോള് ലൈവ് കണ്ടിരിക്കുന്നവരെയും പൊട്ടിച്ചിരിപ്പിക്കുന്നതായിരുന്നു ബേസിലിന്റെ ട്രോള്.
‘നിങ്ങള് ഒക്കെ എവിടെയാണ്...’ എന്നായിരുന്നു വിനീത് ശ്രീനിവാസന്റെ ചോദ്യം. ‘ഞാനും സംഗീതും കൊച്ചിയില് ഉണ്ടെ’ന്ന് നസ്ലെന് പറഞ്ഞു. ‘ഞാനും കൊച്ചിയില് ഉണ്ട്....’ എന്ന് പറഞ്ഞ ശേഷം വിനീതിനോട് ബേസിലിന്റെ ചോദ്യവും വന്നു. ‘നിങ്ങള് ചെന്നൈയില് ആയിരിക്കും അല്ലേ..?’ എന്ന്. ‘ഞാന് വീട്ടിലാടാ...’ എന്നായി വിനീത്. ‘അല്ല, ഒന്ന് ഉറപ്പിക്കാന് ചോദിച്ചെന്നേ ഉള്ളൂ. ഒരു ഔപചാരികതയുടെ പേരില്...’ എന്നായി ബേസില്. ‘പോടാ...’ എന്നാണ് ചിരിച്ചു കൊണ്ട് വിനീത് മറുപടി പറഞ്ഞത്. നസ്ലെനും സംഗീതും ഇത് കേട്ട് ചിരിയടക്കാന് പാടുപെടുന്നത് ലൈവില് കാണാമായിരുന്നു. നസ്ലെനും സംഗീതും ഇത് കേട്ട് ചിരിയടക്കാന് പാടുപെടുന്നുണ്ടായിരുന്നു.
നിരവധി ആരാധകരാണ് താരങ്ങളുടെ ഇന്സ്റ്റഗ്രാം ലൈവിന് കമന്റുകളും ലൈക്കുകളും നല്കുന്നത്. കൂടുതല് പേരും ഇവര് തമ്മിലുള്ള വൈബിനെക്കുറിച്ചാണ് പറഞ്ഞത്. സിനിമയെ അഭിനന്ദിച്ചവരും കുറവല്ല. ‘വരുന്നു കത്തിക്കുന്നു പോകുന്നു...’, ആ സിനിമയുടെ സ്ക്രിപ്റ്റ് തന്ന ആ മനുഷ്യൻ...പുലിയാണ്, ഇത് താന്ടാ വൈബ്...’ എന്നതടക്കമാണ് കമന്റുകള്.
വിനീത് ശ്രീനിവാസന് സംവിധാനം ചെയ്ത ഹൃദയം, വര്ഷങ്ങള്ക്കു ശേഷം എന്നീ ചിത്രങ്ങളുടെ പ്രധാന കഥാപശ്ചാത്തലം ചെന്നൈ ആയിരുന്നു. എന്നാല് ഏറ്റവുമൊടുവില് സംവിധാനം ചെയ്ത ‘കരം’ എന്ന ചിത്രത്തിന്റെ ലൊക്കേഷന് ചെന്നൈ അല്ല എന്നത് റിലീസിന് മുന്പേ വിനീത് എടുത്തുപറഞ്ഞ കാര്യമാണ്. സംവിധായകന് എന്ന രീതിയില് അതൊരു റെപ്പറ്റീഷന് ആയി എന്ന് പ്രേക്ഷകര് പറഞ്ഞപ്പോഴാണ് വിനീത് ഇക്കാര്യം പറഞ്ഞത്.
അതേസമയം സിനിമയ്ക്കുള്ളിലെ സിനിമയുടെ കഥ പറയുന്ന ചിത്രമാണ് മോളിവുഡ് ടൈംസ്. മുകുന്ദനുണ്ണി അസോസിയേറ്റ്സ് എന്ന ചിത്രത്തിലൂടെ സംവിധായകനായി വമ്പന് അരങ്ങേറ്റം നടത്തിയ അഭിനവ് സുന്ദര് നായക് സംവിധാനം ചെയ്യുന്ന രണ്ടാമത്തെ ചിത്രമാണിത്. നസ്ലെന് നായകനാവുന്ന ചിത്രത്തില് മറ്റൊരു പ്രധാന വേഷത്തില് സംഗീത് പ്രതാപ് ഉണ്ട്. ബേസിലും വിനീതും അതിഥി വേഷങ്ങളിലാണ് ഈ സിനിമയില് എത്തിയിരിക്കുന്നത്.
