കുട്ടിക്കാലം മുതലുള്ള ഫുട്ബോള് ലോകകപ്പ് എന്ന വലിയ സ്വപ്നം യാഥാര്ത്ഥ്യമാക്കാന് വേണ്ടി സ്വന്തം തൊഴിലിനായി മാറ്റിവെച്ച ലക്ഷങ്ങള് വേണ്ടെന്നുവെച്ചിരിക്കുകയാണ് മണിപ്പൂരുകാരനായ ഒരു ഡിജിറ്റല് കണ്ടന്റ് ക്രിയേറ്റര്. മണിപ്പൂരിലെ ഉഖ്റുല് സ്വദേശിയായ വര്ച്ചിഹാന് സിങ്ഖായ് (40) ആണ് തന്റെ യൂട്യൂബ്, ഇന്സ്റ്റാഗ്രാം വീഡിയോകളുടെ എഡിറ്റിങ്ങിനായി മാറ്റിവെച്ചിരുന്ന 2.3 ലക്ഷം രൂപയുടെ ലാപ്ടോപ്പ് വേണ്ടെന്നുവെച്ച് അമേരിക്കയില് നടക്കുന്ന ഫിഫ ലോകകപ്പ് കാണാന് ഒരുങ്ങുന്നത്. ബിസിനസ് ഇന്സൈഡറില് എഴുതിയ ലേഖനത്തിലൂടെയാണ് മുപ്പത് വര്ഷത്തെ തന്റെ കാത്തിരിപ്പിന്റെയും ഫുട്ബോള് പ്രണയത്തിന്റെയും കഥ ഈ നാല്പതുകാരന് ലോക പങ്കുവെച്ചത്.
സമുദ്രനിരപ്പില് നിന്നും 5,600 അടി ഉയരത്തിലുള്ള തന്റെ സാധാരണ ഗ്രാമത്തില് നിന്നും ലോകകപ്പ് വേദിയായ അമേരിക്കയിലെ അറ്റ്ലാന്റയിലേക്കുള്ള യാത്ര സിങ്ഖായിക്ക് ഒട്ടും എളുപ്പമായിരുന്നില്ല. ആറ് മണിക്കൂര് റോഡ് മാര്ഗം യാത്ര ചെയ്ത് ഇംഫാലിലെത്തിയ ശേഷം ന്യൂഡല്ഹി, ലണ്ടന്, വാഷിംഗ്ടണ് ഡിസി വഴി നാല് കണക്റ്റിങ് ഫ്ലൈറ്റുകളിലായി 27 മണിക്കൂറോളം വിമാന യാത്ര ചെയ്താണ് ഇദ്ദേഹം ലക്ഷ്യസ്ഥാനത്ത് എത്തുന്നത്. വിമാന ടിക്കറ്റ് നിരക്കിന്റെ വലിയൊരു പങ്ക് നല്കി അമ്മായിയപ്പനും, താമസമൊരുക്കി അമേരിക്കയിലെ ബന്ധുക്കളും സഹായിച്ചതോടെയാണ് സിങ്ഖായിയുടെ ഈ സ്വപ്നയാത്ര യാഥാര്ത്ഥ്യമായത്.
ആദ്യഘട്ടത്തില് ഉയര്ന്ന ബജറ്റ് കാരണം പോര്ച്ചുഗലിന്റെ മത്സരത്തിനുള്ള ടിക്കറ്റ് നഷ്ടമായെങ്കിലും, പിന്നീട് നടന്ന വില്പനയില് 140 ഡോളര് (ഏകദേശം 11,700 രൂപ) വീതം നല്കി ചെക്ക് റിപ്പബ്ലിക് ദക്ഷിണാഫ്രിക്ക മത്സരത്തിന്റെ രണ്ട് ടിക്കറ്റുകള് സിങ്ഖായ് സ്വന്തമാക്കി. തനിക്കും യാത്രയില് ഒപ്പമുള്ള അമ്മായിയപ്പനും വേണ്ടിയാണ് ഈ ടിക്കറ്റുകള് എടുത്തത്. അതേസമയം, യഥാര്ത്ഥ ആരാധകരെ ചൂഷണം ചെയ്ത് ടിക്കറ്റുകള് നാലിരട്ടി വിലയ്ക്ക് മറിച്ചുവില്ക്കുന്ന ബ്ലാക്ക് മാര്ക്കറ്റ് മാഫിയക്കെതിരെയും സിങ്ഖായ് കടുത്ത ഭാഷയില് പ്രതികരിച്ചു. ഇത്തരം ചൂഷണങ്ങള് സാധാരണക്കാരായ ആരാധകരുടെ സ്വപ്നങ്ങള്ക്ക് കരിനിഴലാകുന്നുണ്ടെങ്കിലും, തന്റെ ദീര്ഘകാലത്തെ മോഹം സഫലമാകുന്നതിന്റെ ആവേശത്തിലാണ് ഈ മണിപ്പൂരുകാരന്.
