തമിഴ്‌നാട് മുഖ്യമന്ത്രി ജോസഫ് വിജയ്‌യെ നേരിൽ സന്ദർശിച്ച് നടി സ്നേഹയും കുടുംബവും. ഭർത്താവും നടനുമായ പ്രസന്നയ്ക്കും മക്കൾക്കുമൊപ്പമാണ് സ്നേഹ വിജയ്‌യെ കാണാനെത്തിയത്. കൂടിക്കാഴ്ചയുടെ ചിത്രങ്ങൾ സ്നേഹ തന്നെയാണ് സാമൂഹികമാധ്യമങ്ങളിലൂടെ പങ്കുവെച്ചത്. വിജയ്‌യുടെ രാഷ്ട്രീയ വളർച്ചയിലും പുതിയ പദവിയിലുമുള്ള സന്തോഷവും വികാരനിർഭരമായ ഓർമ്മകളും പങ്കുവെച്ചുകൊണ്ട് താരം കുറിച്ച വാക്കുകൾ ഇപ്പോൾ സോഷ്യൽ മീഡിയയിൽ ശ്രദ്ധ നേടുകയാണ്.
മുഖ്യമന്ത്രി പദവിയിലിരിക്കുമ്പോഴും വർഷങ്ങൾക്ക് മുൻപ് താൻ കണ്ട അതേ വിനയമുള്ള, ദയയുള്ള മനുഷ്യനായി തന്നെയാണ് വിജയ് ഇപ്പോഴും തുടരുന്നതെന്ന് സ്നേഹ തന്റെ കുറിപ്പിൽ പറയുന്നു.
"വിജയ് സാറിനൊപ്പം രണ്ട് സിനിമകളിൽ ഒരുമിച്ച് അഭിനയിക്കാൻ കഴിഞ്ഞ എനിക്ക്, ഇന്ന് അദ്ദേഹത്തെ മുഖ്യമന്ത്രി ജോസഫ് വിജയ് എന്ന പദവിയിൽ കാണുമ്പോൾ ശരിക്കും വികാരഭരിതവും വാക്കുകൾക്ക് അതീതവുമായ ഒരു അനുഭൂതിയാണ് തോന്നുന്നത്. ചില നിമിഷങ്ങൾ നമ്മളെ നിശ്ശബ്ദരാക്കിക്കളയും. അദ്ദേഹത്തിന്റെ ഈ യാത്രയും വളർച്ചയും അദ്ദേഹം നേടിയെടുത്ത ബഹുമാനവുമെല്ലാം ശരിക്കും പ്രചോദനമേകുന്നതാണ്. എങ്കിലും എന്നെ ഏറ്റവും കൂടുതൽ സ്പർശിച്ചത്, ഞാൻ പണ്ട് അറിഞ്ഞിരുന്ന അതേ വിനയമുള്ള, ദയയുള്ള, എളിമയുള്ള മനുഷ്യൻ തന്നെയാണ് ഇന്നും അദ്ദേഹം എന്നതാണ്. അദ്ദേഹത്തിന് എപ്പോഴും ശക്തിയും വിജയവും ഉണ്ടാകട്ടെ എന്ന് ആശംസിക്കുന്നു," - സ്നേഹ കുറിച്ചു.
വിജയ്‌യുടെ എക്കാലത്തെയും സൂപ്പർഹിറ്റ് ചിത്രങ്ങളിൽ ഒന്നായ 'വസീഗര'യിലാണ് സ്നേഹ ആദ്യമായി അദ്ദേഹത്തോടൊപ്പം അഭിനയിക്കുന്നത്. വർഷങ്ങൾക്ക് ശേഷം വിജയ്‌യുടെ ഒടുവിൽ പുറത്തിറങ്ങിയ ചിത്രമായ 'ദി ഗ്രേറ്റസ്റ്റ് ഓഫ് ഓൾ ടൈം' (GOAT) എന്ന സിനിമയിലും താരം ഒരു പ്രധാന വേഷത്തിൽ എത്തിയിരുന്നു.
രാഷ്ട്രീയ തിരക്കുകൾക്കിടയിലും പഴയ സഹപ്രവർത്തകരോടും സുഹൃത്തുക്കളോടും, അവരുടെ കുടുംബത്തോടും കാണിക്കുന്ന സ്‌നേഹവും വിനയവുമാണ് വിജയ്‌യെ മറ്റുള്ളവരിൽ നിന്നും വ്യത്യസ്തനാക്കുന്നതെന്ന് സ്നേഹയുടെ പോസ്റ്റിന് താഴെ ആരാധകർ കമന്റ് ചെയ്യുന്നുണ്ട്. ചുരുങ്ങിയ സമയം കൊണ്ട് തന്നെ പ്രസന്നയ്ക്കും മക്കൾക്കുമൊപ്പമുള്ള സ്നേഹയുടെ ചിത്രങ്ങളും കുറിപ്പും സോഷ്യൽ മീഡിയയിൽ തരംഗമായി മാറിക്കഴിഞ്ഞു.
Comments