‘ഔട്ട് ഓഫ് സിലബസ്’ എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച താരമാണ് പാർവതി തിരുവോത്ത്. ‘നോട്ട്ബുക്ക്’ എന്ന റോഷന് ആന്ഡ്രൂസ് ചിത്രത്തിലൂടെയാണ് പാര്വതിയെന്ന അഭിനേത്രിയുടെ കാലിബര് പ്രേക്ഷകര് ശരിക്കും തിരിച്ചറിഞ്ഞത്. പിന്നീടിങ്ങോട്ട് മലയാളത്തില് മാത്രമല്ല തമിഴിലും മികച്ച കഥാപാത്രങ്ങള് നല്കി പാര്വതി വെള്ളിത്തിരയില് തന്റെ സ്ഥാനം അരക്കിട്ടുറപ്പിച്ചു. ശക്തമായ ആഖ്യാനങ്ങളുമായി, നിരൂപക പ്രശംസ നേടുന്ന കരുത്തുറ്റ സ്ത്രീകഥാപാത്രങ്ങളിലൂടെയാണ് പാര്വതി ബിഗ്സ്ക്രീനില് നിറഞ്ഞു നില്ക്കുന്നത്.
സോഷ്യല് മീഡിയയിലും സജീവമാണ് താരം. വ്യത്യസ്തമായ ഫോട്ടോഷൂട്ടുകളിലൂടെ താരം പലപ്പോഴും ആരാധകരെ അമ്പരിപ്പിക്കാറുണ്ട്. വ്യക്തിജീവിതത്തിലെടുക്കുന്ന ചില നിലപാടുകള് പോലെ തന്നെ താരത്തിന്റെ ഫോട്ടോഷൂട്ടും ബോള്ഡ് ആണ്. ഔട്ട്ഫിറ്റുകളില് മാത്രമല്ല സ്പൂക്കി ഗ്ലാം ലുക്ക് അടക്കമുള്ള ബോള്ഡ് ലുക്ക് മേക്കപ്പിലും പാര്വതി ചിത്രങ്ങള് പങ്കുവയ്ക്കാറുണ്ട്.
ഇപ്പോഴിതാ പാര്വതിയുടെ ഏറ്റവും പുതിയ ചിത്രങ്ങള് സോഷ്യല് മീഡിയയില് വൈറലാകുകയാണ്. ഒറ്റ നോട്ടത്തില് പാര്വതിയാണെന്നു പോലും മനസ്സിലാക്കാന് കഴിയാത്ത മേക്കപ്പിലാണ് താരത്തിന്റെ പുത്തന് ഫോട്ടോഷൂട്ട്. പുരികം ന്യൂഡാക്കിയുള്ള മേക്കപ്പില് താരത്തെ തിരിച്ചറിയാന് കൂടി പ്രയാസമാണ്. ഗോള്ഡ് മെറ്റല് ഷോള്ഡര്ലെസ് കോര്സെറ്റിലാണ് താരം തിളങ്ങുന്നത്. ഔട്ട്ഫിറ്റിനേക്കാള് ശ്രദ്ധിക്കപ്പെടുന്നത് ബ്ലീച്ച് ചെയ്ത പുരികങ്ങളും വിംഗ്ഡ് ഐലൈനറുമാണ്.
‘‘സാധാരണ’ ആകാൻ പറയുമ്പോൾ ഞാൻ ആയിത്തീരുന്ന മൃഗമാണ് എന്റെ പ്രിയപ്പെട്ടത്...ഡാര്ലിംഗ്, ഒരു പുതിയ സാധാരണ അവസ്ഥയുണ്ട്, പുരുഷാധിപത്യത്തിന്റെ അവസാനം! സന്തോഷിക്കുക അല്ലെങ്കിൽ ഞങ്ങളുടെ വഴിയിൽ നിന്ന് മാറുക...’’ എന്ന ക്യാപ്ഷന് നല്കിയാണ് പാര്വതി തിരുവോത്ത് ചിത്രങ്ങള് പങ്കിട്ടിരിക്കുന്നത്.
ഹൃത്വിക് റോഷന് ആദ്യമായി നിര്മ്മിക്കുന്ന ‘സ്റ്റോം’ എന്ന തന്റെ ഹിന്ദി വെബ് സീരീസിന്റെ തിരക്കിലാണ് താരം. ഹിന്ദി സിനിമയില് അഭിനയിച്ചിട്ടുണ്ടെങ്കിലും താരത്തിന്റെ ആദ്യ വെബ് സീരീസാണിത്.
