പട്ടൗഡി കുടുംബത്തിലെ കൊച്ചുമകളും നടൻ സെയ്ഫ് അലി ഖാന്റെയും മുന് ഭാര്യയും നടിയുമായ അമൃത സിംഗിന്റെ മകളുമാണ് ബോളിവുഡിന്റെ മുൻനിരനായിക സാറാ അലി ഖാൻ. അഭിനയ മികവ് കൊണ്ട് മാത്രമല്ല താരപ്രൗഡിയില്ലാത്ത പെരുമാറ്റം കൊണ്ടും സംസാരം കൊണ്ടും സാറ എന്നും പ്രേക്ഷകമനസ്സിലിടം പിടിച്ചിട്ടുണ്ട്. സോഷ്യല് മീഡിയയിലും സജീവമായ താരമാണ് സാറ.
ഇപ്പോഴിതാ സാറ അലി ഖാന് സോഷ്യല് മീഡിയയിലൂടെ പങ്കിട്ട ഒരു ചിത്രമാണ് ആരാധകരെ അമ്പരപ്പിക്കുന്നത്. ഹോളിവുഡ് സൂപ്പർ താരം ഹെൻറി കാവില്ലിനൊപ്പമുള്ള ചിത്രമാണ് സാറ സോഷ്യല് മീഡിയയില് പങ്കിട്ടിരിക്കുന്നത്. ഈ വർഷത്തെ പ്രശസ്തമായ ‘റോയല് ആസ്കോട്ട്’ പരിപാടിയില് വെച്ചാണ് ഇരുവരും കണ്ടുമുട്ടിയത്. ‘‘ലോഞ്ചിനസുമായുള്ള ഒരു രാജകീയ ബന്ധം...’ എന്ന ക്യാപ്ഷന് നല്കിയാണ് താരം ചിത്രങ്ങള് പങ്കിട്ടിരിക്കുന്നത്.
ക്ലാസിക് ബ്രിട്ടീഷ് റേസ്-ഡേ ഫാഷനിലാണ് സാറ ചിത്രങ്ങളില് തിളങ്ങിയത്. ടെക്സ്ചർ ചെയ്ത മിഡി സിലൗറ്റും തോളിൽ പൊതിഞ്ഞ മാച്ചിംഗ് കേപ്പ്-സ്റ്റൈൽ ജാക്കറ്റുമുള്ള ഐവറി ടോൺ ടെയ്ലർ എൻസെംബിളാണ് സാറ ധരിച്ചത്. നെറ്റ് ഡീറ്റെയിലിംഗ് ഉള്ള ഒരു വെളുത്ത ഫാസിനേറ്ററും, ഒരു ക്ലച്ച് പഴ്സും, ഒരു റിസ്റ്റ് വാച്ച്, പോയിന്റഡ്-ടോ സ്റ്റൈലെറ്റോകളും ഇതിനൊപ്പം സാറ അണിഞ്ഞു.
പരമ്പരാഗത മോര്ണിംഗ് സ്യൂട്ടിൽ ഹെൻറി കാവിൽ തിളങ്ങിയത്. ഇളം നിറമുള്ള വെയ്സ്റ്റ്കോട്ടുള്ള കറുത്ത ടെയിൽകോട്ടും, വൈറ്റ് ക്രിസ്പി ഷർട്ടും, കോർഡിനേറ്റിംഗ് ടൈയുമാണ് താരം ധരിച്ചത്. ഒപ്പം ഗ്രേ സ്ട്രിപ്ഡ് ട്രൗസറുകളും, പോളിഷ് ചെയ്ത ഷൂസും, കറുത്ത ടോപ്പ് തൊപ്പിയും ലുക്കിനെ കൂടുതല് സ്റ്റൈലിഷാക്കി. സൂപ്പർമാൻ താരം ഹെൻറി കാവില്ലിന്റെയൊപ്പം റോയല് ലുക്കില് അതീവ സുന്ദരിയായ സാറ നില്ക്കുന്ന ചിത്രം നിമിഷങ്ങള്ക്കുള്ളില് വൈറലായി. ഇങ്ങനെയൊരു കൂടിക്കാഴ്ച ലോകം അറിയുന്നത് സാറ അലി ഖാനും ഒപ്പം ഔദ്യോഗിക പേജായ ‘ലോഞ്ചിനസും’ ഈ ചിത്രങ്ങള് പങ്കുവെച്ചതോടെയാണ്.
സോഷ്യല് മീഡിയ പ്ലാറ്റ്ഫോമുകളായ എക്സ്, റെഡ്ഡിറ്റ് ഉള്പ്പടെയുള്ളവയില് ഈ ചിത്രം വലിയ രീതിയില് ശ്രദ്ധിക്കപ്പെടുന്നുണ്ട്. ‘സാറയും ഹെൻറിയും ഒരേ ഫ്രെയിമില് വരുമെന്ന് ഒരിക്കലും വിചാരിച്ചില്ല, ഇതൊരു അവിശ്വസനീയമായ കൂടിച്ചേരലാണ്, ഇത് എഐ ആണോ’ എന്നതടക്കമാണ് കമന്റുകള്. ബോളിവുഡ് ഹോളിവുഡ് പ്രേക്ഷകര്ക്കിടയില് വലിയ കൗതുകം സൃഷ്ടിക്കുകയാണ് ഈ അപൂര്വ്വ ഫ്രെയിം.
