ബോക്സ് ഓഫീസില് തരംഗം സൃഷ്ടിച്ച് മുന്നേറുന്ന 'മാ ഇന്റി ബംഗാരം' എന്ന ചിത്രത്തിന്റെ വിജയത്തില് സാമന്തയെയും ചിത്രത്തിന്റെ അണിയറപ്രവര്ത്തകരെയും നേരില് കണ്ട് അഭിനന്ദിച്ച് മെഗാസ്റ്റാര് ചിരഞ്ജീവിയും ഭാര്യ സുരേഖയും. സാമന്തയും ഭര്ത്താവ് രാജ് നിഡിമോരുവും പങ്കെടുത്ത കൂടിക്കാഴ്ചയുടെ ചിത്രങ്ങള് ചിത്രത്തിന്റെ നിര്മാതാക്കള് തന്നെയാണ് സോഷ്യല് മീഡിയയിലൂടെ പങ്കുവെച്ചത്.
'ഒരു മെഗാ ബംഗാരം നിമിഷം' എന്ന് കുറിച്ചുകൊണ്ടാണ് അണിയറപ്രവര്ത്തകര് ചിത്രങ്ങള് പങ്കുവെച്ചത്. കൂടിക്കാഴ്ചയില് സാമന്തയ്ക്ക് ചിരഞ്ജീവിയും ഭാര്യ സുരേഖയും ചേര്ന്ന് സാരിയും മറ്റ് സമ്മാനങ്ങളും ഉപഹാരമായി നല്കി. ചിത്രത്തിന്റെ സംവിധായിക നന്ദിനി റെഡ്ഡി, രാജ് നിഡിമോരു എന്നിവരുള്പ്പെടെയുളള മുഴുവന് ടീമിനും മെഗാസ്റ്റാര് തന്റെ അഭിനന്ദനങ്ങള് അറിയിക്കുകയും വിജയത്തില് സന്തോഷം പങ്കിടുകയും ചെയ്തു.
നന്ദിനി റെഡ്ഡി സംവിധാനം ചെയ്ത 'മാ ഇന്റി ബംഗാരം' തീയേറ്ററുകളില് നാല് ദിവസം പിന്നിടുമ്പോള് വന് ബോക്സ് ഓഫീസ് കുതിപ്പാണ് നടത്തുന്നത്. റിലീസ് ചെയ്ത് വെറും നാല് ദിവസത്തിനുള്ളില് ആഗോളതലത്തില് 46.04 കോടി രൂപയാണ് ചിത്രം സ്വന്തമാക്കിയത്. വരും ദിവസങ്ങളില് തന്നെ ചിത്രം 50 കോടി ക്ലബ്ബില് ഇടം നേടുമെന്നാണ് സിനിമാ ലോകത്തെ വിലയിരുത്തൽ. ജൂണ് 19-നാണ് ചിത്രം തീയേറ്ററുകളില് എത്തിയത്.
അതേസമയം സാമന്തയുടെ ഗര്ഭധാരണവുമായി ബന്ധപ്പെട്ട് സോഷ്യല് മീഡിയയില് കുറച്ചുദിവസങ്ങളായി അഭ്യൂഹങ്ങള് ശക്തമായിരുന്നു. ഇതിനിടയിലാണ് ചിരഞ്ജീവിയുടെ സന്ദര്ശനം. ഗര്ഭധാരണ വാര്ത്തകളോട് സാമന്തയോ രാജ് നിഡിമോരുവോ ഇതുവരെ പരസ്യമായി പ്രതികരിച്ചിട്ടില്ല.
