ആലപ്പുഴ: വീര്യംകുറഞ്ഞ മദ്യത്തിന് നികുതിയിളവുമായി ബന്ധപ്പെട്ട വിഷയത്തില് സര്ക്കാരിനെ വിമര്ശിച്ച് കോണ്ഗ്രസ് നേതാവ് വി.എം. സുധീരന്. സര്ക്കാര് തിരുത്തുമെന്നാണ് കരുതുന്നതെന്നും പറഞ്ഞു. നികുതിയിളവ് ബക്കാഡി മദ്യക്കമ്പനിക്ക് വേണ്ടിയാണെന്ന റിപ്പോര്ട്ടിന് പിന്നാലെ പ്രതിപക്ഷം രംഗത്ത് വന്നിരുന്നു.
ഇതിന് പിന്നാലെയാണ് സുധീരനും വിമര്ശനവുമായി രംഗത്ത് വന്നിട്ടുള്ളത്. ബജറ്റില് ഈ പ്രഖ്യാപനം എങ്ങിനെ വന്നു എന്നറിയില്ലെന്നായിരുന്നു സുധീരന്റെ പ്രതികരണം. യുഡിഎഫിന്റെ പ്രകടനപത്രികയില് അത് ഉണ്ടായിരുന്നില്ല. ജനങ്ങളുടെ വികാരം മനസ്സിലാക്കി തിരുത്തുമെന്നാണ് കരുതുന്നതെന്നും പറഞ്ഞു.
നേരത്തേ മദ്യത്തിന്റെ നികുതിയിളവുമായി ബന്ധപ്പെട്ട തീരുമാനത്തില് സുധീരന് മുഖ്യമന്ത്രിക്ക് കത്തയച്ചിരുന്നു. വി.എം.സുധീരന് അടക്കമുള്ള നേതാക്കള് രംഗത്ത് വന്നതോടെ മുഖ്യമന്ത്രി പ്രതിരോധത്തിലായിട്ടുണ്ട്.
തോട്ടപ്പള്ളി കരിമണല് ഖനനവുമായി ബന്ധപ്പെട്ട തീരുമാനത്തിലും സുധീരന് വിമര്ശനവുമായി രംഗത്ത് വന്നു. മദ്യനയവും കരിമണല് ഖനനവും മഹേശന്റെ ആത്മഹത്യയുമായി ബന്ധപ്പെട്ട വിഷയവും ഉള്പ്പെടെ സുധീരന് മുഖ്യമന്ത്രിക്ക് കത്തുകള് അയച്ചിരുന്നു. കരിമണല് ഖനനത്തില് മുന്നണിയില് ചര്ച്ചവേണമെന്ന് വി.എം.സുധീരന് പറഞ്ഞു. ഇത് മത്സ്യത്തൊഴിലാളികളെ ബാധിക്കുന്ന വിഷയമാണെന്നും തീരത്തെ മത്സ്യത്തൊഴിലാളികളെ കാണാതെ പോകരുതെന്നും പറഞ്ഞിരുന്നു.
നീക്കത്തില് നിന്നും സര്ക്കാര് പിന്നോക്കം പോകണമെന്നും സുധീരന് ആവശ്യപ്പെട്ടിരുന്നു. ഈ വിഷയത്തില് മുഖ്യമന്ത്രിയുടെ തീരുമാനത്തില് കോണ്ഗ്രസിനുള്ളില് നിന്നു തന്നെ എതിര്പ്പുണ്ട്. ടി.എന്. പ്രതാപന് അടക്കമുള്ളവരാണ് കരിമണല് ഖനനത്തിനെതിരേ രംഗത്ത് വന്നിരുന്നു. ഈ നീക്കം ആവാസവ്യവസ്ഥയില് വലിയ പ്രശ്നം ഉണ്ടാക്കുമെന്ന ടി.എന്. പ്രതാപനും കത്തയച്ചിരുന്നു.
കഴിഞ്ഞ ദിവസം കെ.സി. വേണുഗോപാലും സര്ക്കാരിന്റെ നയത്തെ വിമര്ശിച്ചിരുന്നു. യുഡിഎഫ് വന്നാല് കരിമണല്ഖനനം നിര്ത്തുമെന്ന വി.ഡി. സതീശന്റെ പ്രസംഗവും ചര്ച്ചയാകുകയാണ്.
