മലയാളി പ്രേക്ഷകർക്ക് ഏറെ പ്രിയപ്പെട്ട ദമ്പതികളാണ് പേളി മാണിയും ഭർത്താവ് ശ്രീനിഷും. ബിഗ് ബോസ് റിയാലിറ്റി ഷോയിലൂടെ പ്രണയത്തിലായ ഇരുവരും, ഷോ കഴിഞ്ഞ് അധികം വൈകാതെ ഇരു കുടുംബങ്ങളുടെയും സമ്മതത്തോടെ വിവാഹിതരാവുകയായിരുന്നു. ഇന്ന് നില, നിതാര എന്നീ രണ്ട് കൊച്ചുമിടുക്കികളുടെ മാതാപിതാക്കളാണ് ഇരുവരും.
വ്ലോഗിംഗും യൂട്യൂബ് ചാനലിലൂടെയുള്ള സെലിബ്രിറ്റി അഭിമുഖങ്ങളുമായി പേളി എപ്പോഴും സോഷ്യൽ മീഡിയയിൽ സജീവമാണ്. ഇപ്പോഴിതാ താരം പങ്കുവെച്ച പുതിയൊരു പോസ്റ്റാണ് ആരാധകരുടെ ശ്രദ്ധ നേടുന്നത്. തിയേറ്ററുകളിൽ തരംഗമായി മാറിയ 'ബാലൻ' എന്ന ചിത്രത്തെയും അതിലെ കഥാപാത്രത്തെയും ഒരു അമ്മയുടെ കാഴ്ചപ്പാടിലൂടെ നോക്കിക്കണ്ടപ്പോൾ തനിക്കുണ്ടായ തിരിച്ചറിവുകളും വികാരങ്ങളുമാണ് പേളി കുറിച്ചിരിക്കുന്നത്.
തന്റെ പെൺമക്കളായ നിലയുടെയും നിതാരയുടെയും കളിയും ചിരിയും നിറഞ്ഞ മനോഹരമായ ഒരു വീഡിയോയാണ് പേളി ഇൻസ്റ്റാഗ്രാമിൽ പങ്കുവെച്ചിരിക്കുന്നത്. "POV: they are just like their mother" എന്നും വീഡിയോയ്ക്കൊപ്പം പേളി പ്രത്യേകം കുറിച്ചിട്ടുണ്ട്. മക്കൾ ലോകത്തിന്റെ നിയമങ്ങൾക്ക് കീഴടങ്ങുന്നതിന് മുൻപ് അവർ അവരുടെ സ്വഭാവത്തോടെ ജീവിക്കട്ടെ എന്ന ചിന്തയോടെയാണ് ഈ കുറിപ്പ്.
"അവർ അങ്ങനെ തന്നെ ഇരിക്കട്ടെ... കാരണം ഈ ലോകം എങ്ങനെയായാലും അവരെ മെരുക്കിയെടുക്കും, ബാക്കി എല്ലാവരെയും മെരുക്കിയതുപോലെ. പക്ഷേ അവർ അവരുടെ അമ്മയെപ്പോലെയാണ്.. അതുകൊണ്ട് നോക്കാം, ആരാണ് ജയിക്കുന്നതെന്ന്," പേളി കുറിച്ചു.
ഒരു കുട്ടിക്ക് ഏറ്റവും കൂടുതൽ സുരക്ഷിതത്വവും സമാധാനവും നൽകാൻ കഴിയുന്നത് അമ്മയുടെ സാന്നിധ്യത്തിനാണെന്ന് 'ബാലൻ' തന്നെ വീണ്ടും ഓർമ്മിപ്പിച്ചുവെന്ന് പേളി പറയുന്നു. നരകത്തിലാണെങ്കിൽ പോലും, അമ്മ കൂടെയുണ്ടെങ്കിൽ ആ കുട്ടിക്ക് സമാധാനം കണ്ടെത്താനാകും എന്ന ഹൃദയം തൊടുന്ന കുറിപ്പാണ് പേളി പങ്കുവെച്ചത്. ഈ ചിത്രം തന്നിൽ വലിയ ചിന്തകളാണ് ഉണ്ടാക്കിയതെന്നും കുറിപ്പ് പങ്കുവെച്ചതിന് ശേഷവും താൻ ആ ചിന്തകളിൽ തന്നെയാണെന്നും താരം കൂട്ടിച്ചേർത്തു.
പോസ്റ്റിന് താഴെ 'ബാലൻ' സിനിമയുടെ സംവിധായകൻ ചിദംബരവും സ്നേഹം അറിയിച്ചുകൊണ്ട് എത്തിയിട്ടുണ്ട്. അമ്മയും മക്കളും തമ്മിലുള്ള ആത്മബന്ധത്തിന്റെ ആഴം വ്യക്തമാക്കുന്ന പേളിയുടെ വാക്കുകൾ ചുരുങ്ങിയ സമയം കൊണ്ട് തന്നെ സോഷ്യൽ മീഡിയയിൽ വൈറലായിക്കഴിഞ്ഞു.
