തിരുവനന്തപുരം: വീര്യം കുറഞ്ഞ മദ്യത്തിന് നികുതിയിളവ് നല്കുന്നത് അഴിമതിയാണെന്ന് പറഞ്ഞ വിഡി സതീശന് മുഖ്യമന്ത്രി കസേരയില് എത്തിയപ്പോള് അതേ അഴിമതിക്ക് ചുക്കാന് പിടിക്കുന്നെന്ന് ദേശാഭിമാനി. വീര്യം കുറഞ്ഞ മദ്യത്തിന്റെ നികുതി കുറച്ചതുമായി ബന്ധപ്പെട്ട വിവാദത്തില് യുഡിഎഫ് സര്ക്കാരിനെതിരെ പ്രതിപക്ഷത്തിന്റെ പ്രതിഷേധം ശക്തമാകുമ്പോഴാണ് ദേശാഭിമാനിയില് രൂക്ഷ വിമര്ശനം.
എക്സൈസ് മന്ത്രിപോലും മുന്കൂട്ടി അറിയാതെ ബജറ്റ് പ്രസംഗത്തിലൂടെ നടപ്പിലാക്കിയ ഈ നിര്ദ്ദേശം മദ്യ വ്യവസായികള്ക്ക് കോടിക്കണക്കിന് രൂപയുടെ ലാഭമുണ്ടാക്കാനാണ്. ഭരണം തുടങ്ങി ആദ്യ നാളുകളില് തന്നെ ഇത്തരമൊരു വിവാദ തീരുമാനത്തിലേക്ക് സര്ക്കാര് എടുത്തുചാടിയത് ദുരൂഹമാണെന്നും പറയുന്നു. മുഖ്യമന്ത്രിയുടെ അടുത്തിടെ നടന്ന മംഗളൂരു യാത്ര അതീവ ഗൗരവത്തോടെ അന്വേഷിക്കണമെന്നും ദേശാഭിമാനി ആവശ്യപ്പെടുന്നു. ജനങ്ങളെ വഞ്ചിക്കുന്ന ഈ നിലപാടിനെതിരെ ശക്തമായ ജനകീയ പ്രതിരോധം ഉയരണമെന്നും മുഖപ്രസംഗത്തില് പറയുന്നു.
വിഷയത്തില് തീരുമാനമെടുക്കാനുള്ള ഉത്തരവാദിത്തം മുന്നണിക്ക് വിട്ടുകൊടുത്ത മുഖ്യമന്ത്രി വി.ഡി. സതീശന്റെ നടപടി പൊതുജനങ്ങളെ വിഡ്ഢികളാക്കാനാണെന്ന് സിപിഐഎം മുഖപത്രമായ 'ദേശാഭിമാനി' കുറ്റപ്പെടുത്തി. മദ്യ മാഫിയയും സര്ക്കാരും തമ്മിലുള്ള അവിശുദ്ധ ബന്ധത്തിന്റെ തെളിവാണ് ഈ തീരുമാനം. അഴിമതിക്ക് മുസ്ലിം ലീഗ് ഒത്താശ ചെയ്യുകയാണെന്നും ദേശാഭിമാനി ആരോപിച്ചു.
മുന്നണിയിലെ ഘടകകക്ഷികള്ക്കിടയില് നിന്നുപോലും വലിയ എതിര്പ്പുകള് ഉയര്ന്നിട്ടും ഈ നികുതിയിളവ് പിന്വലിക്കാന് മുഖ്യമന്ത്രി തയ്യാറായിട്ടില്ല. ഇത് സര്ക്കാരിന്റെ യഥാര്ത്ഥ താല്പര്യങ്ങള് എന്താണെന്ന് വ്യക്തമാക്കുന്നതാണെന്നും പറയുന്നു.
