തൂത്തുക്കുടി: ക്ഷേത്രദര്ശനത്തിന് എത്തിയ നവദമ്പതികളെ കുരങ്ങന്മാര് ആക്രമിച്ചതിനെ തുടര്ന്ന് ഭയന്നോടിയ 24 കാരി കുന്നിന്മുകളില് നിന്ന് വീണു മരിച്ചു. ദമ്പതികള് കുരങ്ങുകള്ക്ക് പഴങ്ങള് നല്കിക്കൊണ്ടിരുന്നപ്പോള് ഒരു കൂട്ടം കുരങ്ങുകള് ഇവരെ വളഞ്ഞതോടെ യുവതി ഭയപ്പെടുകയായിരുന്നു.
തൂത്തുക്കുടി ജില്ലയില് ശനിയാഴ്ചയാണ് ദാരുണമായ സംഭവം നടന്നത്. തൂത്തുക്കുടി സൗത്ത് തിട്ടങ്കുളം സ്വദേശിനിയായ അനിതയാണ് മരിച്ചത്. വിദേശത്ത് ജോലി ചെയ്യുന്ന 29 കാരനായ സുരേഷുമായി കഴിഞ്ഞ മാസമായിരുന്നു അനിതയുടെ വിവാഹം. നാട്ടിലെത്തിയ സുരേഷും അനിതയും പ്രാര്ത്ഥനകള്ക്കായി കഴുകുമലൈയിലുള്ള കഴുകാചലമൂര്ത്തി ക്ഷേത്രത്തില് എത്തിയതായിരുന്നു.
പ്രധാന ക്ഷേത്രത്തിലെ ദര്ശനത്തിന് ശേഷം ദമ്പതികള് കുന്നിന്മുകളിലുള്ള ഉച്ചിപ്പിള്ളയാര് കോവിലിലേക്ക് കയറി. അവിടെ വെച്ച് കുരങ്ങുകള്ക്ക് പഴങ്ങള് കൊടുക്കുമ്പോള് പെട്ടെന്ന് നിരവധി കുരങ്ങുകള് ഇവരുടെ ചുറ്റും കൂടുകയായിരുന്നുവെന്ന് പോലീസ് പറഞ്ഞു. അനിതയ്ക്ക് നിയന്ത്രണം നഷ്ടപ്പെടുകയും കുന്നിന്മുകളില് നിന്ന് താഴേക്ക് വീഴുകയുമായിരുന്നു എന്നാണ് പ്രാഥമികമായി വിവരം.
സംഭവസ്ഥലത്തുതന്നെ അവര് മരണപ്പെട്ടു. തകര്ന്നുപോയ ഭര്ത്താവ് ഭാര്യയുടെ മൃതദേഹത്തിന് സമീപം ഇരുന്ന് വിതുമ്പുന്ന ദൃശ്യങ്ങളാണ് ഒടുവില് പുറത്തുവന്നത്. സംഭവത്തില് കേസ് രജിസ്റ്റര് ചെയ്ത പോലീസ് കൂടുതല് അന്വേഷണം നടത്തിവരികയാണ്.
